Ur d-terriḍ ur d-tufiḍ

Yella yiwen wergaz yeɣli-yas-d llzem ur yesɛi ara s wacu ara a t-imager, idda ɣer yiwen wemɣar awessar izedɣen iman-is. Yeɛna-t i wakken a s-d-yerḍel kra n yedrimen akken ad imager llzem-ines.
-Azul a lbaraka
-Azul. D acu k-id-yecqan?
-Aql-i yeɣli-yi-d llzem, ur sɛiɣ ara s wacu ara t-magreɣ.
-D ayagi kan! Ddu ɣer teḍwiqt-inna, teddmeḍ-d ayen teserriḍ.
-Xaṭi efk-iyi-d kečč.
-Nniɣ-ak ruḥ ad teddmeḍ ayen teserriḍ.
Argaz yemmeɣ ɣer tekwat, yeddem-d ayen iserra, yessenmer-it, idda ɣer iwezla-ines.
Zrin kra n wussan atah yuɣal-d yerra-yas-d lamana-ines, meḥsub ṭṭlaba-ines.
-Azul, aql-i rriɣ-ak-d lamana-inek, ax.
-Xaṭi ddu err-itt ɣer teḍwiqt, ansi i tt-id-teddmeḍ.
Argaz yuɣ-as awal, yerra-tt ɣer teḍwiqt.
Akken kan argaz yal mi ara yenkumer, ad iddu ɣer wamɣar awessar, yuɣal yuɣ tannumi, a d-yeddem iman-is, a ten-yerr iman-is. A d-yeddem si teḍwiqt, ad ten-yerr ɣer teḍwiqt.
Argaz yekcem-it cciṭan, yenna-yas:
-Argaz ur yettmwiwil ara seg wemḍiq-is, ur yeẓri ma rriɣ-ten-id, neɣ xaṭi.
Yegzem-itt di rray d akken tikkelt-agi ur ten-yettarra ara. Yexdem akken, ur ten-yerri ara ansi ten-id-yeddem. ddunit, am akken qqaren imezwura “tettezzi”; yuɣal yeṭṭef-it ẓẓelṭ, iruḥ am wakken yuɣ tannumi ɣer wemɣar awessar.
Yewweḍ yezul-it am yakan, yessuter deg wemɣar akken ad as-yerḍel.
-Ddu ɣer teḍwiqt a d-teddmeḍ.
Idda wergaz ɣer teḍwiqt a d-yeddem, yemmeɣ yuɣal-d ufus-is d ilem ur yufi acemma.
-Atah ulac!
-ur d-terriḍ ur d-tufiḍ! Lemmer d-terriḍ yili a d-tafeḍ.