Mḥend, ur yeṛḥemMḥend, que Dieu n’ait pas pitié de lui.
s ɣur Mouloud, Taseɛdit Benbouabdallah
Ass-n deg wussan n Ṛebbi f yiwen yesɛa sebɛa warraw-is; asmi i yesɛa sebɛa warraw-is, neţţa d ṣṣelṭan (ṣṣelṭan ala Ṛebbi), yerbeḥ yufa xeddmen-as lebɣi-s akken i s-yehwa, ţţaɣen-as awal, tṛankil akʷ i llan.
Ass-nni yessers-d af yiman-is aṭan, yenna-yas:
— Ad ẓreɣ anwa iyi-ḥemmlen deg-sen.
Armi d-yessers af yiman-is aṭan, akken d-yekker yiwen n umeqqran deg-sen, yenna-yas:
— A ɛellxiṛ a baba, akken i k-yehwa, ad ak-nexdem, ad ak-nezlu ad ak-naru, akken tebɣiḍ akken-ni.
Yenna-yas:
— A mmi, teţţucekkṛ-iyi tmeṭṭut-ik, ma tezliḍ-iyi-ţ ad ḥluɣ, ma ulac ad mmteɣ.
Yenna-yas:
— A baba, aṛǧu a d-uɣaleɣ.
Yekkr-d wayeḍ daɣen wi s sin, yenna-yas:
— D acu akka k-yuɣen? Yenna-yas:
— A mmi, aql-i helkeɣ, teţţucekkṛ-iyi tmeṭṭut-ik, ma tezliḍ-iyi-ţ, ad ḥluɣ, ma ulac ad mmteɣ.
Yenna-yas: a baba, aṛǧu, a d-uɣaleɣ.
Akken-ni armi di seţţa yid-sen, win d-yekkren a s-yini aṛǧu, a d-uɣaleɣ.
Yekkr-d umcṭuḥ deg-sen, yenna-yas:
— A mmi, ur tesɛiḍ d acu bɣiɣ, teţţucekkṛ-iyi tmeṭṭut-ik, ma tezliḍ-iyi-ţ, ad ḥluɣ, ma ulac, ad mmteɣ. Yenna-yas:
— Ma s yelli-s n ɛemmi ara teḥluḍ, ur teḥluḍ.
Dɣa yeddm imar-n amek ara yexdem, yenna-yas:
Ṛuḥ a mmi, ḥeṛṛmeɣ-k ula deg waman n tala.
Yenna-yas: A llaṭif a baba, ilaq ad iyi-tefkeḍ xerṣum isekkin akʷ d uɛawdiw. Yenna-yas:
— Ṛuḥ ddm-iten, bru-d i uɛawdiw, ur k-ţwalint ara wallen-iw.
Iṛuḥ yebra-d i uɛawdiw, yeddem-d isekkin-nni iṛuḥ. Akken imar-nni i iṛuḥ, yewwi tameṭṭut-is, - imezwura d aḍu, ineggura d lebraq - f uɛawdiw-nni.
Ileḥḥu ileḥḥu armi i yewweḍ s axxam iwaɣezniwen; yaf-iten-in di sebɛa. Yeddem ineqq deg-sen armi yenɣa seţţa, wi s sebɛa yerẓa-t. Akken i t-yerẓa, iḍeggr-it ar ddaw n wexxam.
Yezdeɣ lbeṛǧ-nni n iwaɣezniwen, qqimen akken di lberr.
Ass-nni neţţa iṛuḥ ad iṣegged, weḥd-s, tameṭṭut-is yettaǧǧa-ţ dinna.
Tḍall si ṭṭaq n leɛli, twala argaz-nni, awaɣzen-nni. Akken twala awaɣzen-nni, tenna-yas:
— D acu k-yuɣen? Yenna-yas:
— D argaz-im iyi-gan akka. Tenna-yas:
— A k-id-ssaliɣ? Yenna-yas:
— Ma tessuliḍ-iyi-n, ɣas.
Akken t-id-tessuli, terra-t ar leɛli bu s sebɛa a s-teţkettir di lemwakel. Tbedded-as armi i yeḥla.
Ass-nni yeḥla, yenna-yas:
— Ihi, amek ara s-nexdem i wergaz-inna-inem akken ad i-taɣeḍ nekk.
