Tamacahutt n imakraḍen

Tamacahutt n imakraḍen_Conte des brigands

llan sin n imɣaren mibɛaden. Yal yiwen, tamurt-is.
Yiwen n wass, yemmut yiwen deg-sen, yeǧǧa-d mmi-s. Mmi-s-nni meqqer.
Yiwen n wass, yenna-yas i yemma-s:
— Baba yemmut ? Tenna-yas:
— Yemmut! Yenna-yas:
— Ihi, a yemma, a yi-temleḍ ccɣel n baba. Tenna-yas:
— A mmi, cceɣl n baba-k yewɛeṛ! Yenna-yas:
— Welleh, ar d-iniḍ! Tenna-yas:
— Ṛuḥ, aɣ-d tayuga, ad tkerzeḍ! d wagi ay d ccɣel n baba-k.
Aqcic-nni iṛuḥ isewweq, yuɣ-d tayuga s 2000 n duru. ass mi i-d-wwḍen iweǧǧiben, ixeddem tafellaḥt. Almi d-yewweḍ unebdu, yesserwet, yufa aṭas llexṣara yexṣer. Almi d iweǧǧiben diɣen, yezzenz tayuga-nni s 200 n duru. Aha-n yexṣer. iluɛa yemma-s, yenna-yas:
— Welleh, amer mačči d yemma, ar kem-wteɣ s ubunyiw, ar kem-ḍeggreɣ mbeɛɛid, 7 n ussan ur tettenkarḍ ara! Yenna-yas:
-Yessefk a yi-d-iniḍ ccɣel n baba. Tenna-yas:
— A mmi, cceɣl n baba-k d amettjeṛ n zzit. Iṛuḥ, yumen-itt: isewweq ssuq diɣen, yuɣ-d sin iserdyan s 500 n duṛu, iṛuḥ yuɣ-d zzit: 500 n duṛu diɣen n zzit, iṛuḥ ar t-yejjiǧaw g ssuq, ɣlin-as iserdyan ar daxel n yeɣẓer: iserdyan ṛṛẓen akk, mmuten akk; zzit-nni tṛuḥ irkel, tenɣel. iṛuḥ-d ar yemma-s, yenna-yas:
— Twalaḍ tura ?... Ass-a rebḥeɣ-d 17 n melyun ! A mmer ur yi-qqar yiwen ay amcum, a kem-wteɣ s lbunya !
Netta yewt-itt, yesseglalz-itt. Yenna-yas:
— Ur tefhimḍ ara? iserdyan-nni d zzit-nni, yuɣ-iten yeɣẓer s 17 n melyun ! Tura ṛuḥen akk, ṛṛẓen akk, ddgedgen akk!
Ixemmem d yiman-is, yenna-yas: Welleh, ar d-ad ṛuḥeɣ ar wemɣar azemni. Yenna-yas:
— A baba amɣar azemni, ḍebbeṛ fell-i: yeǧǧa-yi-d baba d amejṭuḥ, yemmut: ur ẓriɣ ara cceɣl-is. Tura, ticki steqsaɣ yemma, tenna-yi-d: d tafellaḥt. Ṛuḥeɣ uɣeɣ-d izgaren: welleh tafellaḥt, welleh izgaren, d lexṣara irkel!
Qqleɣ uɣeɣ-d iserdyan, wwiɣ-d zzit, kada u kada ṛṛas-lmal: grarben akk ar daxel n yeɣẓer. Tura, qqim di talwit ! yessefk a tḍebbṛeḍ fell-i amek ara ad xedmeɣ i wakken axiṛ ad afeɣ ccɣel n baba. Yenna-yas:
A mmi, ṛuḥ s axxam, sneɛmel tuḍneḍ, tinḍ-as i yemma-k a k-d-sseww tifḍarin: ticki terra taṛbut f lkanun, ad twaliḍ aman ggaren-d tiẓedyin, ddem-d tabururt, uqm-itt ɣef tbaqit, tinḍ-as: a yemma! ɣur-m tabururt-nni daxel n teṛbut, kks-itt-id, kks-itt-id ! Yemma-k-nni ad temmeɣ ar tbururt-nni a tt-id-kkes: keččini ṭṭef afus-is, tinḍ-as: welleh, ur d-kkiseɣ afus-im anagar ma tenniḍ-iyi-d ccɣel n baba, lackit ayagi izrin tettkellixeḍ fell-i. Imir, a mmi, a k-d-ini ccɣel n baba-k. Ulamma nekkini, d amɣar azemni, ccɣel n baba-k, gziɣ-t, d tukkerḍa i yettaker. d acu mačči iman-is yella umeddakel-is.
Aqcic-nni iṛuḥ ar yemma-s. Yexdem akken i s-d-yenna wemɣar azemni, Teddem-as-d yemma-s tanuga, imir, tenna-yas:
— A mmi, ccɣel n baba-k yewɛeṛ! Yenna-yas:
— Ur kem-id-wqiɛ ara lmeɛna: zemreɣ i yiman-iw. Tura kan a yi-d-iniḍ ameddakel-is, anta tamurt g i yella?
