Mḥend-lebɣel_Mohand le mulet
Almi d yiwen n wass g wussan n ṛebbi, yewweḍ-d lexbaṛ baba-s : ɛeṛfa, ḥebsen-tt 7 leṣwaṛ,
yiwen n wass deg wussan n ṛebbi, yeǧǧa-d aqcic, yeqqel yerna-d wayeḍ ; alarmi setta warrac ara tturaren almi meqqrit.
Yemmeɣ yiwen iwet mmi-s n temɣart. Tṛuḥ-d temɣart-nni ɣur-s, tenna-yas :
- acu ɣef ara tewteḍ mmi? Yenna-yas:
- akken. Tenna-yas :
- ur teseḍḥid ara, weltma-k yewwi-tt waɣzen !
Dɣa iṛuḥ-d ɣer yemma-s : tenna-yas-d :
- d tidett.
Yenna-yasen i watmaten-is, wwin aɛwin, rnan lfuciwat, ṛuḥen ad d-awin ɛeṛfa, weltmat-sen.
Ufan ameksa n umaɛiz, nnan-as :
- wi k-ilan, ay ameksa ? Yenna-yasen :
- nekk d ameksa n ɛeṛfa, 7 leṣwaṛ zzin-as,
ḥedd ma yekks-itt-id. Nnan-as :
- d acu ara tt-yekksen?
Yenna-yasen umeksa-nni n ɛeṛfa :
- win yesseɣlin aqelwac-inna.
Yemmeɣ a t-yesseɣli yiwen: ur yezmir ara. Yenna-yas :
- uɣal, a mmi, uɣal : ur tezmirt ara a d-tekkseḍ ɛeṛfa.
Ṛuḥen. Ufan ameksa n wakraren, nnan-as :
- wi k-llan, ay ameksa ? Yenna-yasen :
- nekk d ameksa n ɛeṛfa, deg i d-qqaren 7 leṣwaṛ zzin-as, yiwen ma yekks-itt-id.
Yenna-yas gma-s-nni n ɛeṛfa :
- d acu ara tt-id-yekksen? Yenna-yas :
- win yesseɣlin ikerri-yinna, a t-yečč iman-is. Yemmeɣ iɛedda ɣur-s : iberrz-it-id ikerri-ini, yesseɣli-t-id. Yenna-yas :
- ṛuḥ : ur tezmireḍ ara, a mmi, ṛuḥ.
Ṛuḥen : ufan ameksa ubeqri. Nnan-as :
- wi k-ilan, ay ameksa ? Yenna-yasen-d :
- nekk d ameksa n ɛeṛfa, g wedrar i g iqqaren 7 leṣwaṛ zzin-as, yiwen ur tt-id-itekkes.
Nnan-as watmaten-nni n ɛeṛfa :
- d acu ara tt-id-yekksen ?
Yenna-yasen-d umeksa :
- win yesseɣlin azger-inna ara tt-id-yekksen. Yemmeɣ a t-yesseɣli yiwen, ur yezmir ara.
Yenna-yasen :
- ṛuḥet : ur tezmirm ara, ṛuḥet. Ṛuḥen : ufan ameksa uɛawdiw : nnan-as :
- wi k-ilan, ay ameksa ?
Yenna-yasen d umeksa i watmaten n ɛeṛfa :
- nekk d ameksa n ɛeṛfa, g wedrar i g iqqaren 7 leṣwaṛ zzin-as, yiwen ma yekks-itt-id,
nnan-as watmaten-nni n ɛeṛfa ;
- acu ara tt-id yekksen? Yenna-yasen :
- win ara yrekben aɛawdiw-inna, a t-yeṛdeḥ, yemmeɣ yiwen a t-yerkeb : ur yezmir ara. Yenna-yasen :
- ṛuḥet, ṛuḥet : ur tezmirem ara, ṛuḥet.
Ṛuḥen, leḥḥun, leḥḥun, leḥḥun, ufan abeḥḥar n ddellaɛ, nnan-as :
- wi k-ilan, ay abeḥḥar? Yenna-yasen :
- nekk d abeḥḥar n ɛeṛfa, g wedrar i g iqqaren 7 leṣwaṛ zzin-as, yiwen ma yekks-itt-id.