Tenna-yas:
— Amek ara s-nexdem? Ula d nekk tufiḍ-iyi-d wehmeɣ amek aa s-nexdem, a t-nneɣ, ilaq ad iyi-taɣeḍ keččini. Yenna-yas:
— Ihi, ṛuḥ; sers-d af yiman-im aṭan, in-as:
— Tţucekkeṛn-iyi waman i f i mqerbaben idurar, ma tewwiḍ-iyi-ten-id, ad ḥluɣ, ma ulac ad mmteɣ.
Yenna-yas: — Mi iṛuḥ am-ten-id-yawi, ad yezmeḍ fell-as wedrar-nni, a n-yeqqim din, nekk a kem-aɣeɣ, akken d-yusa wergaz, yenna-yas:
— D acu tebɣiḍ? Kull ci ad am-t-xedmeɣ, a tameṭṭut.
Tenna-yas:
— Ur tesɛiḍ d acu yi-ţţucekkṛen. Ţţucekeṛn-iyi waman i f i mqerbaben idurar; ma tewwiḍ-iyi-ten-id, ad ḥluɣ, ma ulac ad mmteɣ.
Yenna-yas: — sehlen.
Yeddem wergaz iṛuḥ. Yesberdeɛ i uɛawdiw-is iṛuḥ a ileḥḥu a ileḥḥu armi i yewweḍ ar yiwet n tmeṭṭut d tameṭṭut yelhan icawṛ-iţ. Tenna-yas:
— Sani a d-truḥeḍ? Yenna-yas:
— Ṛuḥeɣ-d s aman i f i mqerbaben idurar a ten-awiɣ i tmeṭṭut-iw, ţţucekkeṛn-as. Ma wwiɣ-as-ten-id ad teḥlu, ma ulac ad temmet. Tenna-yas:
— A nnaɣ a mmi, tadyant yeḍran yid-k, i ugadeɣ trewleḍ seg yimawlan-ik ad tweqɛeḍ di tmeṭṭut-ik. I yellan i yellan, ṛuḥ henni iman-ik, ur s-d-ţţawi ara aman i f i mqerbaben idurar, ur tehlik ara.
Yenna-yas:
— Nniɣ-am, ilaq a s-ten-id-awiɣ.
Tenna-yas:
— Ihi, a k-mleɣ amek aa ten-id-tawiḍ tɛeddiḍ fell-i.
Temla-yas; tefka-yas taṣeḍleţ n lfeṭṭa, tenna-yas: — mi twalaḍ idurar llin, gr-iţ kan akka s lḥir teččareḍ-ţ-id tɣiwleḍ. Ma yella zemḍen, kečč ur d-teṭṭaxxerḍ ara, dinna aa temmteḍ.
Iṛuḥ iwala idurar llin kan, iger taṣeḍleţ-nni n lfeṭṭa, yeččuṛ-iţ-id d aman, yewwi-ţ-id.
Akken ţ-id-yewwi imar-nni,iṛuḥ-d ar tmeṭṭut-nni icaweṛ akken, iɛedda-d fell-as. Tekks-as aman-nni, tefka-yas aman n tberrint.
Yewwi-ten-id. Akken i s-ten-id-yewwi i tmeṭṭut-is, neţţa yesṭebṭeb-as, neţţat tessuli waɣzen-nni, teffr-it aqbel, telli-yas-d tawwurt. Yenna-yas:
— Amek akka telliḍ? Tenna-yas:
— D acu n ccwi d acu n liḥala, tewwiḍ-iyi-d aman-nni? Yenna-yas:
— Wwiɣ-am-ten-id.
Teswa-ten. Yenna-yas:
— Tura teḥliḍ? Tenna-yas:
— Ḥliɣ.
Teqqim azekka-nni ṣṣbeḥ, neţţa iṛuḥ ad iṣegged, waɣzen-nni yeffɣ-d daɣen.
Ččan swan akken neţţa d tmeṭṭut-nni, tenna-yas:
— Niɣ, nniɣ-ak, yuɣal-d. Yenna-yas: "nekkini, a yelli, sani ṛuḥeɣ, zemreɣ i yiman-iw". Yenna-yas:
— Ihi, taswiɛt amek aa d as-tiniḍ? Ini-as:
— Yeţţucekkṛ-iyi ţţeffaḥ n lmedkur iḍallen i sebɛa lebḥuṛ d-yeddan di leǧnaḥ n ṭṭyur.