Tenna-yas:
— Yebɛed... Yenna-yas:
— Ur kem-id-wqiɛ ara lmeɛna.
Aqcic yekkr-d, azekka-nni tanzayt, iṛuḥ ar tmurt-nni:
— Azul fell-awen !
— anṣuf ! s ani i d-ṛuḥd, a mmi ? Yenna-yas:
— ṛuḥeɣ-d ɣer leflani. Yenna-yas:
— Qqim, a mmi, dagini: ad nṛuḥ a t-id-nlaɛi. Ceggɛen yiwen weqcic at taddart-nni, nnan-as:
— Ṛuḥ, laɛi-d Bu-taggurt, Iṛuḥ-d:
— Acu tebɣiḍ, a mmi? Yenna-yas:
— A baba amɣar, serriɣ-ak,
Yewwi-t s axxam iman-is, yenna-yas:
— Wi i k-ilan? Yenna-yas:
— D mmi-s n ḥmed u ɛemmaṛ, taddart ufella.
— Ah ! (yenna-yas:) Ah! anṣuf yes-k, a mmi. D keččini irkel ? Ur k-ɛqileɣ ara. Surf-iyi. I baba-k, yella? Yenna-yas:
— Uh ! Baba, aṭas ayagi i yenmut. Yenna-yas:
— Wah! ya ṣṣiɛqa ! ya ṣṣiɛqa ! Acu ɣef ur iyi-d-nnim ara? Ameddakl-iw n zik, a fell-as yeɛfu ṛebbi, yemmut, ur iyi-d-nnim ara! Wah, ya ṣṣiɛqa tazeggaɣt ! d acu keččini meẓiyeḍ. D yemma-k irkel i ixedmen annect-a ; ilaq tili iyi-d-nna: tessn-iyi. Sebɛin ṣṣiɛqat ! I tura, sani, a mmi, i d-ṛuḥeḍ ? Yenna-yas:
— Ṛuḥeɣ-d, a baba amɣar, ad nexdem akken txeddmem kečč d baba zik. Yenna-yas:
— A mmi, tewɛeṛ tegnitt ! Yenna-yas: Asmi yella baba-k, zik, d argaz! Ahan tura yemmut, ur iyi-tceggɛem, ṣṣiɛqa u nniɛqa ! Tura nekk yid-k, lḥu, a nṛuḥ ɣer lmelk-inna-ynu, ad naf tasekkurt tebrek ɣef tmellalin: kks-itt-id keččini ur tettaki ara tsekkurt ; a tt-rreɣ nekkini ur tettaki ara tsekkurt-nni diɣen. Yenna-yas:
— Ṛuḥ, a baba amɣar, keččini qbel, kks-itt-id d amezwaru, a tt-rreɣ nekkini.
Iṛuḥ wemɣar-nni, alarmi d amkan, yufa tasekkurt tebrek. Aqcic-nni, yebɛed wanda t-yeǧǧa: iḍefr-d weqcic-nni deffir s tuffra: yufa amɣar-nni itekks-d timellalin, yettarra-tett-id ar uqelmun. Aqcic-nni yukr-as-tett i wemɣar-nni g qelmun-is. Almi i s yeǧǧa yiwet n tmellalt, yuɣal-d ɣer wemkan-is, ur t-iwala, ur as-iḥuss.
Lweqt i d-yekker wemɣar-nni, iṛuḥ-d weqcic-nni , yenna-yas:
— Awi-d timellalin, a tett-erreɣ.
Yemmeɣ ar uqelmun, yufa ulac:
— Wah! i tmellalin-nni ?... d ayennat ...d lbaz i d-iṛuḥen deg igenni ! ... Anida llatt ? Ula yiwen-itett! Yenna-yas:
— Eyya, atti ɣur-i, a baba amɣar.
Yewhem, yenna-yas:
— Baba-k yettaker, tukkeṛḍa-yagi-inek, ur as-nessin ara. a k-yefk tizmert: tewwḍeḍ d lefḥel ugaṛ n baba-k ! (Yenna-yas:) Ihi tura ad nṛuḥ ad naker.
— ad nṛuḥ ar tmurt-nneɣ: yella yiwen n ugellid, yesɛa lexzani n lwiz: ad nṛuḥ a t-id naker.
Ṛuḥen-d wwḍen-d ar wexxam n weqcic-nni. Msalamen irkel. Yenna-yas i tmeṭṭut-nni (n wemɣar-nni):
— Sebɛin ṣṣiɛqat ! argaz-im yemmut, ur iyi-d ceggɛed: mačči akka !
— Ah ! (tenna-yas), d ayen, a baba amɣar: ula i nexdem.