Nnan-as :
- d acu ara tt-id yekksen? Yenna-yasen :
- win ara yeččen tadellaɛt-inna iweznen aqenṭar a tt-id-yekkes, neɣ ma ulac ma ur tt-yečči ara, ur tt-id-itekks ara.
Yemmeɣ yiwen yegzem afjuṛ : ur yečči ara azgen-is. Yenna-yas :
- ṛuḥ kan, uɣal : ur d-ttawiḍ ara keččini,
ṛuḥen, wwḍen almi d axxam n ɛeṛfa. Bedden din-na g setta yid-sen. Almi ten-id-xzeṛ ɛeṛfa, tluɛa-ten-id, tenna-yasen :
- annaɣ, a tarwa, kunwi ibedden din-na, argaz-iw d awaɣezniw : a ken-id-yaf, yečč-iken, yečč tamurt ɣef tetteddum! Dɣa nnan as :
- akken yebɣa ṛebbi ad iɛeddi.
Testeqsa-ten-id ɛeṛfa :
- wi ken-ilan, a tarwa ? Nnan-as:
- d arraw n ugellid n tmurt n leflani u flan» ,
tenna-yasen :
- ihi, kunwi d atmaten-iw. Tura, lemmer ur d-ṛuḥem ara, akkenni ay axiṛ ; imi d-ṛuḥem, ayen iḥudd ṛebbi ad yeḍru. Tenna-yasen : ṛuḥet ɣer uddyanin tura, ad tteqqimem din : netta ad d-iṛuḥ: ṛṛcac, lehwa, timeqqit, aḍu, ṛṛɛud, lebṛaq, u yerna ad d-iɛebbi ɣef tayett-is taslett iweznen xemsin uqenṭar, yerna s iẓuran-is. Ad yerr fell-awen sslam : sellmet fell-as.
Ṛuḥen ɣer uddaynin, qqimen dinna. Almi d-iɛedda, ibubb-d taslett s iẓuran-is. Yexzeṛ ɣer deffir, iwala-d setta-nni, yenna-yasen:
- acu ken-id-yewwin ɣer da ?
Yenna-yas yiwen :
- nṛuḥ-d ɣer weltma-tneɣ. Yenna-yasen :
- anṣuf yiss-wen!
Yewwi-ten-id s axxam, msalamen nutni d-weltma-tsen. Tweqm-asen-d tmanya kilu n uwren d seksu. Ur ten-fukken ara setta-nni watmaten-is. Awaɣzen-nni yenna-yas i ɛeṛfa :
- weqm-iyi-d tanalt.
Temmeɣ tweqm-as-d 7 tẓiwwin n seksu, myal taẓiwwa deg-s xemsa u ɛecrin kilu, 7 imeslax, 7 iyeddiden n waman, myal ayeddid deg-s xemsa u ɛecrin llitrat ; terna-yas-d ṭṭneǧṛa n lqahwa,
g xemsa ddqayeq, yečča-ten yakk.
Dɣa wehmen setta-nni. Yenna-yas yiwen i wayeḍ :
- yewqem ! Nekkni g setta yid-neɣ ur nfukk ara tmanya kilu, netta iman-is yečča akk ddunnit-agi!... Lḥaw kan ad nuɣalet meskud akka meslumit.
Ineṭq-d wayeḍ, yenna-yasen :
- setta lfuciwat i yellan ɣur-neɣ : welleh, ur nṛuḥ anagar ma newwi ɛeṛfa !
Almi d azekka-nni tanzayt, yenna-yas ameqran deg-sen :
- ay awaɣzen, tura a ɣ-d-efkeḍ weltma-t-neɣ a tt-nawi ad tẓer baba-s d yemma-s : ad teqqim 15 n wussan, a tt-id nerr.
Yenna-yasen :
- xaṭi! Yenna-yas : ma ḥwaǧen-tt, a d-ṛuḥen ɣer da.
Yemmeɣ yenna-yas :
- ihi, ad newqem lgirra. Yenna-yas :
- ad tweqmem lgirra yid-i ?
Yemmeɣ yeṭṭf-iten akk g yiwen n ufus ; yeɣz-asen tasraft, yerra fell-asen tablaṭ ur tt-reffeden ara 40 ilemẓien. Dɣa weltma-tsen-nni tewqem aṭiṭuc ɣef yixef n teblaṭ-nni, tettak-asen lqut ɣer daxel.
