Ferṭas ... Teigneux
Aqcic-nni, qqaren-as Ferṭas. Ar ikes weqcic-nni izgaren n ɛemmi-s yakk d ugenduz-nni-ines. Mi yewweḍ ɣer lexla, agenduz, a t-yawi ad yečč ; izgaren-nni n ɛemmi-s, a ten-yawi ɣer waddanin.
Ass-nni, ḍeɛfen yezgaren n ɛemmi-s, agenduz-nni-ines yeṛwa. Yenna-yas ɛemmi-s :
- A Ferṭas, ayen akka? Azekka, d nekk ara yeksen.
Yuɣal akkenni yewweḍ ɣer lexla, agenduz yewweḍ s anda ytett tuga ; izgaren ṛuḥen ɣer waddanin. Yenna-yas; Yah! Wamma akka i yi-txeddmeḍ !
Yuɣal yessams-as akal azeggaɣ i ugenduz. iṛuḥ-d ɛemmi-s s axxam, yenna-yas :
- A Ferṭas, agenduz-inek iṛuḥ !
ferṭas yeddem-d tamegḥelt n baba-s, ṛuḥen ad nadin. Akken i ywala ɛemmi-s agenduz-nni, yenna-yas :
- Aha a ferṭas, hayt yilef !
ferṭas yeddem tamegḥelt, yenɣa-t. Akkenni yewweḍ, yufa d agenduz-nni-ines i gemmuten. Yenna-yas ;
- Tkellexeḍ-iyi, a ɛemmi.
Yuɣal yewwi-d aḥedduf-ines ; yuɣal yeǧǧa-t almi ifuḥ, yenna-yas ; A t-awiɣ, a t-zzenzeɣ.
akken i t-yewwi, iḍegger-it. Iṛuḥ ɣer ssuq. Yuɣal yufa sin, yiwen la yḥetteb idrimen i wayeḍ, yuɣal Ferṭas yesɛa ɛecṛa surḍi di lǧib-is ; idegger-iten ɣer win yesɛan isurḍiyen deg ciwi-s. Yuɣal yettsuɣu di ssuq, yenna-yas :
-Ahyaw, ay irgazen i wigi ukern-iyi ayla n baba !
ṛuḥen-d yergazen nnan-as :
- Fket ayla-s n bab-is.
Nnan-asen i yergazen-nni :
- Ala ! wigi-nneɣ.
Yenna-yasen Ferṭas :
- ma tufam xemsin n teryalin d ɛecṛa surḍi
swa-swa, inu; ma ulac, mačči-inu.
Uɣalen yergazen-nni ḥesben idrimen-nni, ufan xemsin n teryalin d ɛecṛa surḍi swa-swa. Nnan-asen :
- Fekt-as isurḍiyen-is s iɣil.
Fkan-as isurḍiyen i Ferṭas. Iṛuḥ-d ɣer ɛemmi-s; yenna-yas :
- A ferṭas, ma zliɣ-ten, yezgaren-iw, acḥal a yi-d-awin? Yenna-yas ferṭas :
- Ma fuḥen mliḥ igelman, a k-d-awin meyya teryalin.
Yuɣal yezla-ten. Yeǧǧa iḥeddufen-nni almi fuḥen mliḥ mliḥ. Yenna-yas :
- Tura, a ɛemmi, awi-ten ɣer ssuq ad nzen. Yuɣal yewwi-ten ɛemmi-s. Akken yewweḍ ɣer ssuq,
yewt-it umekkas s tɛekkazt, yenna-yas :
- Ayen d-wwiḍ wigi ifuḥen? akken ad tesfuḥeḍ yakk ssuq ?
ṛuḥen-d wten meṛṛa s tɛewzin. yuɣal iṛuḥ-d s axxam. Akken d-yewweḍ s axxam, yenna-yasen :
- LLit-n tabburt. Tenna-yas tmeṭṭut-is !
- Ma aṭas i ten-tezzenzeḍ? Yenna-yas :
- SSut-iyi-d ... ssut-iyi-d !
Yenna-yas Ferṭas i tmeṭṭut :
- SSut-as-d ... Aṭas isuṛdiyen i d-yewwi !