Almi d azgen n yiḍ i qqimen g wexxam. Kkren-d imir, ɛnan axxam n ugellid, fetken-t, kecmen, ddmen-d snat n tcekkaṛin n lwiz, ṛuḥen-d. Ferqen-t-id. Iṛuḥ wemɣa-nni deg yiḍ, yenna-yas i weqcic-nni:
— ɣur-k: nekkini ṛuḥeɣ-d deg yiḍ, uɣaleɣ deg yiḍ: yiwen ur iyi-yeẓri ara: anagar keččini d yemma-k d wletma-k: ɣur-k yemma-k d weltma-k ur heddṛett ara i yiwen ! qqim-t di talwit.
Ay aqcic-nni yesɛa ɛemm-is yesɛa 7 n yessi-s. ɛemm-is-nni d igellil. Azekka-nni deg yiḍ, tceggeɛ yemma-s n weqcic-nni yelli-s, tenna-yas:
— In-as i tmeṭṭut n ɛemmi-m a m-d-efk ṛṛabɛa.
Tṛuḥ teqcict-nni, tenna-yas yemma-s d acu ɣur-m a s-tiniḍ ad nektil lwiz: ma tenna-yam-d: Acu ara tektilem?, in-as d nneɛma.
Tṛuḥ tenna-yas i tmeṭṭut n ɛenmi-s, tameṭṭut-nni n ɛemmi-s teḥṛec: d tikindect: tweqm-as llazuq i ṛṛabɛa-ini: tewwi-tt-id teqcict-nni. Almi d tameddit-nni ktalen. Azekka-nni tanzayt zik, tewwḍ-itt-id tmeṭṭut-nni:
— Azul fell-awen .., Fekt-aɣ-d ṛṛabɛa-nneɣ.
Tefka-yas-tt-id. Almi tewweḍ s axxam, texẓer llazuq-nni, tufa 10 n duṛu lwiz yenṭeḍ g llazuq-nni, teddm-it-id. Almi yekcem wergaz-is, tenna-yas:
— Welleh ! Mmi-s n gma-k, ar d lwiz i yektal iḍ yezrin. Yenna-yas:
— Awwah! d tikerkas. Tenna-yas:
— Mačči d cceɣl-ik: nekk d tikindect ay lliɣ: fkiɣ-as ṛṛabɛa, ssutren-t-id, uqmeɣ-as llazuq daxel: hata 10 n duṛu n lwiz wanda d-yedda.
— A tameṭṭut, fṛeḥeɣ-as! netta d igellil, ur yesɛi ara tamurt ; nekk sɛiɣ tamurt, sɛiɣ nneɛma: netta ur yessɛi ara. tameṭṭut-nni tenna-yas:
— Welleh, ar ad tṛuḥeḍ ad d-awiḍ idrimen am netta, neɣ ur teqqimeɣ g wexxam-ik !
Argaz-is imir iṛuḥ ar mmi-s n gma-s, yenna-yas:
— A mmi-s n gma, ma yehda-k Ṛebbi lɛalamin, ad dduɣ ula d nekkini ad akreɣ. Yenna-yas:
— a ɛenmi, ur tezmireḍ ara: yewɛeṛ! Yenna-yas:
-Ad dduɣ ! Yenna-yas:
— A wlidi, ad ak-fkeɣ deg lwiz-iw nekkini. Yenna-yas:
— Xaṭi! ad dduɣ! Yenna-yas:
— Lḥu! iyya, bges! ɣef 11 n yiḍ: cudd arkasen. Yenna-yas:
— Igerrez!
Tura ad nuɣal ɣer ugellid-nni. Iṛuḥ ɣer lxezna-s, yufa-tt tettwaker, atiṭuc ulac: Iṛuḥ ɣer baba-s amɣar azemni, yenna-yas:
— A baba amɣaṛ azemni, (yenna-yas;) ḍebbeṛ fell-i: ttwakreɣ, atiṭuc ur yelli. Yenna-yas ;
— A mmi, wagi i k-yukren akken, yewweḍ d lefḥel. ṛuḥ wqem aɣebbaṛ n wabbu daxel n uxxam-nni yettwakren, teffɣeḍ ɣer beṛṛa ad twaliḍ abbu ansi i d-iɛedda, tewqemd-as zzeftt.
Iṛuḥ iweqm-d agellid-nni akken i s-d-yenna wemɣar azemni: iselɣ-itt s zzeftt. Yenna-yas:
— Tura, a mmi, tselɣeṭ-tt ? Yenna-yas:
— Selɣeɣ-tt. Yenna-yas:
— Bab-is ad yettwiṭṭef.
Aqcic-nni lakk d ɛemm-is ṛuḥen-d ɣef 11 n yiḍ, wwḍen ɣer wemkan-nni. Yenna-yas:
— A ɛemmi, eyya ad nuɣal, a k-fkeɣ g lwiz-iw. Yenna-yas:
— Xaṭi! Yenna-yas:
— Ihi, ɛass-iyi-d dagi: ad ṛuḥeɣ ad kecmeɣ, ad ak-d-muddeɣ.