Ma tewwiḍ-iyi-t-id ad ḥluɣ, ma ulac ad mmteɣ.
Akken imar-n daɣen d-yekcem wergaz, yaf-iţ-id tehlek. Yenna-yas:
— A tameṭṭut, d acu kem-yuɣen? Tenna-yas:
— A y argaz, helkeɣ, yeţţucekkṛ-iyi ţţeffaḥ n lmedkur iḍallen i sebɛa lebḥuṛ d-yeddan di leǧnaḥ n ṭṭyur. Ma tewwiḍ-iyi-t-id, ad ḥluɣ, ma ulac ad mmteɣ. Yenna-yas:
— Yeshel.
Iṛuḥ yeṭṭes armi d ṣṣbeḥ. Ṣṣbeḥ-nni yekkr-d iṛuḥ, daɣen icaweṛ tameṭṭut-nni icaweṛ ass amezwaru.
Tenna-yas: — A nnaɣ a mmi, kra n win iḍallen i sebɛa lebḥuṛ ur d-yuɣal ara, keččini mmar a n-teqqimḍ din. Yenna-yas:
— Nniɣ-am, ml-iyi. Dɣa temla-yas akʷ amek ara yexdem, tefka-yas taxatemt n umenni, iṛuḥ. Imenna di Ṛebbi, yefka-yas-d aɛawdiw -imezwura d aḍu, ineggura d lebraq-. Iṛuḥ, la ileḥḥu, la ileḥḥu, la ileḥḥu armi i yewweḍ ɣer din. Yaf-n Yamina mmderged, teggan aseggas teţţenkar aseggas. Yaf-iţ-in, lmesbaḥ n ddheb s iḍarren-is d win n lfeṭṭa s aqerru-yis yessembeddal-as-ten; yaf-n lmesbaḥ n ddheb daɣen s idis azelmaḍ, win
n lfeṭṭa s idis ayeffus-is, ibeddl-iten; win uzelmaḍ yerra-t s ayeffus, win uyeffus yerra-t ur zelmaḍ. Ad yekkr ad yeffeɣ yekks-as-d taxatemt-nni seg ufus-is, yeqqn-iţ-id i tmeṭṭut-nni yeṭṭsen akken aseggas teţţenkar aseggas, yawed imar-n yekkr ad yeffeɣ, yeddm-d sebɛa n tdeffaḥin-nni si ṭṭbeq, yewwi-tent-id, yura ism-is wi ţ-id-yewwḍen.
Akken d-iṛuḥ ɣer tmeṭṭut-nni, icawṛ-it, tenna-yas: — Tuɣaleḍ-d? Yenna-yas:
— Uɣaleɣ-d. Tenna-yas:
— Awi-d tideffaḥin-nni.
Yefka-yas tideffaḥin-nni, tefka-yas tiyaḍ, yewwi-yas-tent-id i tmeṭṭut-is; ad ileḥḥu ad ileḥḥu, yesṭebṭeb-as af tewwurt. Neţţat daɣen teffer waɣzen-nni, tṛuḥ teffr-it, tezwar deg-s, telli-yas-d tawwurt i wergaz-is. Yenna-yas:
— Amek telliḍ? Tenna-yas:
— Aql-i cweyya kan, yenna-yas:
— A-tent-in tura tdeffaḥin, wwiɣ-am-tent-id.
Yefka-yas-tent. Akken i tent-tečča, yenna-yas:
— Teḥliḍ tura? Tenna-yas:
— Ḥliɣ.
Dɣa teqqim. Azekka-nni ṣṣbeḥ neţţa meskin yeswa lqahwa, iṛuḥ ad iṣegged daɣen; iɣill ur tesɛiḍ wi tesɛa. Akken d-yers waɣzen-nni, yenna-yas:
— Nniɣ-am, abrid-a ini-as am-d-yawi ayefk n tsedda, d-yeddan di tyeṭṭiṭ n mmi-s, d-icudden s cclaɣem n yizem d-iɛebba yizem d-yenheṛ yizem. Ma yewwi-yam-t-id, ad teḥluḍ, ma ulac ad temmted. Akka aa s-tiniḍ. Yenna-yas: mi iṛuḥ kan s izmawen-nni a t-ččen, neţţa a n-yeqqim din, nekk a kem-aɣeɣ.
