Yelli-s n bu-tergin_La fille du charbonnier
I wakken a ten-iɛic, izeddem-d isɣaren, ixeddem tirgin : mi yezenz tirgin-nni, ad yawi lqut i warraw-is.
Yessi-s-nni, setta n tmeqranin ttzuxxunt, ttɣunfunt baba-tsent imi yettuɣal d aberkan ger tergin, ma d tamejṭuḥt-nni, meskint, tfehhem aṭas ; ccɣel akk yumsen, d nettat i t-ixeddmen. Mi ad d-yas baba-s, a s-tekks icifaḍ, a s-tekkes leḥwayǧ-is, a ten-tessired degg-iḍ i wakken ad kkawen i wzekka-nni tanzayt. Dɣa qqarent-as issetma-s m-tɣiɣdin.
Yiwen n wass, yekker ugellid iberreḥ-d i taddart. Armi d-wwḍen ar tejmaɛt, yenna-yasen :
- ay at taddart, sɛiɣ ttejṛa, deg-s ṭnac ifurkan ; yal afurek, deg-s tlatin tciṭṭwin ; myal taciṭṭa, deg-s xemsa iɛeqayen. Ass yecban ass-a, a t-id-ssefrum neɣ a wen-gezmeɣ yakk iqerra.
Dɣa ṛuḥen, myal-wa iṛuḥ s axxam-is.
Qellben meṛṛa, ur ufin ara. Asmi mazal yiwen n wass, azekka-nni, a sen-yegzem iqerra: la yettru bu-tergin-nni, meskin, yenna-yas ; wi ara iɛicen arraw-iw?
Tṛuḥ ɣur-s teqcict-nni tamejṭuḥt, tenna-yas:
- acu k-yuɣen, a baba ? Yenna-yas :
- a yelli, ur iyi-yuɣ wara. Tenna-yas :
- a baba, ttxil-k, in-iyi-d. Yenna-yas :
- a yelli ihi, yenna-yaɣ-d ugellid awal a t-id-nessefru, ma ulac a ɣ-yegzem iqerra.., Tenna-yas :
- d aya? Yeshel: in-as : ttejṛa d aseggas ; ifurkan d agguren ; ticiṭṭwin d ussan; iɛeqayen d tiẓilla.
Ṛuḥen, azekka-nni, mi d-iberreḥ, myal wa yenna-d ayen yessen. Yenna-yasen yakk ugellid: mačči d wa.
Ineṭq-d winna, yenna-yas :
- ay agellid, ttejṛa d aseggas; ifurkan d agguren ; ticiṭṭwin d ussan ; iɛeqayen d tiẓilla.
Yenna-yas :
- tufiṭ-tt.
Dɣa, ur asen-yegzim ara iqerra. Ṛuḥen. agellid yenna-yas i wergaz-nni :
- ad d-inid wi k-d-yennan akka , ma ulac a k-gezmeɣ aqerru. Yenna-yas :
- a mmi, ihi d yelli. Yenna-yas :
- ihi, yelli-k-agi, ad tt-aɣeɣ. Yenna-yas;
- a mmi, mejṭuḥet tagi i yi-t-id-yennan ... Yernu ur tettnasabeḍ ara bu-tergin ... Ṛuḥ di cceɣl-ik.
Yenna-yas :
- nniɣ-ak ad tt-aɣeɣ, ad tt-aɣeɣ. Yenna-yas :
- ihi, ḍebbeṛ aqerruy-ik.
Dɣa agellid iṛuḥ ; bu-tergin-nni daɣ-nni iṛuḥ s axxam-is. Akken yewweḍ, iɛudd d tikerkas : ur d-iɛawed ara deg wexxam.
Ass wi-s tlata, agellid yewwi-d ixeddamen-is, yezla ikerri, inawel seksu, yerna xemsa n litrat n wudi, iɛebba-ten f userdun, yenna-yasen i ixeddamen-is:
- awi-t lqut-agi i wen-fkiɣ i bu-tergin : ad teẓrem yelli-s, ma telha, ad t-aɣeɣ. d acu, mi ara d-ṛuḥem, inet-as a ken-id-ceggeɛ ɣer-i, yernu yakk ayen tehdeṛ din i kunwi, cfut fell-as : a yi-ten-id-ɛiwdem mi ara d-awḍem.
