Tamacahut n uḥric d wungif_Finaud et simplet
Ḥekkun-d, di zzman n zik, yella yiwen n wergaz yesɛa snat n tilawin. yiwen n wass, di lawan-nni i deg tteẓẓun ibawen, nnant-as :
- Ay argaz, tura atan d lawan i deg tteẓẓun medden ibawen : ilaq ad aɣ-teẓẓuḍ, i wakken, di lawan-nni n tefsut, ur nettḥellil ara wi ara ɣ-d-yefken, wi ara ɣ-d-yezzenzen. Yenna-yasent :
- Yirbeḥ. Azekka d ssuq : ad ṛuḥeɣ ɣeṛ ssuq, a d-aǧweɣ, a ten-ẓẓuɣ.
Yekker-d azekka-nni, yeddem taylewt, iṛuḥ ɣeṛ ssuq. Yewweḍ armi d ssuq, iqelleb ɣef ṛṛeḥba n ibawen, yuǧw-d ibawen, yuɣal-d s axxam.
Yuɣ lḥal tilawin-nni-ines, yiwet d tameḥṛuct, qqaren-as Tuḥdiqt ; tayeḍ d taɛeggunt, ur tessin ara, d tabuhalt : qqaren-as Tungift.
Yekker-d azekka-nni ṣṣbeḥ, yessel icifaḍ, yebges aqenduṛ, yeddem agelzim n tɣuzi, yerna taylewt-nni n ibawen, iṛuḥ ad yeẓẓu ibawen.
Iṛuḥ armi yewweḍ ɣer yiwen n wemḍiq ntellen deg yiɣẓeṛ, yeqqim-asen taqaɛett i ybawen-nni : ar itett, ar itett, ar itett, ar almi yeṭṭengel uɛebbuḍ-is, ur yezmir ara ad yemwiwel : yeqqim yetḥeyyeṛ. Yeqqim dinna ar almi d tameddit, d lawan i f ara d-yuɣal s axxam: yekker-d, iɣeḍl-d ababder ɣef yicifaḍ-is, yuɣal-d s axxam.
Yewwḍ-d ar d-inehhet, ineddr-d, yeqqaṛ-asent:
- Uk! uk! ɛyiɣ! mmuteɣ! ur zmireɣ ara ad mwiwleɣ!
Tilawin-nni, msakit, ǧeɛɛlent s tidett: yiwet ssya, tayeḍ ssya, mekknent-as akursi, yeqqim; fsint-as icifaḍ, yiwet tefsi i wḍaṛ ayeffus, tayeḍ tefsi i wḍaṛ azelmaḍ. Yeqqim, aralmi i t-id-yuɣal akk cwiṭ n ṛṛuḥ, yesteɛfa, nnant-as:
- Ma ad teččeḍ cwiṭ n lqut? Yenna-yas:
- Ur tetteɣ ara! D ayen! ɛyiɣ, mmuteɣ, gezmeɣ!
Ihi tilawin feṛḥent, ssarament i melmi ara ad d-aweḍ tefsut, d lawan i deg d-qellɛen medden ibawen. Teqqim dinna ddeɛwa.
Ṛuḥ tṛuḥeḍ, ṛuḥ tṛuḥeḍ, ṛuḥ tṛuḥeḍ, ar almi d tafsut, iwwḍ-d lawan n ibawen, i deg tekksen medden ibawen, tetten-ten. Ass-nni deg wussan n Ṛebbi, mmektint-d, nnant-as:
- I ḥeqq-a, ay argaz, teẓẓiḍ-aɣ aseggas-a ibawen! Tura d lawan-nnsen, a ten-nečč, a ten-id-nekkes:
mlaɣ anda i ten-teẓẓiḍ. Yenna-yas:
- Aaaa! i ḥeqq-a, d tidett! ẓẓiɣ-akent ibawen, d acu ur cfiɣ ara: ṛǧumt cwiṭ, a kent-erreɣ s lexbaṛ.
Qqiment, beddlen awal, heddṛen ɣef wayen nniḍen.
Qqiment daɣen azal n uzgen n ssaɛa, nnant-as:
- I tura, temmektiḍ-d? Tecfiḍ? Yenna-yas:
- lḥ! amekti mmektiɣ-d: zṛiɣ anwa amkan, d acu ur ssineɣ ara isem-is n wemkan-nni! nnant-as:
- Amek? Ur tessinṭ ara isem-is? Ur teẓriḍ ara anda i d-yezga? Yenna-yas:
- Ur cfiɣ ara, ackit qwan iberdan, ɛumen iberdan, meɛna tella yiwet n lḥaǧa, ad a kent-tt-mleɣ, a tt-txedmemt, ad tafemt ibawen-iw anda i ten-zerɛeɣ.
Nnant-as:
- D acu? Yenna-yasent:
- Kkremt-d azekka, ssebredɛemt i weɣyul, awimt aɛwin, ternumt aɣeṛbal: mi tewwḍemt ɣer tiɣilt n lmuḍeɛ lflan, ssegrirbemt aɣeṛbal: anda d-yeṣbeḥ uɣerbal-nni, taɣzut i deg d-yeṣbeḥ uɣeṛbal-nni, d tinna i d taɣzut ibawen-nneɣ. Nnant-as:
- Yirbeḥ!
