Bu tergin

Di tallit n zik, yella yiwen ugellid d tmeṭṭut-is ttemwatan ɣef wayen akk yellan gar-asen. Deg unebdu, ttɣimin yal ass sdat n tewwurt akken ad ṭṭfen abeḥri. Yal tameddit, yettɛedday-d sdat-sen yiwen urgaz, yettas-d seg umadaɣ yettawi-d ɣef yiri-s tizdemt n yesɣaren. Mi d-yewweḍ s axxam, ad tt-tessenz tmeṭṭut-is akken ad taɣ aɣrum ara ad ččen ass-n kan. Akken ass-a, akken azekka, ayen d-tewwi tifawt ad t-tečč tmeddit. Yiwen n wass yenna ugellid i tmeṭṭut-is : Argaz-a ulac deg-s. Wamma ad d-yaɣ zzayla akken ad d-yawi aṭas n yisɣaren ad yessenz, ad d-yawi aṭas n yidrimen.
Tamettut terra-yas : Axxam d argaz, i t-yessalayen, i t-iɣeṭṭlen d tameṭṭut.
Ruḥen akken, argaz yeqqar d tikti, tameṭṭut teqqar d tameṭṭut.
Tuɣal terfa, terwel teǧǧa agellid-nni tameddit n wass.
Akken yeɣli yiṭij, truḥ tmeṭṭut n ugellid s axxam n bu tergin, tewwet-as ɣef tewwurt.
Tenna-d tmeṭṭut : Anwa i d-yekkaten ɣef tewwurt ?
Terra-yas tmeṭṭut ugellid : Ldi-tt-in ttxilem, ur sɛiɣ anda ara ad rreɣ.
- Anṣuf a lalla, d acu i kem-id-yewwin ɣur-neɣ a tameṭṭut n ugellid ?
- Riɣ kan ad qqimeɣ cituḥ ɣur-wen ma triḍ.
Qqiment akken, armi a t-aya urgaz ikcem-d s tezdemt. Akken i d-iwala tameṭṭut n ugellid, yuggad, ammer ahat anda yecceḍ, ad teccetki neɣ ad asen-d-tini acimi.
Tluɛa-t tmeṭṭut-is : Tameṭṭut n ugellid tusa-d ad teqqim ɣur-neɣ.
Tamettut n bu tergin teddem tizdemt tewwi-tt tessenz-itt, tuɣ-d taḥbult n uɣrum.
Mi d-tewweḍ s axxam, tameṭṭut n ugellid teddem-itt, tebḍa-tt ɣef sin, tenna : Ass-a, ad nečč amur, azekka ad nečč wayeḍ.
Sɛeddan akken iḍ-nni, ur ẓrin d acu d-yewwin tagellidt ɣur-sen. Azekka-nni mi d-kkren, tagellidt tessared axxam, akken ad yizdig, tameṭṭut n bu tergin terfa, terwel teǧǧa axxam imi argaz-is ur s-yenni ara i tbeṛṛanit ad teffeɣ. Tagellidt teggra-d iman-is deg uxxam n bu tergin. Akken ad tesken i ugellid d akken d tameṭṭut i d lsas n uxxam. Mi d-tewweḍ tmeddit, argaz yessetḥa ad yeqqim d tberranit, maca tikti i s-d-tefka akken ad yejmeɛ idrimen yeɣli-yas ɣef wul, yis-s ad yejmeɛ adrim ! Yeqqim yid-s ussan, yettawi-d asɣar, qqimen akken kraḍ n wussan. Yiwen ur d-yesteqsa ɣef yidrimen armi d asmi i yessmed. Jemɛen uraɣ rnan tasusmi am akken kra ur yeḍri. Tenna-yas tgellidt :
- Ruḥ ad d-taɣeḍ ahwic, akken ad tesgunfuḍ ad yexdem fell-ak yernu ad tettawiḍ aṭas n tzedmin ara ad tessenzeḍ.
Argaz yuɣ-d aɣyul. Yiwen n wass mi igezzem asɣar deg umadaɣ, usan-d yirgazen steqsan-t ad asen-yessenz zzayla. Yerra-yasen : Arǧut ad d-ciwreɣ.
Iruḥ icawer-d, tenna-yas tameṭṭut tamaynut : Ssenz-it s leɣla, akken ad taɣeḍ aserdun.
Argaz yuɣal s amadaɣ, yessenz aɣyul, yewwi-d idrimen yuɣal-d s axxam. Azekka-nni, send ad yali wass, aɣyul yenzan yuɣald iman-is s axxam ideg yennum, acku widak-nni i t-yuɣen, d imakuren, ukren-d uraɣ d teẓẓruft, ɛebban-t ɣef uɣyul-nni, yiwen iɛus zzayla-nni deg umadaɣ, wayeḍ iruḥ ɣer taddart-nni, ad d-yawi ayen ara ad ččen. Winna iɛussen ahwic yenna i yiman-is : Mi d-yewweḍ s wayen ara ad ččeɣ, ad at-nɣeɣ ad awiɣ uraɣ iman-iw.
Winna iruḥen ad d-yawi učči, yenna : Ad as-geɣ ṛṛehj di tgella, akken ad at-yečč, deg ubrid ad yemmet, ad awiɣ uraɣ iman-iw.
Mmuten yirgazen i sin, aɣyul yeqqim iman-is armi yuɣal ɣer uxxam anda yennum, mi s d-ldin tawwurt muqlen s acwari yenneflen d uraɣ. Rnan kra n wussan, uɣen tamazirt sdat uxxam n ugllid.
Yelḥa zzman, gren-d ad ssalin axxam, lbeṛǧ am winna n ugellid, asmi t-fuken, ɛerḍen-d meṛṛa tagelda ɣer tmeɣra meqqren, agellid ǧǧan-t d aneggaru, i wakken ad as-d-tefk ttmeṭṭut-nni učči akken tennum deg uxxam-is. Yebda ugellid la itett, yenna-yas : Llah llah a Rebbi ! učči-agi am win i yi-d-tettnawal tmeṭṭut-inu iruḥen teǧǧa-yi acḥal aya.
Dinna, teffeɣ-d tmeṭṭut-nni, mwalan, yenna-yas ugellid : D kemm i yellan da ?!
Tebda tḥekku armi tfuk yenna-yas : Ass-a aql-ikem i d-iyi-rnan, seg wass-a d asawen ẓriɣ d tameṭṭut i d ajgu alemmas.
Seg wassen, uɣalen akken i llan, maca agellid yuɣal yettcawaṛ tameṭṭut.