Amɣar-nni d cciṭan, yettagad amma ɣef ur s-d yettak ara g lwiz: yenna-yas:
— D nekk ara ikecmen ! Yenna-yas:
— A ṣṣiɛqa! ur tezmirḍ ara! Yenna-yas:
— iyya, iyya, iyya, iyya! ɣiwel, kcem, d acu kan ɛemmeṛ-d kan tacekkaṛt-agi, beṛka-k. Yak, iɛumm-ak? Ur ttagad: ur ttawiɣ ara deg-s, Fkiɣ-ak-tt i keččini,
Iṛuḥ yekcem. Yewwi-d lwiz-nni, yefka-yas-t-id, imekkn-as-t-id. Yeṭṭf-it weqcic-nni, yenna-yas:
— iyya, iyya, ffɣ-d! Lweḥda d uzgen ayagi: nuggad ad yali wass: ɣiwel!
Yemmeɣ yesɛedda aqerruy-is lakk d ifassen-is, yewḥel: yemɛaṛṛed g wammas, ad as-tiniḍ d lkullab i t-yeṭṭfen. Yenna-yas:
— A mmi-s n gma, weḥleɣ ! ccacu yneṭḍen fell-i g wammas ? 7 ssiɛqat! Eyya jebd-Iyi !
Iṛuḥ-d weqcic-nni, yenna-yas:
— Wah! Tessenseḍ-iyi-d d agini! ad yali wass, ad nettwaṭṭef! Ah ya ɛeṛḍ iman-ik ma ttzemreḍ!
— Ah ! (yenna-yas), ur zmireɣ ara, a ṣṣiɛqa !
Yenna-yas:
— Err iman-ik ar daxel. Yenna-yas:
— Ulamek: iḍarren-iw ɛellqen: ula anda rekdeɣ: lamer yelli wemkan i g ara serseɣ aqejjiṛ-iw, zemreɣ ad erreɣ iman-iw ɣer daxel. Yenna-yas weqcic-nni:
— Ad ig Ṛebbi ula anda ttserseḍ aqejjiṛ-ik, ɛeḍr iman-ik.
Yemmeɣ yeɛṛeḍ iman-is, ur yezmir ara. Yenna-yas:
— A mmi-s n gma, welleh ad iyi-lzem, weḥleɣ: lemdafiɛ ma kkesn-iyi-d ! Jebd-iyi tṛan ihi !
Aqcic-nni ijebbed, ijebbed, almi ifaggew, Yenna-yas:
— a ɛemmi, ur zmirɣ ara ! err iman-ik ar daxel.
— Yak, nniɣ-ak ur zmirɣ ara,., xzeṛ ssaɛa.
— Attan d ttlata d uzgen, Tura bab n lxezna ad yeffeɣ a ɣ-d-yaf dagi: kečč ad temmteḍ, nekk ad mmteɣ. Eyya, ad ak-mleɣ, ad nexdem yiwen n ṛṛay: yak, keččini lmut temmuteḍ, meqqar ad temmteḍ kan iman-ik.,. Yenna-yas:
— Amek?,.. Yenna-yas:
— Meqqar nekkini ad menɛeɣ: a k-kkseɣ aqerruy...
— Ah ! (yenna-yas), ala, ala, ala, ala, ala ! xaṭi, xaṭi, xaṭi ! jbed ma ttjebdeḍ!
Aqcic-nni yeddm-d takuba s tuffra, yewt-it kan, ijelleb uqerruy ɣer dihin, Yewwi aqerruy-nni, yerna tacekkaṛt-nni , iṛuḥ-d ɣer tmeṭṭut-nni n ɛemm-is lakked yessi-s , yenna-yas:
— Rumt tura, ha ! Atan baba-m ... Hatan, han, wergaz-im, hat nɣan-t-id ; kkesɣ-as-d aqerruy: ttrumt fell-as deg yiḍ-agi, azekka tanzayt, ɣur wakett ad tetɣebbnemt.
Azekka-nni, agellid iṛuḥ-d, yexzeṛ ɣer utiṭuc-nni, iwala iqejjiṛen ɛellqen-d. Yenna-yas i mmi-s:
— Tura neṭṭf-it: a t-neɛqel, a nẓer anwa wa tura: eyya, tura a neffeɣ ar beṛṛa, ad neɛqel uday-agi: mačči ala weḥd-s: ur t-nneqq ara anagar ma yenna-d imeddukal-is: a ten-nneɣ ɣef ubrid.
Yeffɣ-d ugellid, yewqem tawwurt, mmi-s-nni yezwar, yenna-yas:
— Wah ! a baba, argaz-agi ur yesɛi ara aqerruy.
Yenna-yas:
— Ah ! berka tikerkas ! Yenna-yas:
— Eyya ɛeddi-k ad teẓreḍ.
Lweqt g yewweḍ ugellid, yufa s tidett, yenna-yas: Ah! tura ad ṛuḥeɣ ɣer wemɣar azemni: Iṛuḥ ɣer baba-s amɣar azemni, yenna-yas:
— Debbeṛ fell-i: argaz-nni, ṭṭfeɣ-t !