Yeddem wergaz, akken d-yewweḍ yenna-yas:
— A tameṭṭut, d acu kem-yuɣen? Tenna-yas:
— Aql-i helkeɣ. Yenna-yas:
— D acu i m-yeţţucekkeṛn? Tenna-yas:
— Yeţţusekkṛ-iyi uyefk n tsedda, d-yeddan di tyeṭṭiṭ n mmi-s, d-iɛebba yizem d-yenheṛ yizem d-icudden s cclaɣem n wergaz-is. Ma tewwiḍ-iyi-t-id ad ḥluɣ, ma ulac ad mmteɣ.
Yenna-yas: yeshel.
Iṛuḥ icaweṛ tameṭṭut-nni, tenna-yas:
— Nnaɣ a mmi, tesɛa u tesɛin i iṛuḥen ţnadin ad xedmen akken, ččan-ten i tesɛa u tesɛin, kečč a k-rnun d bu s meyya. Yenna-yas:
— Anf-as.
Temla-yas irkulli, tefka-yas taxatemt n umenni iṛuḥ, yesberdeɛ i uɛawdiw-is - imezwura d aḍu, ineggura d lebraq -.
A ileḥḥu a ileḥḥu armi i yewweḍ s amkan-nni. Akken i yewweḍ s amkan-nni, yaf-n tasedda akken terba.
Imenna di Ṛebbi, yefka-yas-d ikerri yezlu-t yazu-t iḍeggr-as-t-id i tsedda-nni. Tenna-yas:
— Wi i-d-ikeṛṛmen akka a t-ikeṛṛem Ṛebbi, ɛahdeɣ-t s Ṛebbi, ur yeţţili d ayefk-iw, d-yeddem di tyeṭṭiṭ n mmi d-icudden s cclaɣem n wergaz-iw, d-iɛebba yizem d-yenheṛ yizem, ar d as-t-fkeɣ.
Yenna-yas:
— Ihi, d nekk.
Yawed iḍeggr azger i yizmawen-nni. Nnan-as:
— Wi aɣ-d-ikeṛṛmen akka a t-ikeṛṛem Ṛebbi, nɛahed-it s Ṛebbi, ur yeţţili d ayen i yebɣa ar t-nessiweḍ akʷ ur lebɣi-s. Yenna-yas:
— Ihi, d nekk.
— Res ɣer-sen. Tenṭeq tsedda-nni, tenna-yas:
— Ddem mmi-yaki zlu-t s yiccer tazut-t s yiccer, mi ara as-n-sleɣ yujjaq ad tergig tasa-w a k-ččeɣ cčeɣ tamurt i f i ttedduḍ.
Iṛuḥ yezla-t mbeeeeɛid, mbeɛd yuza-t-id yewwi-d tayeṭṭiṭ-is.
Tenna-yas:
— Ɣiwel a d-teẓẓgeḍ ayefk mi ara d-nneqlabeɣ fell-ak ad tergigi tasa-w ad waliɣ tayeṭṭiṭ-nni n mmi a d-teẓẓgeḍ ɣur-s ayefk-iw a k-ččeɣ.
a d-iteẓẓeg s lḥir s lḥir s imi d-tenneqlab, yeṭṭaxxer-d.
Yawed ɣer winna a s-d yeccencew cclaɣem-is, n yizem-nni, yenna-yas: ɣiwel, lukan ad netqeɣ a k-id-afeɣ mazal tccencaweḍ di cclaɣem-iw, a k-ččeɣ.
Yeddem amek ara yexdem, iɣawel-d kan yeccencw-d cclaɣem-nni-nines, yekks-as-ten-id, icudd-d yis-sen tayeṭṭiṭ-nni, widen-nni heggan-d iman-nsen, nnan-as:
— Ɣiwel
Yiwen iɛebba-yas-ţ-id, wayeḍ inehṛ-it-id.