ṭṭṣen. Ar almi d azekka-nni ṣṣbeḥ, kkren-d, feṭṛen, sweǧden, sberdeɛn i weɣyul, ddment aɣeṛbal, ṛuḥent. Ar leḥḥunt, ar leḥḥunt, ar leḥḥunt, aralmi wwḍent s amkan-nni, ɣer tiɣilt-nni i d-asent-yenna. wwḍent ɣeṛ-dinna, serrḥent-as i wɣeṛbal, yettegririb, iṛuḥ. Aɣeṛbal yettegririb, nitenti ttabaɛent-tt, ar almi d yiwen n yeɣẓeṛ, yeḥbes din-na. D tin-na i d taɣzut n gemma Jida! wwḍent ɣer din-na, ufant ibawen... xiṛ-ik, ya Ṛebbi! Nnant-as:
- Aseggas-a ṣaben ibawen! a s-ibarek Ṛeppi i Ṛeppi!
Bdant ar tekksent ibawen: kksent-as tabarda i weɣyul, kksent-as acwari i meṛṛa, serrḥent-as ad yeks.
Nitenti tekksent ibawen: ar tekksent, ttarrant ɣer tcekkaṛt.
Armi d lǧwaḥet n uzal, a d ta tṛuḥ-d Yemma Jida, tenna-yasent:
- Anti-ti tihidu u u... k.? Nnant-as:
- D nekkenti! Aɛa! ɛni ad aɣ-tcaṛɛeḍ ula deg wayla-nneɣ ? D taɣzut-nneɣ!
Nettat, i ss i sent-tesmeḥsis akken, iḍehṛ-as weɣyul, mebɛid: tenna-yasent:
- Kksemt, kksemt! A kent-iɛin Ṛeppi !. Kksemt ar tteɛyumt!
Nitenti, teǧǧa-tent la tekksent ibawen, nettat...tṛuḥ ad tečč aɣyul. Teṭṭf aɣyul, tečč-it. Ar almi i t-tekfa, teddem-d imeẓẓuɣen-is, tesbedd-iten ɣef tṛuka.
Tuɣal tṛuḥ ɣef yiman-is, tettqaṛeɛ amek ara teṭṭef, amek ara taɛu tilawin-nni...
A d-nuɣal ɣer tilawin: nitenti tekksent ibawen, ar almi kfan. Tenna-yas Tuḥṛict i Tungift:
- A Tungift! Tenna-yas:
- D acu? Tenna-yas:
- Muqel aɣyul! Tenna-yas:
- Ay axti, yella! Walaɣ imeẓẓuɣen-is. Tenna-yas:
- Imi twalaḍ imeẓẓuɣen-is, yella.
Kemmlent tukksa ibawen, ar almi d lawan n tmeddit i f ara d-uɣalent s axxam. errant ibawen ɣeṛ tcekkaṛt, ččuṛent acwari, cuddent-tten. Tenna-yas Tuḥdiqt i Tungift:
- A Tungift, ṛuḥ awi-d aɣyul! Tenna-yas:
- Lḥu-n kan, ad neddukkel. Tenna-yas:
- Ay axti, fiḥel ma nɛettb i snat! Tenna-yas:
- Ala! meqqaṛ-ik, ma yella kra d-i-yuɣen, ula d kemm ad tedduḍ!
Ṛuḥent, wwḍent ar almi d aɣyul, afent ḥaca Imeẓẓuɣen! Qqiment ar ttcehhident, uɣalent i ymeṭṭawen. A-d ta tawḍ-d Yemma Jida:
- D acu kent-yuɣen? Nnant-as:
- A Yemma Jida, ma yxuṣṣ nnig n wannect-a, rnu-yaɣ-d! Tenna-yasent:
- Aha! Aha! Aha! Ur ttrumt ara! Ur ttrumt ara!
Tlezm-iyi tkeffaṛt, ar ass-a ar d lembat-nnkent ar ɣur-i! Nnant-as:
- Ala, a Yemma Jida! Ad aɣ-yettṛaǧu wergaz-nneɣ melmi ara nekcem: ad nuɣal: ur nebni ara f lembat.
Tenna-yas:
- S win d win! Nniɣ-akent ar lembat-nnkent ɣu-ṛi!
Nitenti ttgallant, nettat tettgalla. Tuɣal tɣelb-itent Yemma Jida di limin. Ddant, ddment lqecc-n-nsent, ṛuḥent s axxam n gemma Jida. wwḍent, tenna-ya-sent:
- D acu tebɣiḍ, a qelb-i? Tacewwaṭ n ssmid s uyefki neɣ d tin iɣiɣden deg yiɣi?
Tungift-nni tenna-yas:
- Nekkini d tacewwaṭ n yirden s uyefki.
Ma d Tuḥdiqt tenna-yas:
- A Yemma Jida, akken d-am-yehwa: fk-iyi i lukan d tacewwaṭ iɣiɣden s yiɣi.