Tameṭṭut n ugellid-nni terfed tadist, teǧǧa-d yiwen n weqcic, tsemma-yas mḥend-lebɣel. Imir-n kan yečča 10 kilu n weɣrum. Asmi wwḍen fell-as 3 n wayyuren d 10 n wussan, yečča aqenṭar. Netta g leɛli kan. Ilul-d netta d uɛawdiw-is.
Almi d yiwen n wass, nnan-as at taddart-nni :
- win ara ɣ-d yessufɣen mmi-s n ugellid, a t-neɣnu, ma yeɣna-t ṛebbi,
tenna-yas jidda-s :
- d nekk !
Temmeɣ tessufɣ-it-id. Iṛuḥ ɣer uddaynin ; aɛawdiw kan imi d-yebra, ad yerkeb fell-as, a t-yerẓ g weɛrur. Yenna-yas i baba-s :
- anida yella uɛawdiw-iw? Dɣa yenna-yas :
- atan g uddaynin-yinna n wadda.
Yewwi-d aɛawdiw-is, irekb-it. Almi d yiwen n wass, yenna-yas i yemma-s :
- a yenna, anagar nekkini iman-iw i tesɛiḍ? i watmaten-iw nniḍen? Tenna-yas :
- a mmi, atmaten-ik, g wasmi ṛuḥen ad d-awin ɛeṛfa ɣer uwaɣzen, tura atan ur d-uɣalen ara : ɛni yečča-ten. Yenna-yas :
- yah! Sɛiɣ atmaten-iw? G setta lakk d ɛeṛfa ?
Tenna-yas :
- s tidett, a mmi, ɛeṛfa, yewwi-tt uwaɣzen ; atmaten-ik, ahat yečča-ten.
Iṛuḥ ɣer uḥeddad, yenna-yas :
- f acḥal a yi-txedmeḍ adebbuz ? Yenna-yas :
- a k-t-xedmeɣ ɣef 3 n wagguren.
Yenna-yas :
- ah ! Bezzaf ! Yenna-yas wayeḍ :
- a k-t-xedmeɣ ɣef 15 n wussan.
Yenna-yas :
- xedm-it. Yenna-yas : d acu, a s-tweqmeḍ 100 d 50 kilu n wuzzal. Yenna-yas : a yi-ternuḍ llqabsa n ccemma : a s-tweqmeḍ aqenṭar n wuzzal.
Almi wwḍen 15 n wussan, weǧden-d leḥwayeǧ-is. Yerkeb ɣef uɛawdiw-is, yerra lqabsa n ccemma g lǧib-is. Taɛekkazt-is, yessers-itt s dat-s s ufella uɛawdiw, iṛuḥ.
Yufa ameksa n umaɛiz :
- wi k-ilan, ay ameksa ?
- Nekk d ameksa n ɛeṛfa, g wedrar i g iqqaren 7 leṣwaṛ zzin-as, yiwen ma yekks-tt-id.
Yenna-yas :
- d acu ara tt-id-yekksen ? Yenna-yas :
- win yeččan aqelwac-inna.
Yemmeɣ kan, s yiwen n ufus iselx-it, yečča-t akken d azegzaw. Yenna-yas :
- ṛuḥ : a tt-id-awiḍ, ṛuḥ.
Iṛuḥ : yufa ameksa n wakraren : diɣen ixedm-as akken : yečča-t. Yenna-yas :
- ṛuḥ : a tt-id-awiḍ.
Alarmi d ddellaɛ : yečča tadellaɛt-nni irkel, yerna tayeḍ, yenna-yas :
- ur ṛwiɣ ara. Yenna-yas :
- beṛka-k. Kečč terniḍ awaɣzen : ṛuḥ, a tt-id-awid.
Yewweḍ almi d amkan-nni ig ibedden watmaten-is. Twala-t-id g ṭṭaq ɛeṛfa :
- acu-k, a wahin? Yenna-yas :
- d amdan. Tenna-yas :
- annaɣ, a mmi, argaz-iw d awaɣezniw : ma yufa-k-id, a k-yečč, yečč tamurt ɣef tetttedduḍ.