Yenna-yas-d wemɣar azemni:
— Tɛeqleṭ-t ? Yenna-yas:
— Limer i t-ɛqileɣ, acuɣer d-ṛuḥeɣ ɣur-k ?
— Eɛni kksen-as aqerru? Yenna-yas:
— D annect-agi i yi-d yewwin. Yenna-yas:
— Kksen-as aqeyrru! Ihi, wagi d lefḥel!
— Ihi, amek ara nexdem? Yenna-yas:
— Azekka tanzayt, berreḥ g taddart ur iteffeɣ yiwen. Argaz-agi, ḍelq-it g webrid, tewqemḍ-as imɛassan: win i d-iɛeddan ssyen, ama d aderɣal, ama d amerẓu, ama d igellil, ama d amerkanti, ama d argaz ama d tameṭṭut, ṭṭf-it. Yenna-yas:
— Ak yeɛfu Ṛebbi!
Iṛuḥ yexdem akken: iḍelq-it, iberreḥ i taddart ur yettɛedday ara yiwen g webrid-nni ; iweqm-as iɛessasen. Deg wass, aqcic-nni iṛuḥ yenna-yas i yessi-s:
— Ad tafemt babat-kett g webrid ; a kett-weqmeɣ llazuq i wallen-nnkett: ta ad tawi taḍellaɛt n nneɛma, tayeḍ ad tawi tawellalt n zzit: ad tawḍemt ɣer din, ad tesneɛmalemt yuɣ-akett iḍerren, a kett-tenɣel nneɛma lakk d zzit, ad tettrumt ɣef babat-kett: a kett-id-inin iɛessasen: Acu ɣef akka tettrumt ? a s-tinimt:
ixuṣṣ ! wqemn-aɣ dagini aqrum g webrid, yesseɣli-yaɣ: nemmetr-d nneɛma lakk d zzit, tura tenɣel.
ttrutt, ttrutt, ttrutt, dɣa ṛuḥett.
Wwḍett s axxam agellid yusa-d: yenna-yasen i yɛessasen: Acu teṭṭfem ? Nnan-as: ay agellid, ur neṭṭif ara. — Ulac! ulac. maḍi ! maḍi: ɛeddatt kra n temṣerrfin, yuɣ-astt iḍarren, ɣlitt, ttrunt ɣef nneɛma d-wwitt lakk d zzit: d aya, d aya. Yenna-yas:
— Wah ! ya ṣṣiɛqa ! Ur awen-nniɣ ara ama d aderɣal, ama d amerẓu, ama d amerkanti,,, ula d ṣṣiɛqa ma tɛedda-d, ṭṭfet-tt ? Nnan-as:
— Ah ! ay agellid, nekni, d tigellilin i ur neẓri ara akka.
Yeddm-d takuba, yessafg-asen iqerray. Yuɣal ɣeṛ baba-s amɣar azemni, yenna-yas:
— A baba amɣar azemni, ḍebbeṛ fell-i. Ixedm-iyi-tt meqqret ! Tura imɛassan kkesɣ-asen iqerray, lackit ɛeddatt-d, iweqm-asett-id i yessi-s am temṣeṛṛfin. Tura, ḍebbeṛ fell-i. Yenna-yas:
— A mmi, azekka leɛca leɛca, Ssers-it g uzniq n taddart, tewqemḍ-as iɛessasen: win i d-iṛuḥen ɣur-s deg yiḍ, d win: a t-ṭṭfen.
Iṛuḥ iweqm-it, iḍelq-it deg yiḍ, iweqm-as iɛessasen, ɛussen-t kra yekka yiḍ.
Aqcic-nni iṛuḥ ɣer yiwet n tiɣilt, yewwi isni, yerna aɛekkaz n yelni, iṛuḥ-d yeqqar-d g webrid: Wac texdem fi ṛas ddenya ? Wac texdem fi ṛas ddenya? Wac texdem?... Imɛassan-nni g 7. Yesla-yas yiwen, iwala-t yerna ; yenna-yas:
— Wah, ay agraw, ma ur iyi-jji ara Ṛebb i ad skiddbeɣ, amzun walaɣ Malik n sswal ɣer tiɣilt-inna.
NNan-as:
— Amk-it ?
— Walaɣ aqerruy-is annect n yesni, (yenna-yas), yerna lqedd-is annect uɛekkaz n yelni ; yerna iheddṛ-d taɛṛabt. Ineṭq-d yiwen, yenna-yas:
— Ḥeqq Rebbi ! d win, swa-swa !
Aqcic-nni simmal la d-yettṣubbu ɣer ɣur-s, nutni rewlen. Yeqqim yiwen iɛuss, yewqem tasa, ulamma ybecc iman-is. Aqcic-nni yewwd-d, yeṭṭf-it kan g uqejjir, yewwi-t.
Azekka-nni, yewwḍ-d ugellid:
— Ah, teṭṭfem?