Nnan-as:
- ihayen.
Dɣa ṛuḥen. Akken wwḍen, ufan-n anagar taqcict-nni yakk d yessetma-s deg wexxam. Tenna-yasen ;
- acu ken-id yewwin? Nnan-as :
- nṛuḥ-d a kem-nẓer ; a kem-yaɣ ugellid.
Tenna-yasen :
- anṣuf yis-wen : qqimet. Nnan-as ;
- i yemma-m ? Tenna-yasen:
- tṛuḥ ad tẓer werǧin teẓri. Nnan-as :
- i baba-m? Tenna-yasen :
- iṛuḥ ad yerr aman deg wiyaḍ. Nnan-as :
- i watmaten-im ? Tenna-yasen;
- ṛuḥen ad wten medden, a ten-wten.
Dɣa qqimen. Armi tedla lqut-nni i s-d-wwin, tufa sneɣsen seksu, sneɣsen aksum. Tekker teddm-d a-yaziḍ, tezla-t, a sen-tewqem imensi,
armi d-wwḍen imawlan-is, nnan as :
- d acu ken-id-yewwin ? Niɣ d lxiṛ ?
Nnan-as :
- d lxiṛ. Nṛuḥ-d anẓer taqcict-nwen, ad tt-yaɣ ugellid. Nnan-asen :
- anṣuf yis-wen.
Armi d lweqt n imensi, qqimen, teddm-d ayaziḍ-nni a t-tebḍu, tefka aqerru i baba-s ; tefka afriwen i yessetma-s ; atmaten is, tefka-yasen tidmert ; yemma-s, tefka-yas taɛrurt ; ixeddamen-nni, tefka-yasen iḍarren.
Armi d azekka-nni tanzayt, kkren-d ixeddamen-nni ad ṛuḥen. Tenna-yasen :
- init-as i ugellid : itran neɣsen deg iyenni ; aman neɣsen di lebḥeṛ ; anẓaḍ yenɣes di tsekkurt ...
Ṛuḥen. Akken wwḍen, yenna-yasen ugellid :
- acu twalam? Tɛeǧb-iken ? Nnan-as:
- d taqcict d tamejṭuḥt ; yernu mačči am medden i theddeṛ. Yenna-yasen :
- acu yakk i wen-d-nna ? Nnan-as ;
- mi newweḍ, nenna-yas : sani tṛuḥ yemma-m? Tenna-yaɣ-d : tṛuḥ ad tẓer ayen werǧin teẓri.
Yenna-yasen :
- ihi tṛuḥ ad tẓer llufan d-ilulen, a s-tegzem imiḍ. Nnan-as :
- nenna-yas : sani iṛuḥ baba-m? Tenna-yaɣ-d: iṛuḥ ad yerr aman deg waman. Yenna-yasen :
- a tarwa, iṛuḥ ad yexdem tassirt. Nnan as :
- nenna-yas : sani ṛuḥen watmaten-im? Tenna-yaɣ-d: ṛuḥen ad wten medden a ten-wten. Yenna-yasen :
- a tarwa, ṛuḥen ad uraren tiqqar.
Nnan-as :
- i ymensi, tezla-yaɣ ayaziḍ : tefka-yaɣ iqejjiṛen ; baba-s, tefka-yas aqerru ; atmaten-is, tefka-yasen tidmert ; yemma-s, tefka-yas taɛrurt ; yessetma-s, tefka-yasent afriwen ; ma d nettat, ur teddim ara.
Yenna-yasen :
- a tarwa, kunwi d iḍarren : d iḍarren i ken-yewwin, ara ken-id yerren. Baba-s d aqerru n wexxam. Atmaten-is ad uɣalen d tadmert n wexxam. Yessetma-s, d afriwen: ad jewǧent yakk, ad afgent.