Yenna-yas :
- ayen yura ṛebbi ad yezri. Testeqsa-t-id :
- wi k-ilan? Yenna-yas :
- d mmi-s n ugellid n tmurt n leflani u flan. Tenna-yas :
- annaɣ, a gma, argaz-iw d awaɣezniw : a k-yečč, yečč tamurt f tettedduḍ. Setta watmaten-ik, keččini d bu-7, nekkini d ti-s-tmanya. Yenna-yas:
- nekkini begseɣ-d ɣef yiman-iw. Tenna-yas:
- ihi, ṛuḥ ɣer uddaynin-inna : a taya a d-iɛeddi : ṛṛcac, tagut, timeqqit, lebṛaq, aḍu ; a d-yawi ttejṛa ɣef tuyat-is, s iẓuran, tewzen xemsin qenṭar,
- ur ttṛuḥuɣ ara ɣer uddaynin. Netta yewwi-d taslett n xemsin qenṭar. Yenna-yas : nekkini, a d-awiɣ tlata tselnin n meyya u xemsin qenṭar. Yenna-yas: dagi ara bbɛuẓẓleɣ.
Yenna-yas i ɛeṛfa :
- ers-d.
Temmeɣ ters-d, tessew-as-d xemsa u ṛebɛin llitrat n lqahwa, terna-yas-d sin iqenṭaren n weɣrum: yečča-ten iman-is weqbel ad d-iṛuḥ uwaɣzen.
Almi d-yewweḍ uwaɣezniw, yenna-yas :
- d acu-k, a wa? Yenna-yas :
- d acu k-yuɣen ? Ur iyi-teɛqilḍ ara ? Nekkini d aḍeggal-ik. Yenna-yas :
- anṣuf. Yenna-yas :
- awer k-iɛuzz ṛebbi, yenna-yas :
- wah ay aḍeggal, acuɣer akka terfiḍ?
Yenna-yas :
- yenɣa-yi laẓ. Yenna-yas : tweqm-iyi-d ɛeṛfa xemsa u ṛebɛin llitrat n lqahwa, sin iqenṭaren n weɣrum : d ulac. Yenna-yas :
- teččiḍ akk annect-agi, ay aḍeggal? Nekk tetteɣ ɛecrin llitrat n lqahwa, tmanyin kilu n weɣrum.
Almi d tameddit, yenna-yas:
- ay aḍeggal, ass-agi nekk id-k, ad as-iniɣ i ɛeṛfa ad aɣ-d-wqem ṛbeɛṭac n tẓiwwin n seksu, ṛbeɛṭac iyeddiden n waman, ɛecrin imeslax, meyya llitrat n lqahwa. Yenna-yas : nekk id-k, win yeččan irkel wigi yewweḍ d lefḥel.
Yenna-ya uwaɣzen :
- a mmi, ur s-tezmirt ara. Ula d nekk, ur s-zmirɣ ara. Yenna-yas mḥend-lebɣel :
- mačči d cceɣl-ik. Yenna-yas :
- tedda!
Almi d-rsen irkel tameddit, yemmeɣ yenna-yas uwaɣzen :
- aha, ečč keččini, a mḥend-lebɣel.
Yenna-yas :
- ad tṛuḥeḍ ad zziḍ i wexxam, ur tettawḍeḍ ara s axxam anagar ma tufiḍ-ten irkel eččiɣ-ten.
Yemmeɣ ad yezzi i wexxam. Ur ɛad d-yewwiḍ, yufa-t-id fukekn akk, mmeččen. Dɣa yewhem uwaɣzen-nni. Yenna-yas :
- ay awaɣzen! Yenna-yas : i watmaten-iw ?...
Yenna-yas :
- atmaten-ik, rriɣ-ten ɣer tesraft-inna.
- Acu k-xedmen? Yenna-yas-d uwaɣzen:
- a mmi, a mḥend-lebɣel, nnan-iyi-d ad nawi ɛeṛfa, ad tiẓer baba-s lakk d yemma-s. Ugiɣ-asen; nniɣ-asen : ma yehwa-yasen i baba-s d yenma-s a d-ṛuḥen, a tt-ẓren dagi. Yenna-yas :
- tḍelmeḍ, ay awaɣzen : nekk id-k d lgirra.
Yenna-yas :
- ur k-zmireɣ ara, a mḥend-lebɣel.