A d-leḥḥun a d-leḥḥun armi d-wwḍen s ayda ur ilaq ara a ten-id-yessekcem ur taddart. Imenna di Ṛebbi, yers-asen-d ikerri, yefka-yasent i sin yizmawen-nni ččan-t, yenna-yas a yi-d-ternuḍ ikerri akʷ d wezger, a t-awin yid-sen.
— Ikerri fekt-ţ i tsedda-nni, azger ččet-ţ kunwi.
Daɣen rsen-as-d akken, wwin-ten iɛebba-yasen ṛuḥen.
Ayefk-nni, iɛedda-d f tmeṭṭut-nni, tekks-as-d tefka-yas-d ayefk n lmal.
Iṛuḥ wergaz imar-n akken d-yewweḍ ar tmeṭṭut-is, yesṭebṭeb-as yenna-yas:
— Lli-yi-n tawwurt.
Neţţat tṛuḥ daɣen teffer waɣzen-anni. Akken teffer waɣzen, telli-yas-d tawwurt. Imar-n yenna-yas:
— Ccwi-kem? Tenna-yas:
— D acu n ccwi d acu n liḥala, ternuḍ kečč teqqimḍ-n.
Testeɛmel a teţneẓma fell-as. Yenna-yas:
— Annect-aki yakʷ n-qqimeɣ, ar tẓreḍ ansi m-t-id-wwiɣ. Ax tura ayefk-aki ma ad teḥluḍ.
Akken teswa, yenna-yas:
— Teḥliḍ? Tenna-yas:
— Ḥliɣ. Yenna-yas:
— Ṛuḥ.
Qqimen, ččan imensi, qqimen akken armi d ṣṣbeḥ-nni, daɣen netta iṛuḥ ad iṣegged, akken i iṛuḥ ad iṣegged, neţţa yeɛna abrid-is, iṛuḥ ar lexla. Neţţat yeǧǧa-ţ deg wexxam, tssers-d waɣzen-nni, tsseww-as-d lqahwa, yečča yeswa yeqqim. Yenna-yas:
— I tura, amek aa s-nexdem i wemcum-aki? Taswiɛt selxs agerzi n leḥrir, di zzit, tcuddeṭ-ṭ ur tegjdit-inna, ma izemr-as a t-id-yesɣers, yesker, ma ulac ini-iyi-d: “ers-d, a wahin n teɛrict”.
Mi d-rseɣ, tiqit idammen ur s-tɣelli ara ur lqaɛ.
Imar-n a kem-aɣeɣ.
Akken d-yusa wergaz si lexla, tefka-yas yečča imensi yeswa, tenna-yas:
— A y argaz, a k-d-iniɣ yiwet n tɣawsa a ţ-txedmeḍ. Yenna-yas:
— Ayen i m-yehwan ini-iyi-t-id a t-xedmeɣ, nekk zegreɣ lebḥuṛ, xedmeɣ akka xedmeɣ akka, ǧeɛɛleɣ akka, nɣiɣ iwaɣezniwen, kull ci xedmeɣ-t. Ay-aki a yi-d-tiniḍ zmerɣ-as. Tenna-yas:
— Ihi, yya a k-cuddeɣ ur tgejdit-aki s ugerzi-yaki n leḥrir (neţţa yeččuṛ d zzit). Yenna-yas:
— Cudd-iyi. Tenna-yas:
— Ma tzemreḍ a t-id-tesɣerseḍ, tzemreḍ i kull ci. Yenna-yas:
— A m-qqareɣ, kull ci xedmeɣ-t, xellik a wa.
Tcudd-as ifassen-is, a yeţţeɛraḍ a ten-id-yesseɣres a yeţţeɛraḍ neţţa yeggumma ad yegzem ugerzi n leḥrir yerna yeččuṛ d zzit. Yenna-yas:
— Ihi, waki a tameṭṭut, u s-zmireɣ ara. Tenna-yas:
— Tenniḍ-iyi kull ci zmerɣ-as, ɛreḍ ma d-tesɣersed.
— Yeţţeɛraḍ a yeţţeɛraḍ, ulac. Tenna-yas:
— Ers-d, a wahin n teɛrict.