Tneṭq-d Yemma Jida, tenna-yas:
- Tlezm-iyi tkeffaṛt! a limmer mačči i wudem n tuḥṛict-agi, ar d tacewwaṭ iɣiɣden s yiɣi ara teččeḍ, a tungift; i meɛna, imi d am-d-yefka Ṛeppi tuḥdiqt, ad teččeḍ yid-s.
Tekker Yemma Jida, tegg-d tacewwaṭ, terr tafedṛeqt, tessmar-d ayefki, tga-sent-d acewwaaa...ḍ! d acu ara teččeḍ, d acu ara teǧǧeḍ? Aralmi yewwa, tsers-it-id, tdehn-it s wudi, tefka-yasent-d tijeɣlin, tenna-yasent: '
- Eyyamt, b-isem LLeh!
Refdent, la tettent. Tuḥdiqt-nni teḥṛec: mi teçça cwiṭ, wanniḍnin a s-teḍleq s iciwi-s. Tungift-nni, mi tger taleqqimt, ad tagadeḍ a k-tečč kečč s lekmal-ik! Ar tettent, ar tettent, aralmi tekfa teṛbut.
Tenna-yas:
- Dayen tura? tekfamt? a kent-iṣeḥḥi Ṛeppi. i tura, s tin akkenni, tlezm-iyi tkeffaṛt! ar d-iyi-d-erremt tacewwaṭ-iw, neɣ ad akent-eččeɣ!
Uɣalent, msakit, di sselbiba: qqaṛent-as:
- A Yemma Jida, ula ansi i m-d-nerr tacewwaṭ! Nečča-tt! Tenna-yasent:
- Ay axti, a yessemti, fkemt-iyi-d tacewweṭ-iw, neɣ a kent-eččeɣ!
Tḥettet, tḥettet akkenni, tuɣal teddem-d tuḥdiqt-nni tacewwaṭ-nni i wumi tettṭelliq s iciwi-s, teddem-as-tt-id, tenna-yas:
- Ad tan ɣeṛ-m tacewwaṭ-im! Tenna-yas:
- Ala, ala, ala, ala! d nnecṛaḥa kan i ttnecṛaḥeɣ yid-kent. Tlezm-i tkeffaṛt, s win d win! ar tura a tt-teččeḍ!
Tinna, meskint, tuɣal armi tumen imi s-teggull:
tečč-itt, tuɣal fell-as, tečč-itt. Armi i tt-tekfa, tenna-yas:
- Tura yeppi-kent-id Ṛeppi: yeṭṭf-ikent-id ucebbak n Ṛeppi! Taceppaṭ-iw, neɣ a kent-eččeɣ!
- Ay axti, a Yemma Jida, nerra-yam-tt-in llinna, tugiḍ! Tura nečča-tt: ula ansi i m-tt-id nerr!
Tenna-yas:
- Ihi, mlemt-iyi kan tura ansi ara kent-bduɣ.
Nnant-as:
- A Yenma Jida, limmer u d-aɣ-teẓẓemlalṭ ara, tili ad aɣ-tanfeḍ ad nɛic ayen d aɣ-yura Ṛeppi. Imi tebɣiḍ ad aɣ-teččeḍ, bdu-yaɣ seg iḍaṛṛen.
Teddem Yemma Jida tebda-tent seg iḍaṛṛen. Tewweḍ armi d taɛebbuṭ, tekks-d sin n lufanat, yefk Ṛebbi d arrac i sin, ttaken acbi ɣer tyemmatin-nnsen: yiwen d ungif am yemma-s, wayeḍ d uḥdiq am yemma-s.
Ihi tekks-iten-id, tesnekr-iten-id, tɛac-iten, ar almi d asmi wwḍen i nnfeɛ: kessen-as lmal, xeddemen-as ccɣel, ttṣeggiden-as-d, sked d acu ur d-as-xeddmen.
Netta, Uḥdiq, mi yewweḍ ɣer lexla, a s-d-ineɣ ṛebɛa, xemsa tsekrin neɣ iwtal neɣ ifṛax, neɣ ayen yufa kan a s-t-id-yawi. Wayeḍ, ungif, ass-a ad as-d-yawi awtul, ass-a a s-d-yawi tasekkurt, ass-a a s-d-yawi afṛux. Nettat tettaṛra-yasen lɛiwaḍ: win d-yenɣan aṭas, a s-tefk aṭas; win d-yenɣan cwiṭ, as tefk cwiṭ. Yiwen n wass, yenna-yas wungif:
- A Yemma Jida! Tenna-yas:
- D acu? Yenna-yas:
- Acimi, imi d dadda Meḥduq tettakḍ-as sin sin, imi d nekkini tettakḍ-iyi kan yiwen? Tenna-yas:
- A mmi, dadda-k Meḥduq ttakɣ-as sin ɛla-xaṭeṛ ineqq-d sin; keččini, asmi ara d-nɣeḍ sin, a k-efkeɣ sin.