Yemmeɣ yeddm-d adebbuz-nni-ines, yewt-it, i ḍerḥ-it mebɛid. Iṛuḥ ɣer teblaṭ-nni, irefd-itt, yekks-d atmaten-is. Iɛebba-d akk lqecc uwaɣezniw-nni, yewwi tamurt-nni-ines diɣen.
Yuɣal ɣer tmurt n baba-s ; weqmen tameɣra 7 n wussan d 7 n uḍan.
Almi d yiwen n wass, yenna-yas mḥend-lebɣel :
- nekkini, ad ṛuḥeɣ ɣer lḥiǧǧ.
Iṛuḥ ɣer lḥiǧǧ : yewwi aɛawdiw-is, yerna adebbuz, iṛuḥ. Yufa asif iḥeml-d. Yufa-n yiwen wergaz yewqem aqejjiṛ-is d tiqenṭert. Yewhem mḥend-lebɣel. Yenna-yas wergaz-nni :
- a mmi, ur xelleɛ ara... Lemmer ad teẓreḍ mḥend lebɣel! Ḥekkun fell-as ! Yenna-yas :
- d nekk i d mḥend-lebɣel.
Yemmeɣ izeggr-it. Yenna-yas :
- ad dduɣ yid-k.
Ar a d-leḥḥun, ar a d-leḥḥun, ar a d-leḥḥun ... Yufa-d mḥend-lebɣel yiwen n wemɣar, ačamar-is annect-ila-t. Ttqeggilett ddaw-as ɛceṛ-meyya tɛewzin n lmal. Yewhem mḥend-lebɣel. Yenna-yas wemɣar-nni :
- ur wehhem ara ... Lemmer ad tteẓreḍ mḥend-lebɣel! Ḥekkun fell-as! Yenna-yas :
- ihi, d nekk i d mḥend-lebɣel. Yenna-yas :
- ihi, ad neddukkel.
Ṛuḥen deg tlata yid-sen : bu-qejjiṛ, bu-tčamart lakk d mḥend-lebɣel.
Wwḍen ɣef yiwet n teẓgi, walan yiwen wexxam g tlemmast. Yenna-yas :
- qqimet tura dagi : ad awḍeɣ ad ẓreɣ d acu-ten widak. Ma d amdan, dɣa kif-kif ; ma d lweḥc, dɣa kif-kif.
Almi d yewweḍ ɣer dinna mḥend-lebɣel, yufa 7 n iwaɣezniwen. Yuɣal-d, yenna-yas :
- lḥaw, ad nṛuḥet ɣer dinna.
Ar d tameddit, kecmen g imi n tewwurt, dɣa yenna-yasen-d uwaɣzen-nni amɣar :
- anṣuf yiss-wen.
Eččan imensi. Almi deg yiḍ-nni, bu-qejjiṛ yeṭṭes, la ydux werǧin idux. Mḥend-lebɣel ur yeṭṭis ara: yessummet adebbuz-is.
Almi izeggen yiḍ, yesla-yas i yiwen n uwaɣzen iheddeṛ netta d gma-s, yenna-yas :
- bu-qejjiṛ-inna, ad ntett deg-s aseggas, ur yettfakka ara. Yenna-yas :
- bu-tčamart diɣen akken. Yenna-yas : ma d mḥend lebɣel, yeččuṛ d tasemt.
Yesla-yasen d mḥend-lebɣel : dɣa yekker kan imir, yeddm-d adebbuz-nni, yejbed, yejbed, yejbed, yejbed ... Alarmi yenɣa 7.
Yeqqim yiwen, d amejṭuḥ, d wi-s-tmanya , yerwel. Yessaki imir-n bu-čamar lakk d bu-qejjiṛ ;
- kkret, yeḥṛeq lwaldin-kum : teṭṭsem, dux, dux, dux, dux werǧin idux !
Dɣa yeṭṭef kan g učamar-is, yeqqar-as :
- dux werǧin idux ! Dux werǧin idux!
Dɣa yekkat aqerruy-nni n bu-tčamart ɣer uqerruy n bu-qejjiṛ. Dɣa yenna-yasen mḥend-lebɣel :
- ad tteqqimḍ, a bu-tčamart, ad tessewweḍ lqut: nekk d bu-qejjiṛ ad nṛuḥ ad neks lmal.
Yenna-yas :
- ṛuḥet.