Yenna-yasen :
- acu wen d-nna mi tekkrem a d-ṛuḥem?
Nnan-as :
- la k-teqqar : itran neɣsen deg iyenni ; aman neɣsen di lebḥeṛ ; anẓaḍ yenɣes di tsekkurt ...
Yenna-yasen :
- ihi, tukrem seksu deg webrid, tukrem aksum; tukrem udi !
Dɣa ṛuḥen s axxam-nsen. agellid yerna kra n wussan, yewqem tameɣra, yewwi-d taqcict-nni d tislit.
Armi d-wweḍ, rnan kra n wussan, yenna-yas :
-d acu kemmini atan tḥeṛceḍ : asmi ara d-yekk wawal-im nnig wagi-inu, ddem ayen ɛzizen fell-am g wexxam, tṛuḥeḍ. Tenna-yas :
- ihayen.
Armi d yiwen n wass, yusa-d ɣur-sen yiwen wergaz yegr-it-id webrid, yewwi-d yid-s ajḥiḥ, yenna-yas :
- ay agellid, ssens-iyi ar tanzayt.
Yenna-yas :
- eyya.
Yewwi-t ɣer kra n texxamt ; yewwi-yas imensi ; ma d ajḥiḥ-nni, yenna-yas :
- awi-d, a t-awiɣ, a t-qqneɣ deg udaynin ar tanzayt. Yenna-yas :
- aha, awi-t,
netta, agellid, ka yekka yiḍ, yesselmad ajḥiḥ-nni i tserdunt-is. Armi d azekka-nni tanzayt, yekkr-d wergaz-nni ad iṛuḥ, yenna-yas :
- fk-iyi-d, ay agellid, ajḥiḥ-iw.
Yenna-yas :
- ɛni tewwiḍ-iyi-d kra n wejḥiḥ ?... Nekkini, a mmi , sɛiɣ ajḥiḥ : d mmi-s n tserdunt-iw.
Yenna-yas wergaz-nni :
- a mmi, inu! Yenna-yas ugellid:
- eyya, ad nemcaṛeɛ ɣur at taddart,
iberreḥ-d i taddart, yenna-yasen :
- amexluq-agi, ssenseɣ-t iḍeli, tura la yeqqar: mmi-s n tserdunt-iw d ajḥiḥ-is! Tura a d nebru i-tserdunt yak d-wejḥiḥ : ma yeḍfer wejḥiḥ argaz-agi, a t-yawi ; ma yeḍfer taserdunt-iw, inu.
Argaz-nni, meskin, yeẓra zik yeṭṭafar-it wejḥiḥ-is, yenna-yas : aha !
Yebra-yas-d ugellid. Akken d-wwḍen ɣer tejmaɛt, ajḥiḥ yeḍfer taserdunt. Nnan-as yakk at tejmaɛt:
- tusiḍ-d ad takreḍ : ajḥiḥ yeḍfer taserdunt: tin i d yemma-s.
Dɣa argaz-nni, meskin, iṛuḥ ar yettru. Yugi ad ifaṛeq tajmaɛt-nni imi ur yewwi ara ajḥiḥ-is.
Iṛuḥ ɣer ddaw lbeṛǧ n ugellid : yeqqim i yiṭij, ar yettru. Tḍall-d tmeṭṭut-is si ṭṭaq, tenna-yas :
- acu k-yuɣen, ay argaz-inna ? Yenna-yas :
- ah ... Buh ! Nsiɣ iḍelli di lbeṛǧ-agi n ugellid, wwiɣ-d ajḥiḥ : yekks-iyi-t, la yeqqar : d mmi-s n tserdunt-iw ! Tenna-yas :
- a taqriḥt-ik! Niɣ "asmi ara tesɛu tserdunt mmi-s, ad tenger ddunnit" ... sel-d : ad ak mleɣ akken ara txedmedḍ. Atan ass-agi, agellid, d uzgen n wass, ad iberreḥ i taddart, a sen-yini ; ẓẓiɣ taɣzut n ibawen ɣef yiri n wasif, ffeɣen-d iselman, eččan-yi-t. At taddart d iɛeggunen, a s-inin : ay agellid, a sen-nandi? A sen-yini : ṭṭfet-tten-id : a sen-negzem aqerru : niɣ asmi ara d-yeffeɣ islem deg waman, ad tenger ddunnit. Kečči-ni, in-as-d : fiḥel ma tekkesḍ-asen aqerru: fell-ak ilemden : niɣ, ula d taserdunt, asmi ara d-sɛu mmi-s, ad tenger ddunnit. Sakin ad yenneḥcam, a k-d-yefk ajḥiḥ-ik.