Akken d azekka-nni ṣṣbeḥ, yenna-yas ɛemmi-s : A t-ṭeggereɣ Ferṭas ɣer lebḥeṛ!...
yuɣal yenna-yas ɛemmi-s :
- lḥu, a ferṭas !
yuɣal la leḥḥun ; ferṭas yezwar ɛemmi-s : yufa-n yiwen weqcic yeksa ulli aṭas. yuɣal la yettru ferṭas. Yenna-yas weqcic-nni :
- Ayɣer la tettruḍ, a ferṭas ?
Yenna-yas ferṭas :
- lackit yenna-yi-d ɛemmi : lḥu, a k-d-aɣeɣ aṭaksi ass-a : ad trekbeḍ deg-s ass-a. Nekki ni ugadeɣ...
Yenna-yas weqcic-nni :
- Eyya, ks-iyi : nekkini ad ṛuḥeɣ deg yebdil-ik.
Yenna-yas ferṭas :
- Ax abeṛnus-iw : mi ara tawḍeḍ s iri n lebḥeṛ, qqim, xdem akken i ubeṛnus, ɣumm udem-ik.
yuɣal akken yewweḍ umeksa-nni ɣer yiri n lebḥeṛ, iɣumm udem-is. yuɣal, akken d-yewweḍ ɛemmi-s, iɣill d ferṭas : iḍegger-it ɣer lebḥeṛ.
Almi d tameddit, inehṛ-d lmal-nni s axxam n ɛemmi-s, yin-as :
- LLi-yi-n tabburt! Yenna-yas ɛemmi-s :
- yuɣal-d wemcum-nni !
Akken d-yelli tabburt ɛemmi-s, yewhem, yenna-yas:
- Ansi d-wwiḍ lmal-agi ? Yenna-yas :
- Si lebḥeṛ ! Limmer i yi-tṭegger-d ɣer tlemmast tili ad d-awiɣ timeqranin ...
Yenna-yas ɛemmi-s i ferṭas :
- A nṛuḥ azekka, a ten-id-nawi i meṛṛa.
Yenna-yas :
- lḥu !
Akken d azekka-nni ṣṣbeḥ, ṛuḥen meṛṛa at wexxam. wwḍen ɣer lebḥeṛ. Yenna-yasen ferṭas :
- A ɛemmi, ḍegger taqjunt, a d-awi lmal . ( lackit ttett ferṭas).
Yeqqim ḍeggeren taqjunt-nni a d-awi lmal. Ur d-uɣal ara. Yenna-yas ɛemmi-s :
- Ayen akka ur d-uɣal ara, a ferṭas?
Yenna-yas :
- lackit ttett lmal, ttess ayefki : ḍegger tameṭṭut-ik, akken a d-ṛuḥen.
Iḍegger tameṭṭut-is, ur d-uɣal ara. Dɣa yuɣal yenna-yas :
- A ferṭas, ayen akka ur d-uɣal ara?
Yenna-yas :
- rnu ula d keččini! Yenna-yas :
- Yah, wamma ad tkellxeḍ fell-i?
Dɣa irewl-d ferṭas, itebɛ-it-id ɛemmi-s. Dɣa, yeṭṭf-it, yeqqen-it di lɣaba i lewḥuc.
Akken yeqqim ferṭas, iwala yiwen wemɣar ; dɣa, yeqqar-as :
- Lḥemdu LLeh, a ṛebbi, sɛiɣ arrac yelhan.
Yenna-yas wemɣar-nni :
- Ayen akka ? Yenna-yas ferṭas :
- lackit iḍelli d amɣar ; qqenen-iyi dagi: ass-agi uɣaleɣ d ilemẓi. Yenna-yas wemɣar-nni:
- Eyya, ad ak-serrḥeɣ akkenni ad uɣaleɣ s amkan-ik, ad uɣaleɣ d ilemẓi. Yenna-yas :
- Ala! Ma ulac ad iyi-wten warraw-iw !
Yenna-yas wemɣar-nni :
- Qqen-iyi kan : ur k-kkaten ara.
yuɣal ferṭas yeqqen amɣar-nni deg wemkan-is.
Dɣa iṛuḥ-d, yewwi-d aserdun-nni yakk d yedrimen. Akken d-yewweḍ s axxam, bḍan netta d ɛemmi-s-nni : yal-yiwen deg wexxam-is.
Tamacahut-iw lwad lwad! sawleɣ-tt-id i warraw n leğwad! Uccanen ad ten-yeqqed Ṛebbi! Ma d nekni ad aɣ-yeɛfu Ṛebbi! Ad nečč irden d ukufi! Ma d wid n teylut ur ten-nufi!