Ineṭq-d winna-nni ibeccen iman-is, yenna-yas:
— Ay agellid, d ayen: win iɛad Rebbi fell-aɣ yewwi-t.
— Amek i t-yewwi ?
— Iṛuḥ-d, nɛeql-it: wigi rewlen, nekk qqimeɣ, weqmeɣ tasa: welleh ar becceɣ aserwal-iw.
— D tikerkas !... yelha, anida yella ? Yenna-yas:
— Yewwi-t. Yenna-yas:
— Aten-tan tkerkas: mačči yettawi ɛezṛayen... iyya, awen-kkseɣ iqerray.
Yekks-asen iqerray. Iṛuḥ ɣer wemɣar azemni ;
— A baba amɣar azemni, debbeṛ fell-i: tura yerra-d iman-is d ɛezṛayen, yewwi-t. Imɛassan-nni rewlen ; yegra yiwen, ibecc iman-is. Yenna-yas:
— Nniɣ-ak: wagi irna-k, irna-yi. ṛuḥ, berreḥ i taddart ur yettɛedday yiwen g webrid ukeṛṛus i ssut d lwiz, tewqemḍ-as 7 n imɛassan da, 7 n imɛassan da: win i d-iɛeddan, d win.
Netta iṛuḥ yekra-d 7 ileɣman, iweqm-asen ticwariyin, iweqm-asett yiwet n tama d tazegzawt, yiwet n tama d tazeggaɣt ; yiwet n tama netta, yewqem taɛmamt, tama nniḍen, yewqem timeḥremt ; yiwet n tama, yewqem tacekkaṛt, yiwet n tama, yewqem abeṛnus ; yiwen n uqejjiṛ, d arkas, yiwen n uqejjiṛ d aṣebbaḍ ; yesleɣ iqejjiren-is d zzeftt, yesleɣ iqejjirn ileɣman d zzeftt diɣen, Iṛuḥ iɛedda, Luɛan-t-id imɛassan-nni, nnan-as:
— S ani akka ? agellid iberreḥ ur yettɛedday yiwen!
— Nekk, tweqɛ-iyi-d lmeɛna: ad ɛeddiɣ tebɣiḍ neɣ ur tebɣiḍ !
Iṛuḥ iɛedda, Lwiz-nni yewwi-ten ak g iqejjiṛen-is lakk g iqejjirn ileɣman. Iṛuḥ. Ileɣman-nni, yerra-ten, netta yuɣal-d, yewwi-d lwiz-nni, iṛuḥ-d s axxam-is,
Almi d tameddit-nni, yewweḍ ugellid:
— Acu teṭṭfem? Nnan-as:
— Ur neṭṭif ara, ay agellid. Iɛedda-d yiwen, yewwi-d ticwariyin tizeggaɣin, yelsa iṣebbaḍen, yerra taɛmamt, abeṛnus.
Neṭqen-d widak-nniḍen, nnan-as:
— A yagellid, d tikerkas ! Ticwariyin d tizegzawin, yelsa irkasen, yelsa tahendit, yewqem tacekkaṛt,
Wa yeqqar tazeggaɣt, wa yeqqar-as tazegzawt: mɛawaqen almi nnuɣen. Dɣa yunf-asen ugellid, ur asen yekkis ara iqerray, Iṛuḥ ɣer baba-s azemni:
— A baba amɣar azemni, debbeṛ fell-i: iweqm-asen taqsiṭ: lwiz-nni yewwi-t akk. Yewqem ticwariyin, yiwet n tama d tazeggaɣt, tama d tazegzawt ; ixeṛb-d akk iman-is. Yenna-yas:
— A mmi, irna-k, irna-yi. (Yenna-yas:) cebbeḥ i tzerzert, tserreḥḍ-as g taddart, tsetbeɛḍ-as tamɣart deffir, Axxam wuɣer tekcem tzerzert-nni, d win i k-yukren.
Iṛuḥ ugellid, yewqem akken i s-d-yenna wemɣar azemni. Tizerzert-nni tekcem ar daxel n wexxam n weqcic-nni, tɛeṛq-as i temɣart, Tamɣart-nni tuɣal-d ɣer ugellid, tenna-yas:
— Ihi, tɛeṛq-iyi. Yenna-yas:
— Welleh, ar d-am-kkseɣ aqerruy.
Yekks-as aqerruy. Iṛuḥ ɣer baba-s amɣar azemni.
— A baba amɣar azemni, ḍebber fell-i: tizerzert-nni tɛerq i temɣart. Yenna-yas:
— Ceggeɛ tamɣart-nniḍen, ad tessuter aksum n tzerzert g taddart, lameɛna .ma nnan-am-d iwimi, ur s-qqar ara i ugellid, in-as i nekkini.
Tṛuḥ temɣart-nni, tekcem qubala ɣer wexxam n weqcic-nni, tenna-yas:
— A yemma tamɣart , a yi-d-fkeḍ cwiṭuḥ n weksum n tzerzert i mmi yehlek. Tenna-yas:
— Iḥayen.