Yebra-d i lmal mḥend-lebɣel netta d bu-qejjiṛ: ṛuḥen, ksan. Bu-tčamart-nni yessew imensi aṭas.
Almi d-iṛuḥ uwaɣezn-nni amejṭuḥ, yenna-yas :
- a d-tefkeḍ acu ara ččeɣ, neɣ a k-eččeɣ.
Yenna-yas :
- eyya, kecm-d : d acu k-yuɣen? Lxiṛ iɛumm.
Yemmeɣ yekcem, yečča seksu.
Almi d-yewweḍ mḥend-lebɣel lakk d bu-qejjiṛ, almi d-seqqan imensi, ur yeṛwi ara mḥend-lebɣel, yenna-yas :
- yak nniɣ-ak, a bu-tčamart, weqm-aɣ ɛecṛa n iqenṭaren d tasawett. Yenna-yas :
- a mmi, a mḥend-lebɣel, weqmeɣ 15 qenṭar, d acu d lḥeǧaǧ i d-iɛeddan, g waṭas yid-sen, yenɣa-ten laẓ, eččan. Yenna-yas :
- a k-yefk-k tizmert ; d lɛali ssadaqa : ulac uɣilif : nekk ferḥeɣ.
Almi d azekka-nni, yenna-yas mḥend-lebɣel :
- eyya-n tura nekk id-k, a bu-tčamart, ad neks; bu-qejjiṛ ad aɣ-yessew lqut. Yenna-yas :
- lḥu !
Bran-d i lmal, ṛuḥen. Winna yewqan seksu, yewqem kullec. Atan yewwḍ-d uwaɣezn-nni amejṭuḥ, yenna-yas :
- ad fkeḍ acu ara eččeɣ, neɣ a k-eččeɣ. Yenna-yas :
- eyya, kecm-d. d acu k-yuɣen ? Lɛumm lxiṛ.
Yemmeɣ yekcem, yečča lqut alarmi yeṛwa.
Almi d tameddit-nni, yewwḍ-d mḥend-lebɣel lakk d bu-tčamart. Bu-tčamart-nni yeẓra a d-iṛuḥ uwaɣzen. Seqqan-d imensi. Eččan, ur ṛwin ara. Yenna-yas :
- acuɣer akka ? Drus i yaɣ-d-weqmeḍ, a bu-qejjiṛ. Yenna-yas :
- weqmeɣ-d 15 qenṭar am bu-tčamart ; ɛeddan-d lheǧaǧ : eččan-ten.
Almi d azekka-nni tanzayt, yenna-yas :
- tura ṛuḥ, a bu-tčamart ; ṛuḥ, a bu-qejjiṛ, ad tteksem : nekkini ad qqimeɣ ad ssewweɣ lqut.
Iṛuḥ bu-tčamart lakk d bu-qejjiṛ ɣer tyessawt.
Mḥend-lebɣel yessew lqut. Ata iṛuḥ-d uwaɣzen amejṭuḥ, yenna-yas : .
- Ayi d fkeḍ ayen ara eččeɣ, neɣ a k-eččeɣ.
Yenna-yas :
- wah?... Kecm-d kan ad teččeḍ: iɛumm lxiṛ.
Yemmeɣ yekcem : isqqa-yas-d ɣer tẓiwwa. Almi yeɣfel uwaɣzen-nni, yemmeɣ yerra tawwurt mḥend-lebɣel, yenna-yas :
- ayen, a yuday mmi-s n uday ? Teǧǧid-aɣ i laẓ ?
Yewt-it kan, yesṭneṭn-it.
Almi d tameddit, yewweḍ-d bu-tčamart lakk d bu-qejjiṛ, yenna-yas :
- mačči lɛesslama-nnwen! Teskiddibem ɣur-i: d lḥeǧaǧ ziɣ-n umi tettakm lqut? Nekk umneɣ ziɣ-n-maṭi d awaɣezniw. Jmaɛ liman ad iyi-lzem, ma ɛudɣ-as yid-wen : awer beqqaw ɛla-xiṛ.
Yuɣal-d ɣer tmurt n babas. Yejweǧ, yewqem tameɣra n 7 n wussan d 7 n uḍan.
Tenneqḍaɛ tmacahutt-iw : ur yenneqḍaɛ ara ṛṛezq-iw.