Akken d-yers waɣzen-nni, yenna-yas:
— A yelli, a kem-yexdeɛ Ṛebbi, texdeɛḍ-iyi; nekk sebbleɣ baba d yemma f wudem-im, kemmini d waki i d lxiṛ aa d i-terreḍ.
Semmeḥt-iyi, ad steɣfreɣ gar-i d bab-iw imi xedmeɣ di ṛṛay-aki, ad rnuɣ ad sweɣ ddexxan, imar-n neɣt-iyi. Yerna a wen-sḥeṛmeɣ ad iyi-tenɣem: ad iyi-tqeddrem aftat aftat, ad iyi-terrem ur tsakuţ, ad iyi-tɛebbim i uɛawdiw-iw, a s-tinim:
“Err err s ayda d-tɣeẓẓiḍ timẓin yezzan”.
Ad iṛuḥ ad yi-ssiweḍ alamma d lebḥeṛ alamma d adrar-nni seg i m-d-wwiɣ aman. Ad iyi-ḍegger din. Aɛawdiw a wen-d-yuɣal, nekkin ad iyi-ḍegger din, akken i d lḥeṭṭ n tasa-w.
Yenna-yas:
— Annect-aki yeshel.
Fkan-as yesteɣfer gar-as d Bab-is icehhed, iɛedda yeswa ddexxan, imar-n yezlu-t waɣzen-nni iqeddr-it aftat aftat, yerr-it ur tsakuţ, nnan-as i uɛawdiw:
— Err err s ayda d-tɣeẓẓiḍ timẓin yezzan.
Dɣa iṛuḥ. A ileḥḥu a ileḥḥu armi yewweḍ ar tmeṭṭut-nni iwulḥal d tameṭṭut-nni s-yessufɣen ccweṛ ass amezwaru tefka-yas timẓin yezzan dinna.
A yesṭebṭeb neţţat tameṭṭut-nni s daxel n uzeṭṭa, la yesṭebṭeb la yesṭebṭeb uɛawdiw-nni, tḍall-d, tenna-yas:
— Niɣ zriɣ, d tadyant-nni n waɣzn-nni aa s-ixedmen akka; ad yeṛwu ṛṛay-is akʷ d tameṭṭut-is.
Telli-yas-d tawwurt, tekkr a ţţmeǧǧid fell-as.
Tssekcem aɛawdiw-nni, tssekcem argaz-nni yellan akken d iftaten, tṛuḥ teẓẓl-iţ di tqaɛeţ. Tssemlil tacriḥt ur tecriḥt tacriḥt ur tecriḥt, tunf-as akken la teţru.
Akken kull ṣṣbeḥ a t-teddehhin s wudi d-zzit, yekkr a yeţţemlili weksum ileḥḥem. A yeţţemlili a yettemlili armi d asmi t-id-yuɣal ṛṛuḥ. Yemlal akʷ weksum-nni amzun ur yegzim ara, yuɣal-it-id ṛṛuḥ.
Teḍṣ-it s tissegnit, yemwawel. Akken i t-tḍeṣ s tissegnit yemwawel, a s-tssemcaḥ aḍad n tament wayeḍ n wudi seg i t-twala yuɣal-it-id ṛṛuḥ. A s-tssemcaḥ aḍad n tament wayeḍ n wudi si ṣṣbeḥ ar ṣṣbeḥ. Yuɣal ineṭq-d ɣer-s. Tenna-yas:
— Niɣ nniɣ-ak ass amezwaru yakʷ i k-nniɣ, lexdayem n tinna ad ɣer-sen teffɣeḍ. Tura ma ixella-k-id Ṛebbi, ţţaṛ-ik a t-id-terreḍ.
Tkker imar-nni tideffaḥin-nni d-yewwi akken ufus-is, mi i s-ten-tenɣed, a s-teẓmi tiqit a ţ-isew seg waman ma yessutr-d, a s-d-tefk cwiṭ seg waman-nni a ten-isew. Ayefk-nni d-yewwi ufus-is daɣ-nni, teţţak-as seg-s cwiṭ cwiṭ.
Akken kull ass akken kull ass yuɣal yeqqim-d f yiman-is, yesɛa lǧebṛan yeqqim-d f yiman-is.