Aqcic-nni yeqqim deg tejmaɛt, iwala tamɣart-nni tɛedda-d, yeɛqel aksum-nni ɣer ufus-is, yenna-yas:
— Eyya, a yemma tamɣart, eyya: a m-d-rnuɣ: drus i mi-d-fka tfuḥatt.
Tuɣal temɣart-nni, tekcem deg tewwurt. Yewqem tawwurt, yezla-tt. Yenna-yas i yemma-s:
— welleh. amer mačči d yemma, ar kem-zluɣ!
Almi d azekka-nni tanzayt, iṛuḥ yewwi tamɣart-nni ɣer tewwurt n wanda yeggan ugellid, yessebded-itt-id ɣef tsulal, iweqm-as afettus-is ɣef tsalelt, icudd-as aksum n tzerzert ɣef ufus-is, iqeɛd-itt ; netta i ṛuḥ-d s axxam-is.
Almi yuli wass, yekkr-d ugellid:
Sbaḥ lxir ! ɛṭi-kem ṣṣeḥḥa ! tewwiṭ-tt-id ?...
Ur as-d-erri ara awal. Yekkr-d fell-as, yemmɣ a tt-id-yezzuɣer g ufettus: teɣli akk fell-as, tewt-it-id tsalelt, tesɛewj-d aɣesmar-is. Yenna-yas: Wah, ya ṣṣiɛqa ! Iṛuḥ ɣer baba-s amɣar azemni, yenna-yas:
— A baba amɣar azemni, ḍebbeṛ fell-i ! amcum-agi yewweḍ ! Tamɣart-nni i yi-d-nniḍ ceggɛ-itt, ceggɛeɣ-tt: yezla-tt, yessebded-itt ɣef tsulal: almi d-kkreɣ tanzayt, ɛuddeɣ ur temmut ara, ssawelɣ-as, nniɣ-as: ṣbaḥ lxir ! ur d-erri ara awal: jebdeɣ-tt-id g ufus, teɣli-d fell-i ; yerna tefka-yi-d tiyita tsalelt ɣer uɣesmar: xzeṛ, tura xzeṛ: amk ara xedmeɣ?
Yenna-yas wemyar azemni:
— Ur tesɛiḍ acu ara txedmeḍ: irna-k, irna-yi. Tura teqqim-iyi yiwet n teqsiṭ, dɣa d ayen: a k-d-t-ininiɣ: ma teṭṭfeṭ-t, teṭṭfeṭ-t, ma ulac, d ayen. ṛuḥ berreḥ yakk i taddart, s wergaz, s tmeṭṭut, s weqcic, s wemɣar, ad ččen akk seksu-ynek: a sen-tweqmeḍ ssikṛan. Ad tweqmeḍ aɛessas i tumneḍ: win i k-ixedmen akk annect-agi, a t-id-yehdeṛ irkel.
Iṛuḥ iberrḥ i taddart, iweqm-asen seksu, yerna-yasen ssikṛan. Yers-d seksu ; aqcic yeḥṣa, yečča d amezwaru ; teskeṛ akk taddart imir. Lqayed-nni iṛuḥ s axxam, anagar aɛessas-nni kan i yeqqimen,
Yekkr-d weqcic-nni yehdeṛ iman-is iman-is; xdemɣ-aya i lqayed, jɛelɣ-as aya i lqayed ; Dɣa yeɣli, yuɣal ar lqaɛa.
Aɛessas-nni yewhem amek ara yexdem. Yuggad ammer as-yeɛṛeq i mi ara d-ilaɛi ugellid. Yeddm-d lmus n tṣeḍila, iṣeṭṭl-as yiwet lfeṛda n cclaɣem, yerna d tayeffust. Iṛuḥ-d umɛassi-nni ad d-ilaɛi agellid.
Aqcic-nni yuki-d ; yesself i wudm-is, yufa yiwet lfeṛda tṣeṭṭel, yerna d tayeffust. Yeddm-d lemri, i wala-tt, yenna-yas: A yemma ! hedṛeɣ-d irkel ayen xedmeɣ!
Yeddm-d lmus n tṣeḍila g lǧib-is, yemmeɣ iṣeṭṭl-asen akk lfeṛda n cclaɣem, yiwet yiwet, yerna d tayeffust irkel. Ibeddl amkan.
Lweqt g yewweḍ ugellid s ugennur-is, yenna-yas:
— ṣeṭṭelɣ-as lfeṛda tayeffust... Tura atan ttwaṣeṭṭlen akk!... Ur ẓriɣ ara ṣṣiɛqa-yagi! Yenna-yas:
— iyya, iyya! ṛuḥi, ṛuḥ!
Yuɣal ugellid-nni ɣer baba-s amɣar azemni, yenna-yas:
— Ihedṛ-d yakk. Iṣeṭṭl-as uɛessas lfeṛda tayeffust ; iṛuḥ a yi-d-ilaɛi . nufa-ten-id ttwaṣeṭṭeln irkel! Tura yetɛedda !