Iṛuḥ wergaz-nni, yeqqim di tejmaɛt, armi d-i-berreḥ ugellid, yenna-yasen :
- ay at taddart, ẓẓiɣ taɣzut n ibawen ɣef yiri n wasif : ffeɣen-d iselman, eččan-yi-t. Ssefrut-iyi-t-id! Tura d acu ara s nexdem?
Lemmer ḥṛicen, a s-inin : niɣ islem ur iteffeɣ ara deg waman, ma ulac ad yemmet. Imi d iɛeggunen, neṭqen-d kra n at taddart, nnan-as :
- ay agellid, a s-nandi? Yenna-yasen:
- ṭṭffet-tten-id, a sen-negzem aqerru : niɣ islem, asmi ara d-yeffeɣ deg waman, ad tenger ddunnit.
Ineṭq-d wergaz-nni, yenna-yas :
- fiḥel ma tekkesḍ-asen aqerru . ɣer-k i ɛunden: niɣ, ula d taserdunt, asmi ara d-sɛu mmi-s, ad tenger ddunnit.
Dɣa yenneḥcam ugellid : iṛuḥ-d s axxam, yewwi-d ajḥiḥ, yefka-t i bab-is.
Yeqqim ar yettxemmim : yenna-yas : welleh, ar d tameṭṭut-iw i s-d-yennan i wergaz-agi : ur yezmir yiwen ad yaf taqsiṭ-a.
Yuɣal-d s axxam, yenna-yas i tmeṭṭut-is :
- niɣ nniɣ-am asmi ara d-yekk wawal-im nnig wagi-inu ad tṛuḥeḍ? Tenna-yas :
- a win, d ameɣbun : iɣaḍ-iyi : tkkesḍ-as ajḥiḥ-is! Yenna-yas :
- nniɣ-am, ddem ayen ɛzizen fell-am deg wexxam, tṛuḥeḍ. Ad ddun yid-m ixeddamen. Tenna-yas :
- di leɛnaya-k, ar d-nečč imekli.
Yenna-yas :
- aha ...
Armi d-sers lqut, tweqm-as-d ssikṛan : akken kan yečča, ur yeẓri anda yedda.
Nettat teddem-d afniq, terra-t ɣer daxel-is, tsekkeṛ fell-as tawwurt ; tessawl i ixeddamen-is, ɛebban afniq-nni f userdun, terkeb, ṛuḥen.
Akken tewweḍ, tsers afniq-nni ɣer lqaɛa ; i xeddamen-nni ṛuḥen. Nettat teqqen aserdun; tessa-d deg wexxam. Teddem-d agellid, terra-t s usu. Teḥka-yasen i imawlan-is, qqimen.
Almi d tameddit, yuki-d ugellid:
- a tameṭṭut... Acu yi-d-yewwin ɣer da ?
Tenna-yas :
- niɣ tenniḍ-iyi : awi ayen ɛzizen fell-am deg wexxam? Nekk, ur tesɛiḍ d acu i yeɛzizen fell-i anagar kečč.
Yenna-yas :
- kker ad nṛuḥ : kemm d agellid : nekk d lewzir ddaw-am.
Uɣalen s axxam-nsen ; gan ddunnit,
tamacahutt-iw, wwiɣ-tt-id lwad-lwad ;
I warraw n leǧwad.
Nekkni, ad aɣ-yeɛfu ṛebbi ;
uccanen, a ten-yeqqed ṛebbi !