Qqimen akken-ni, xeddemn-as ccɣel, ttaɣen-as awal, nettat, - Ṛebbi hwa ɛlem! - ur iban d acu i tettxemmim deg wul-is. Nitni daɣen, am wakken-ni, ttxemmimen deg wulawen-nnsen.
Yiwen n wass, yekker yenna-yas Meḥduq i wungif, yuɣ-iten lḥal di lexla, yenna-yas:
- Ay Ungif! Yenna-yas:
- D acu, a dadda Meḥduq? Yenna-yas:
- Ad ak-mleɣ yiwen n ṛṛay. Yenna-yas:
- D acu? Yenna-yas:
- Tfeḥmeḍ, teẓriḍ s yiman-ik belli ɣur Nuja w-tteryel i nezdeɣ: ɣur-s i nella, ur ilaq ara a tt-namen:
yiwen n wass, ad aɣ-tečč, ɛla-xaṭeṛ ur neẓri ma ttukkeṛḍa i d-aɣ-tuker, ur neẓri ma d tiyemmatin-nneɣ i tečča, ur neẓri ansi i s-d-nekka. U nekkni, ur nezmir ara a s-neḍleb, a s-nini: a Yemma Jida, ansi i m-d-nekka? Ihi, ilaq-aɣ a nṛuḥ ssya, ad nerwel! Yenna-yas:
- Ala! nekkini ur reggelɣ ara! d tagi i d tamurt-iw, dagi i wɣeɣ tannumi: ula s ani i ṛuḥeɣ.
Wwḍen-d s axxam, awal amezwaru kan, yenna-yas wungif:
- A Yemma Jida! Tenna-yas:
- D acu? Yenna-yas:
- Yenna-yi dadda Meḥduq ad nerwel... Tenna-yas:
- Ah, a Meḥduq, ur bniɣ annect-a fell-ak!
Yenna-yas:
- Ay axti, a Yemma Jida, ur ttak ara awal. Yuɣ-aɣ lḥal di lexla, akken walaɣ yuli-d usigna, ugadeɣ a d-ɣli lehwa, nniɣ-as: Kker ad nerwel, ammar ad aɣ-teḥbes lehwa di lexla. Tenna-yas:
- Ihi, d afham kan ur yefḥim ara wungif, anf-as.
Qqimn akken. Qqimn akken ddeqs. Meḥduq, dima yettxemmim di ṛṛay-is amek ara yexdem. Yiwen n wass daɣen, yeṭṭf ungif di lexla, yenna-yas:
- Ay ungif! Yenna-yas:
- D acu? Yenna-yas:
- A d ta ad aɣ-tečč Yemma Jida! Tura, ma yehwa-yak a k-tečč kan weḥd-k, qqim; ma d nekk, ilaq ad rewleɣ.
Yenna-yas:
- Ihi, imi ad iyi-tečč, ad dduɣ! Anda tṛuḥḍ ad ṛuḥeɣ! Yenna-yas:
- Ihi, a tt-steqsiɣ amek iga yiḍṣ-is; nekkni, mi tt-neǧǧa ar tteṭṭeṣ, ad nerwel. bac a k-id-ssakiɣ, a d-ddmeɣ cwiṭ n tament, a k-tt-in-smecḥeɣ, ttebeɛḍ-iyi-d. Lehduṛ kfan.
Wwḍen-d s axxam, ččan imensi, qqimen ɣer lkanun, ar ttqeṣṣiṛen. Ineṭq-d Meḥduq, yenna-yas:
- A Yenma Jida! Tenna-yas:
- D acu? Yenna-yas:
- Bɣiɣ a m-iniɣ yiwen n wawal, lameɛna ɣur-m ad tcukkeḍ ssen d acu n dir i yellan deg wul-iw.
Tenna-yas:
- D acu? Yenna-yas:
- A yi-temleḍ amek iga yiḍṣ-im. Tenna-yas:
- Ah, a Meḥduq, kečč d-yesseqsan ɣef yiḍs-iw, ar almi s acu tebɣiḍ a txedmeḍ! Yenna-yas:
- Ay axti, a Yemma Jida, ur tesɛiḍ i yillan di lbal a t-xedmeɣ. Lameɛna, ad am-iniɣ acimi sseqsaɣ.. ihi, sliɣ belli llan iṣeggaden d-yeffɣen ɣer lɣaba-yagi i deg nella; llan imakṛaḍen ẓran belli dagi i nella, ẓran nesɛa lmal, nesɛa cci, - ad yesdum Ṛebbi! - Ihi, ilaq-aɣ ad neggan s nnuba: mi ara teṭṭseḍ kemmi-ni, nekkini ilaq-iyi ad ɛasseɣ cwiṭ: ma sliɣ i lmeḥses imakṛaḍen neɣ n yeqjan, neɣ iṣeggaden, a kem-id-ssakiɣ, ad nebnu ɣef yiman-nneɣ. Tenna-yas:
- A a a a... k-yeḥrez Ṛeppi, a Meḥduq! Wagi d tidett. Ihi tura, ad a k-mleɣ amek iga yiḍṣ-iw. Tenna-yas: Ihi, a Meḥduq a mmi, mi tesliḍ yak i lewḥuc eččiɣ deg uzal la ttsuɣun deg uɛebbuḍ-iw, la skeɛwiwen, la shewhiwen, la ččiǧǧiqen, lḥasun-ik kra ara ččeɣ deg uzal mkul yiwen d ssut-is, ad as-tesleḍ, teḥṣiḍ ṭṭṣeɣ, neɣ ma ulac, ur ṭṭiṣeɣ ara. Yenna-yas:
- Yirbeḥ. Yenna-yas: ɛṭi-kem ṣṣaḥḥa. Tura nefra.