Kkren widak-nniḍen. Yenna-yas yiwen i wayeḍ:
— Acu yuɣen cclaɣem-nni-inek ?
— Ah ! (yenna-yas) , acu i ten-yuɣen ?
— tṣeṭṭel lfeṛda-nni tayeffust ! Yenna-yas:
— I kečč ? Yenna-yas:
— Nekk, ala ! Yenna-yas:
— Aha ! xzeṛ g lemri !
Iwala s tidett. kul yiwen yeqqar akka i wayeḍ. Win yennan i wayeḍ: Acu yuɣen cclaɣm-ik ? yini-as: i keččini ?
Amɣar azemni yenna-yas:
— Ihi, a imi, ur ttḍebbiṛeɣ ara fell-ak tura, lackit irna-k, irna-yi. Tura teqqim yiwet: ṛuḥ, berreḥ g taddart, in-as: ɛuhdeɣ-k a Ṛebbi, cubkeɣ-k a Ṛebbi, a win i yi-xedmen annect-agini, ar d as-fkeɣ yelli baṭel, netta ad yuɣal deg wemkan-iw d agellid, nekkini ad qqleɣ d aneɣlaf ddaw-as.
Ineṭq-d yiwen, yenna-yas:
— D nekk ! Yenna-yas:
— Ini-d acu irkelli txedmeḍ.
Ur d-yenni ara. Ineṭq-d wayeḍ akken... Ineṭq-d weqcic-nni, yenna-yas:
-D nekk, a lqayed.
Yenna-yas: Jeɛleɣ akk-aya, irkel... Yefka-yas yelli-s baṭel; netta d agellid, netta d aneɣlaf ddaw-a s.
Qqimen akk-nni g yiwen n wexxam, Yiwen n wass, isewweq ugellid-nni, yufa agellid-nniḍen: msalamen, yenna-yas:
— Ur isetḥaḍ ara ? Tefkiḍ yelli-k baṭel, yerna keččini ddaw-as, netta d agellid!
Iṛuḥ-d agellid-nni yetɣebben. Iluɛa-t uḍeggal, weqcic-nni, yenna-yas:
— Yessefk a yi-d-iniḍ tameddit-agi acu k-id-yuɣen g ssuq. Yenna-yas:
— Ulac ! Yenna-yas:
— A yi-d-iniḍ ! Yenna-yas:
— Ihi, iluqb-iyi-d yiss-k ugellid n tmurt n lleflani weflan. Yenna-yas:
— Awi-d tasarut n udaynin.
Yeddm-d aɛawdiw, iṛuḥ ɣer tmurt-nni, ɣef 10 n yiḍ, iṛuḥ ɣer wanda ytett imensi g wexxam-is, yerra iman-is d ɛezṛayen: Wac texdem fi ṛas ddenya ?... Wac texdem fi ṛas ddenya, a bnaden?
agellid-nni yewhem, yenna-yas, wagi d ɛezṛayen! Yerra iman-is ɣer ufniq. Yekcem weqcic-nni, yewqem tawwurt n ufniq, yečča g lqut-nni n ugellid , iɛebba-d afniq-nni ɣef userdun, yewwi-t-idd imir-n. Kra yekka yiḍ, a la s-yeqqar: Wac texdem fi ṛas ddenya? Netta, agellid-nni daxel n ufniq, yebreḍ yakk iman-is.
Yessers-it-id imir-n g wexxam uḍeggal-is. Yenna-yas uḍeggal-is:
— S ani tṛuḥeḍ ? Yenna-yas:
— ṛuḥeɣ ḥewwseɣ ... Ax tasarut n ufniq-agi.
Yeṭṭef tasarut n ufniq agellid-nni, yelli tawwurt, iwala ɣer daxel ufniq-nni agellid-nni i t-id iluqben. Yekks-as leḥwayj-is, iɛawd-as leḥwayej-nni-ḍen. Yenna-yas:
— Ay agellid, ( i s-yenna uḍeggal-nni n weqcic), a-tan winna ss i tluqbeḍ, ahan: tura yewwi-k-id ɣur-i. Ahan tura tḍeɛfeḍ, txelɛeḍ, tjeggḥeḍ leḥwayj-ik.
Yenna-yas:
— Ay agellid, ur ttlaqabeɣ, ur iyi-tettlaqabeḍ . tura neɛdel, Ziɣ aqcic-agi d lefḥel!
agellid-nni yuɣal ɣer tmurt-is. Yeqqim-d ugellid lakk d uḍeggal-is.
Tamacahut-iw lwad lwad, Wwiɣ-tt-id i lejwad ; Nettat tṛuḥ aḥṛiq aḥṛiq,
Nekk ṛuḥeɣ abrid abrid ;
Tewt-iyi-d s teḥbult, ččiɣ-t,
Ewteɣ-tt s tewdect, rẓiɣ-tt !