Yeţkettir di lemwakel mliḥ mliḥ armi d asmi yekker la yeţţali la yeṭṭar; yuɣal-it-id akʷ lǧehd.
Akken kull ass akken kull ass yenna-yas:
— Ad ṛuḥeɣ a d-rreɣ ţţaṛ. Tenna-yas:
— Ur d_teţţarraḍ ara ţţaṛ alamma trefdeḍ tasakuţ-inna n lemleḥ, ma tzemerḍ-as, ţekleɣ fell-ak, ṛuḥ a d-terreḍ ţţaṛ, ma ulac ala.
Yerfed tasakuţ-nni n lemleḥ, ur ţ-ineqql ara yakʷ. Tenna-yas:
— Mazal k-id-yuɣal lǧehd.
Tkker imar-nni daɣen a s-teţkettir di lemwakel akken yerbeḥ tbedded ɣur-s. Yenna-yas:
— Nniɣ-am ad ṛuḥeɣ a d-rreɣ ţţaṛ. Tenna-yas:
— Ẓer kan ur tsakuţ-nni.
Irefd-iţ, yessaweḍ-iţ-id s idmaren-is. Tenna-yas:
— Mazal-ak cwiṭ
A s-ternu a s-ternu tetṣun-it, yenna-yas:
— Nniɣ-am a n-ṛuḥeɣ a d-rreɣ ţţaṛ, d ayen.
Tenna-yas:
— Nniɣ-ak, ar tẓerḍ tasakuţ-nni.
Iga-yas kan akka s yiwen n ufus-is, yesḍall-iţ.
Tenna-yas:
— Tura ţekleɣ fell-ak - leţkal d-Ṛebbi -, ṛuḥ ad tṛuḥed.
Iṛuḥ, yerr iman-is d aɛeṭṭar. Akken lehwa seg yenni si tmurt yenna-yas:
— “Ṭɛam n Ṛebbi, a lmumnin”, s axxam-nni.
Neţţa iwulḥal abeckiḍ-nni-ines i yewwi akken seg wasmi d-yeffeɣ, ur t-id-yekkis ulukan d yiwen, (armi) ilaq a t-id-yekkes ufus n wergaz-nni nɣan akken, yuli-t wabbu, sked wer neɛriḍ, yugi ad yekkes si lḥiḍ-nni seg wasmi i t-iɛelleq ufus-is.
Akken i yekcem, yenna-yas:
— Ṭɛam n Ṛebbi, a lmumnin, tenṭeq neţţat tmeṭṭut-nni-ines tɛeql-it.
Tenna-yas:
— “aaaa nnaɣ a y argaz”, i waɣzen-nni, tenna-yas:
Taɣect-aki n Mḥend n win ur yeṛḥem. Yenna-yas:
— Mazal-am Mḥend n win ur yeṛḥem, ihi, ula d aɛawdiw yuɣal-am-d seg yidurar! Ula d aɛawdiw akken ikemmel iḍegger iman-is ɣer dinna mi i iḍegger win.
Ur d-yeţţuɣal ara Mḥend n win ur yeṛḥem.
— “Eyya eyya kecm-d ad teddariḍ”, i s-yenna waɣzen i wergaz-nni.
Yenna-yas:
— Yeṛḥem waldik. D lehwa-nni iyi-d-yewwin ɣer dagi-kana, aql-i hemmleɣ-d ɣer da. Yenna-yas:
— Ihi kcem-d kcem-d ad teddariḍ.
Yekcem, yeqqim akk-aki d tama n tewwurt.
Tenna-yas:
— Nnnnn, nnaɣ a mmi, akka yakʷ ay ineggi. Yenna-yas:
— Eyya aha qerrb-d ad tsseḥmuḍ, qerrb-d. Yenna-yas:
— Fiḥel, tssekcemḍ-iyi-d dduriɣ, ad rnuɣ ad sseḥmuɣ!
Yenna-yas:
— Qerrb-d kan ad tsseḥmuḍ, eyya ad teqqimeḍ ayda neqqim.
Akken i yeqqim, tenna-yas:
— A ḥeqq win d win, ar ifassen-inna am ifassen n Mḥend ur yeṛḥem Ṛebbi. (a yesseḥmuy akka ifassen-is)
Yenna-yas:
— Mazal-am Mḥend ur yeṛḥem. Mazal-am a d-yuɣal.