Yewweḍ deg yiḍ. Yeṭṭeṣ wungif, teṭṭes Yemma Jida... Meḥduq, ula d netta yesteɛmel yeṭṭeṣ. Yekcem ɣeṛ ddaw n wusu, iɣumm: ar yesmeḥsis i melmi ara bdun ṭṭǧaǧ deg uɛebbuḍ n gemma Jida. Yeqqim, yeqqim, yeqqim, ar almi d yiwet n teswiɛt isel ad as-tiniḍ d tiẓgi m-lewḥuc deg uɛebbuḍ n Yemma Jida. Isawel:
- Yemma Jida!
Ulac! Inebbc-itt:
- Yemma Jida!
Ulac! Yenna-yas: Ihi, teṭṭeṣ, d tidett! Yekker, yels lqecc-is, yeddem yak d as-yehwan, yerr-it ɣer lǧib-is, iɛedda yessusef yiwet n tsusift nnig n lkanun, yerna tayeḍ di tlemmast n tɣerɣert, tis-tlata di tewwurt. Iɛedda ɣef txabit, yeddem-d cwiṭ n tament, iṛuḥ yesmecḥ-as-tt i wungif; yekkr-d yenna-yas:
- A a a a... h! nnaɣ, a dadda Meḥduq, d aẓidan! rnu-yi-d wayeḍ! Yenna-yas:
- Yak, nniɣ-ak, awal ulac: sket, ttebeɛḍ-iyi-d, tmedleḍ tawwurt.
Winna, meskin, nneyya i deg yella, akken d-yekker, yelsa-d lqecc-is, iǧeɛɛel yenna-yas: refd-d tawwurt: irefd-d tawwurt ɣef weɛrur-is. Ar d-yettazzal, itebɛ-d dadda-s Meḥduq.
Ar d leḥḥun, ar d leḥḥun, ar d leḥḥun, a d ta taki Yenma Jida, tessawel:
- Meḥduq!
Rrent-as-d tsusaf-nni nnig n lkanun, nnant-as:
- Aql-i da! Tenna-yas:
- D acu txeddmeḍ din? Yenna-yas:
- La sseḥmuyeɣ. Tenna-yas:
- Aha, sseḥmu!
Nitni, yuɣ lḥal la leḥḥun. Yiwet n teswiɛt, iqelb-d Meḥduq ɣer wungif: iwala-t ibubb-d tawwurt! Yenna-yas:
- Yak, nniɣ-ak medl-itt-id! mačči d ibibbi i d ak-nniɣ bibb-itt-id! Yenna-yas:
- Ihi, nekk akk-a i feḥmeɣ! Yenna-yas:
- Sers-itt ɣef teẓrutt-nni.
Winna daɣen yesres tawwurt, irefd-d taẓrutt! Ṛuḥen. Leḥḥun, leḥḥun, ar almi i s-yesla Meḥduq i wungif la ynehhet. Yeqleb ɣur-s, yenna-yas:
- Ay Ungif, lḥu-d! Yenna-yas:
- ɛyiɣ! Yenna-yas:
- Acu k-yesseɛyan? Acimi akk-a nekk ur ɛyiɣ ara? Yenna-yas:
- A xuya, tenɣa-yi teẓrutt-agi!
Iqelb-d ɣur-s, yaf-d taẓrutt ɣef weɛrur-is!
Yewhem: ar yettɛeggiḍ, yenna-yas:
- Yak, nniɣ-ak: sers tawwurt-nni ɣef teẓrutt-nni! Ur d-ak-nniɣ ara awi-d taẓrutt. Sers-itt!
Yesres taẓrutt; kemmeln abrid-nnsen.
Yemma Jida tuki-d wi-s meṛtayen. Tessawel:
Meḥduq!
Rrent-as-d awal tsusaf-nni isusef di tlemmast n tɣerɣeṛt, nnant-as:
- Aql-i da! Tenna-yas:
- D acu ixeddmeḍ? Yenna-yas:
- Iferɣ-iyi yiḍeṣ. Aql-i rriɣ-tt ḥaca i weqlab, ḥaca i ccna. Tenna-yas:
- Aha!
Tuɣal s iḍes, teṭṭeṣ daɣen cwiṭ, taki-d:
- Meḥduq!
