Yir ideddicen qqazen ḥellun, yir lehdur qqazen rennun

ṣawḍen-d wat zik d akken yella yiwen wemɣar netta d temɣart-is, wesren ciṭuḥ, amɣar d netta i d-izedmen isɣaren i usewwi d useḥmu ula dɣa deg wussan d wuḍan n tegrest. Ma yella d tamɣart tlehhu-d s leqdic deg wexxam. Yiwen n wass amɣar yeɣli-d deg waṭṭan yeṭṭef usu. imir-nni yewwi-d ɣef temɣart akken ad d-tezdem nettat isɣaren. Mi tewweḍ ɣer teẓgi tebda tettqeddir, iwala-tt-id yizem, ifaq d akken ur tessin ara i ccɣel-a, yuẓ-d ɣur-s yulli-tt. yezdem-as-d yerna iwebba-tt-id ula d nettat alarmi d axxam. Tekcem s axxam-is imugr-itt-id wemɣar-is yenna-yas :

-dayen tuɣaleḍ-d yakan ! a-ta-n ur tɛeṭṭleḍ ara !

-ih, limer ad teẓreḍ ufiɣ izem di teẓgi, d netta i yi-d-izedmen, yerna ibubb-iyi-d nekk d tezdem n yesɣaren, acu kan « imi-s yesṭaɛṭiɛ ad as-tiniḍ d ljifa »

Izem yella ur ɛad iruḥ, kra temeslay, kra tenna temɣart, ɣef umeẓẓuɣ-is. iqerrḥ-it wul-is mačči d kra, mi yesla i wawal-nni « imi-s yettfuḥu »

Izem yekker iruḥ, yiwen n wass yemlal d temɣar-nni, yuẓ ɣur-s yenna-yas:

– Wwet-iyi-d s tqabact-nni-inem ɣer ger wallen, neɣ a kem-ččeɣ.
abrid amezwaru, tugi tenna-yas:
– Awwah amek ara k-wwteɣ, kečč txedmeḍ deg-i lxir nekk a k-wwteɣ s tqabact !
– Nniɣ-am wwet-iyi-d s tqabact-inem neɣ a kem-ččeɣ, awal d win i wumi tesliḍ.
tuɣal, segmi i t-twala yerfa, yeggul tuggad, tewwet-it s tqabact ɣer ger wallen ṭercen-d idamen d aṭerrec.
Yeqqim ayyur ur yekkir, asmi yeḥla, yiwen n wass mlalen tikkelt tayeḍ, yuẓ-d ɣur-s yenna-yas :

– Aha ziɣ wali ma yeḥla adeddic n wass i yi-tewwteḍ s tqabact ɣer ger wallen ?

– Yeḥla, yeḥla ur d-yegri ula d acemma.

Yerra-as-d yizem : « yir ideddicen qqazen ḥellun, yir lehdur qqazen rennun »