Tenna-yas:
— Wunag tura ṣṣifa-s neɣ d udem-is neɣ d lehduṛ-is d winna yakʷ.
Yenna-yas:
— Nniɣ-am ur mazal ara winna a d-yuɣal.
Dɣa ineṭq-d; yenna-yas:
— Tidenn-is anf-as kan, neţţa yeẓra, nekk ẓriɣ, ar din. Yenna-yas:
— Ihi d ayen; yenna-yas, di leɛnaya n Ṛebbi, abeckiḍ-inna tɛellqem akkahi i wabbu d uɣebbar, ayen ur t-id-tekkism ara?
Yenna-yas:
— Welleh ar seg wasmi i yemmut Mḥend ur yeṛḥem, ur t-id-nekkis. Yenna-yas:
— Nekk ahaqel mer ad ɛerḍeɣ, a t-id-kkseɣ.
Yenna-yas:
— A wah, a mmi, i iɛerḍen i iɛerḍen, u t-id-kkisen (ara), kečč a t-id-tekkseḍ? Yenna-yas:
— I mmar a d-yefk Ṛebbi tawwurt. Yenna-yas:
— “Ɛreḍ” i s-yenna waɣzen-nni, akken yeɛreḍ, iga-yas akka, yekks-it-id.
Yenna-yas:
— A wen-t-sefḍeɣ ma ulac uɣilif? Nnan-as:
— sefḍ-aɣ-t.
Isefḍ-it irkulli armi la yeţmecberriq, neţţa yewwi ayen s aa t-iɛmmeṛ, iɛemmṛ-it kan, yezga-yas-ţ-id, yenɣa waɣzen-nni d amezwaru. Yenna-yas:
— Zid. Yenna-yas:
— Wellah, ma nzid.
Yexbabeḍ yexbabeḍ dɣa yemmut waɣzen-nni d amezwaru. Yenna-yas:
— Kker, ad tegreḍ timess, ad tegreḍ sin iqejmar di lkanun, d izeɣran, ad rɣen. Kemm tekkerḍ a t-teţbibbiḍ akka alamma d timeqbert a t-id-teţţarraḍ.
Tekker teţbibbi-t f uzagur-is alamma d timeqbert ar t-id-ter s axxam a ţ-iwet s uceqquf n tmess s iḍarren-is, a s-yini:
— Eddm-it mazal yuli wass.
Ad tṛuḥ daɣen a t-tawi alamma d timeqbert-nni, a t-id-terr s axxam, daɣen a ţ-iwet, s uceqquf n tmess s iḍarren-is, yenna-yas:
— Eddm-it awi-t mazal yuli wass.
Armi ţţaqrib ad yali wass, yenna-yas:
— Abrid-a eǧǧ-it-in din, kemm uɣal-d ɣer da, neţţa teǧga-t-in waɣzen-nni di tmeqbert-nni, neţţat tuɣal-d s axxam, tɣill d ayen.
Akken d-tuɣal s axxam, yenna-yas:
— Niɣ waki i d Mḥend ur yeṛḥem. Xedmeɣ-am aya xedmeɣ-am aya, sebbleɣ ula d lwaldin-iw fell-am, terriḍ-iyi lxiṛ akk akka. D acu lemmer i kem-zliɣ ass-nni i baba, tili aql-iyi d ayen.
Neɣ mmar xdimeɣ akken xedmen yakʷ watmaten-iw, nekk sebbleɣ-d lwaldin-iw fell-am, kemm tgiḍ-iyi akka-aki, tesmenyafeḍ ad taɣeḍ waɣzen wala nekk.
Yekkr a s-d-yeččelliḥ seg weksum-is tteţţ, a-d-yeččelliḥ seg weksum-is tteţţ, armi d-yeqqim cwiṭ, yerẓa-ţ irkull, iḍeggr-iţ ar ddaw n wexxam yenna-yas:
— A ţ-ččen wuccanen.
Iṛuḥ yewwi-d tameṭṭut-nni i t-id-yeḥyan akken tugad Ṛebbi, yewwi-ţ-id, yerra-yas tabaqit, yexdem tameɣra sebɛ yyam u sebɛa lyali.