Rrent-as-d awal tsusaf-nni isusef di tewwurt, nnant-as:
- Aql-i da! Tenna-yas:
- Acu k-yewwin ɣer tewwurt? Yenna-yas:
- A Yemma Jida, ṛuḥeɣ-d ad waliɣ ma yelha lḥal, ɛla-xaṭeṛ sliɣ i ṛṛɛud d waḍu. Tenna-yas:
- Aha!
Tuɣal daɣen siḍeṣ, teṭṭeṣ cwiṭ, ar almi ttaqṛib ad iɛellem lefjer, taki-d. Tessawel:
- Meḥduq!
Ulac! Tessawel:
- Meḥduq!
Ulac! Tessawel... Ulac! tekker-d, tceɛɛel taftilt, tqelleb ya a a a... kk tiɣemmaṛ, tqelleb yakk iṭiṭucen, tqelleb di teɛrict, deg udaynin, ur teǧǧi amkan: ar almi ur ten-tufi ara, tsuɣ:
- Annaɣ, a Ṛeppi, ixedɛ-iyi Meḥduq!
Tuɣal, almi ur tufi ara, tesked di mkul lǧiha,
teṭṭf-d Taqjunt, tṛuḥ-d a ten-id-tbeɛ.
Nitni, yuɣ lḥal wwḍen-d ɣeṛ yiwen n wasif, afen-t-id la yesgemgum, la d-yettawi idɣaɣen annect-ila-ten. Qqimen, ar ttergigin amek ara xedmen. Yuɣal ineṭq-d Meḥduq, yenna-yas:
Ay asif n wudi d tament, eǧǧaɣ abrid ad nɛeddi:
Lukan ad aɣ-d-qḍeɛ Yemma Jida,
Ad aɣ-tečč!
Asif, imir-n kan, yuɣal d leḥrir, yekkaw: ɛeddin.
I s i ɛeddan kan, uɣalen-d waman ar d ttawin idɣaɣen annect-ila-ten. Nitni kemmeln abrid, burken Ṛebbi imi d asen-d-yefka abrid ɛeddan-d.
A d ta tleḥq-d Yemma Jida ɣer wemkan-nni i deg d-wwḍen, meḥsub-ik s asif. Tenna-yas:
Ay asif n waya d uya,
eǧǧ-iyi abrid ad ɛeddiɣ:
Yeǧǧa-yi Meḥduq mimmi!
Asif, Simmal di zzayed: iqellɛ-d imir-n tṭjuṛ, mačči ḥaca idɣaɣen, yewwi-d d lǧedrat kan akken. Teṭṭef taqjunt-nni-ines, tḍeggṛ-itt s aman, tenna-yas:
- Ḥleb! ḥleb! ḥleb!
Taqjunt, meskint, ar ttess deg waman, ar itess deg waman, tǧeɛɛel d ayen ara tsew, aralmi yeččuṛ uɛebbuḍ-is, yeṭṭengel: wwin-t waman, temmet. Tinna teɛṛeḍ amek ara texdem... ulac! Tuɣal tenna-yas: Yessefk-iyi ad zegreɣ, ad zegreɣ!
ihi tegr iman-is s aman, tekcem, tekcem deg yiwen n wemkan, yewwi-tt wasif, teffɣ-d azal n xemsin neɣ settin n lmitrat seg wemkan-nni akin.
Akken d as-tɛedda, tṛuḥ tkemml abrid-is a ten-tetbeɛ. Nitni awḍen ɣer yiwet n lɣaba, lɣaba d ayen werǧǧin ẓrin di ddunnit, yerna uɣen tannumi d lɣaba, ssnen d acu d lɣaba. Lameɛna lɣaba am tinna leɛmeṛ tt-ẓrin. Teksa, ad as-tiniḍ d albeɛḍ i tt-ixedmen b-lemɛamda! wwḍen, ar ttergigin am webrid amezwaru, amek ara xedmen, amek ara ɛeddin. Uɣalen, yenṭeq Meḥduq, am webrid amezwaru, yenna-yas:
A tiẓgi n wudi d tament,
eǧǧ-aɣ abrid ad nɛeddi:
Limmer ad aɣ-d-qḍeɛ Yemma Jida,
Ad aɣ-tečč!
Tiẓgi, imir-n kan, s lqedṛa n Ṛebbi lɛalamin, tuɣal am leḥrir, ɛeddin, Kemmeln abrid-nnsen ! i s i ffɣen lɣaba-nni, tuɣal am zik-is.
A d ta tawḍ-d Yemma Jida. Tenna-yas:
- A a a a yemma! Zegreɣ-d i wasif, ufiɣ-d winna iɣelben asif! Zegreɣ-d i wasif, ufiɣ-d lɣaba! Amek ara ɛeddiɣ di lɣaba-yagi, ayi teḥṛem! Tenna-yas:
A lɣaba n waya d uya,
eǧǧ-iyi abrid ad ɛeddiɣ:
Yeǧǧa-yi Meḥduq mimmi !
Lɣaba, Simmal di zzayed tkessu, Simmal meqqin-d isennanen, Simmal meqqint-d, ttaɛlayent ttjuṛ. Seg mi abrid-nni teɛṛeḍ ad tɛeddi, ulac, mi tɛedda kan cwiṭ, a tt-yexṛem umadaɣ, a tt-yexbec, tcerreg yakk leḥwayǧ-is, icerreg akk weksum-is, tuɣal twexxṛ-d ɣer deffir, i ḍehṛ-as Meḥduq d wungif ɣer yiwet n tqeṛṛut, menɛen, isellk-iten Ṛebbi; tuɣal tessawl-asen, tenna-yasen:
- A Meḥduq, mimmi!
Yerra-yas-d awal Meḥduq, yenna-yas:
- D acu tebɣiḍ? Tenna-yas:
- Ṛṛwaḥ tṛuḥem, tuṭṭfa ur ken-ttaṭafeɣ ara, lameɛna ḥeṛṛemɣ-awen, ṣeṭṭefɣ-awen: ma tcerkem ɣur uzemṛaq n wallen: deg-s aẓar n tisselbi!
Kemmlen, nettat tuɣal-d ar tekkat ger ifassen-is:
wi ara s-ixedmen cceɣl-is ? wi ara tt-iwansen ? Nitni ṛuḥen.
Ar leḥḥun, ar leḥḥun, ar leḥḥun, ar almi wwḍen ɣeṛ yiwet n taddart. Burken Ṛebbi imi mlalen d lexliqa ten-yecban. Amezwaru walan... d azemṛaq. Sellmen fell-as: yerra-yazen-d sslam; yenna-yasen:
- A txedmem? Nnan-as:
- Ad nexdem. D ayen i f i nettqellib, meɛna ma mačči ɣur-k. Yenna-yasen:
- Acimi? Nnan-as:
- Ala! Zemṛaqeḍ: izemṛaqen, deg-sen aẓar n tisselbi!
- A wladi !, a ken-yehdu Ṛebbi, u slibɣ ara!
Nnan-as:
- Nekkni, akka i d-aɣ-d-nna Yemma Jida-t-neɣ! Tenna-yaɣ: anda tcerkem ɣur uzemṛaq n wallen: deg-s azaṛ n tisselbi.
Ihi, winna, yuzen-as-d Ṛebbi leɛqel, yenna-yasen:
- Ihi, imi wen-tugi Yemma Jida-t-wen, kemmelt abrid-nnwen.
Ṛuḥen, ffɣen taddart-nni, afen tayeḍ. Amezwaru ten-id-iqublen... d azemṛaq. Am umezwaru, i d-a-sen-yenna i d-as-nnan. Winna, di lexcana-nni i deg yella, di reffu-nni i t-sserfan, yewt-iten, yenna-ya-sen:
- Amek? Nekk s lɛeql-iw, kunwi s lɛeql-nnwen, neɣ ur iban tselbem ar d-iyi-teqqarem tselbeḍ imi zemṛaqeḍ! Yenna-yas: Yella wi cban allen tizegzawin, tizemṛaqin; ɣur-sen lɛeqleyya-nnsen weḥḥed-sen.
Yewt-iten, yefka-yasen ayen d-asen-yekteb Ṛebbi, kemmeln abrid-nnsen, wwḍen ɣer taddart ti-s tlata, afen yiwen n wergaz d azemṛaq ula d netta. Ar ttweḥḥiden Ṛebbi, nnan-as: Muqel kan ɣer ṣidi Ṛebbi: mkul abrid i deg ara nemlil d lxelq, a t-naf d azemṛaq. Ihi, Yemma Jida-yagi tebɣa kan ad aɣ-tessexseṛ! Ur tebɣi ara ad aɣ-tweqqem! Akken-ni i tt-yura Ṛebbi a nkemmel. Yenna-yasen am sin-nni imezwura:
- Ma a txedmem? Nnan-as:
- Ad nexdem, meɛna mačči ɣur-k. Yenna-yasen:
- Amek? Ur txeddemm ara ɣur-i? Acu yi-xuṣṣen nekkini? Nnan-as:
- Keččini d azemṛaq n wallen: izemraqen n wallen, deg-sen aẓar n tisselbi.
Yefka-yasen ṭṭriḥa, yewt-iten. Uɣalen mmuten, gezmen, ɛyan: laẓ, angaẓ!
FFɣen-d di taddart-nni, awḍen ɣer tayeḍ tameddit; rren ɣer tejmaɛt, qqimen: ar ttxemmimen amek ara xedmen. Nniɣ-d akka ttxemmimen, meɛna ḥaca Meḥduq i gettxemmimen, ɛla-xaṭṛ Ungif ur yeẓri anda mmetwalent.
Yuɣal ineṭq-d Meḥduq, yenna-yas:
- Ay Ungif! Yenna-yas:
- D acu? Yenna-yas:
- Ur iban nekk id-k anwa i gekesḥen, anwa ur nesɛi ara zzḥeṛ. Ihi mačči d beqqu ur k-bɣiɣ ara neɣ d lkeṛḥ i k-keṛheɣ, lameɛna wissen, ammer ad nefṛeq, ammer a d-yefk Ṛebbi tawwurt. Ihi, a d-nekkr azekka, yiwn a d-iṛuḥ ɣer lɣeṛb, wayeḍ ad iṛuḥ ɣer cceṛq. Meɛna, weqbel ad nemfaṛaq, amkan-nni i deg ara nemfaṛaq, ilaq-aɣ ad neẓẓu snat n tmeɣrusin, yiwet-inek, tayeḍ-inu: tin yeqquṛen deg-sent, teḥṣiḍ s acu t-yuɣen bab-is.
Kkren-d azekka-nni ṣṣbeḥ, wwḍen ɣer yiwen n wemkan, g yiwet n tiɣilt, ẓẓan snat n tmeɣrusin, mfaṛaqen: mbeqqan sslam, ṛuḥen. Yiwen yerra ɣer lɣeṛb, wayeḍ yerra ɣer ccerq. wwḍen. Yiwen yewweḍ ɣer taddart tamezwarut t-i-d-iqublen, wayeḍ yewweḍ ɣer taddart tamezwarut t-id-iqublen. wwḍen ɣer din, yessehl-asen Ṛebbi lecɣal, afen lxedma.
Uɣ lḥal gan ttaɛud ɣef ɛamayen, deg wass n lmuḍeɛ flan, ssaɛa n lmuḍeɛ flan, ad d-mlilen ɣer wemkan-nni n snat tmeɣrusin ẓẓan.
Uɣalen xeddmen, xeddmen, xeddmen; Meḥduq ixeddem, yettaɣ iṣurdiyen, ijemmɛ-iten, iteffr-iten, iɛac s liser, yella akken d-as-yehwa i Ṛebbi. Ungif, ixeddem,- lxedma ixeddem! - itett, meɛna, mi i gesɛa aṣurdi, yečč-it: zzelṭ, lkeḥs, a k-yenju Ṛebbi, yenju-yaɣ! Aṣurdi, mačči a t-tafeḍ ɣur-s! Yenɣa iman-is s lhemm: ɛeryan, la taqenduṛt, la ḥetta ci!
Qqimen akken ɛamayen ixaṣṣ yiwen n wass.
Ass-nni tameddit, Meḥduq yemmekti-d, yenna-yas:
i ḥeqq-a! tura ɛamayen-ayagi, azekka ɛamayen i deg lliɣ da. Yella gma Ungif, ur iban amek id-s yeḍra. Nga ttaɛud i wzekka ɣef ttnac: ihi ilaq-iyi ad ṛuḥeɣ.
Ar yettxemmim d acu n ssebba ara sen-d-yaf i yemɛellemen-is, ɛla-xaṭer ilaq-as, limmer d i d-yemmekti, ad asen-iɛeggen, lxersum, temn-yyam neɣ ɛecr-yyam weqbel.
Kra yekka yiḍ, ṭṭṣen waman d yesɣaren, netta mačči yeṭṭeṣ. Ar yettxemmim amek ara yexdem, d acu n ssebba ara d-yaf. Yuɣal ixemmem, yenna-yas: ihi, lxattima, ad asen-iniɣ i yemɛellenm-iw: a ken-yehdu Ṛebbi, nekkini iṛuḥ uqerru-w... Imɛellmen am kunwi, ur ttafeɣ ara...
Nekkini, sɛiɣ lḥaǧa iḥaren i wass-a, ilaq ad ṛuḥeɣ...
Ma yekfa Ṛebbi tuccerka fell-i, yekfa Ṛebbi laẓ fell-i... Imɛellmen am kunwi, ur ttafeɣ ara... ma bḥaṛa, n ca lleḥ, ad nettemlili kan di lxiṛ... ma ygella uɣaleɣ-d, la dɣa... akken i waxiṛ!...
Yekker-d azekka-nni ṣṣbeḥ, iṛuḥ s amɛellm-is, yenna-yas:
- A sidi, ilaq-iyi, Bessif, ass-a ad ṛuḥeɣ.
Yenna-yas:
- A wlidi, s ani ara tṛuḥeḍ? Acimi? Ad aɣ-t-ǧǧeḍ?
D acu d-ak-nexdem? Acu n ssebba ? Keččini yebɣan ad tṛuḥeḍ, ar almi s acu d-ak-xedmen at wexxam ur ɛlimeɣ ara yis-s. Yenna-yas:
- A sidi, ad ak-ggalleɣ s wayen d ak-yehwa. ma tesɛiḍ ssebba i yi-xedmen at wexxam. Ma bḥaṛa sɛiɣ yiwen n gma ur iban amek id-s teḍra. Nga ttaɛud i wass-a ɣef ttnac. Ihi ur zmirɣ ara a txedɛeɣ wala ayi-xdeɛ.
Lḥaṣun-ik, iḥellel-it, iḥellel-it wemɛellem: ar mi iwala iɣelb-it, yenna-yas:
- Ihi ṛuḥ, ad isaḥel Ṛebbi n ca lleḥ: lxedma a tfakk fell-awen: a wen-d-yefk Ṛebbi anda ara tessendergem iqerra-nnwen; nekk, a yi-d-yefk Ṛebbi ixeddamen am keččini!
Yeṭṭef lqecc-is, irefd-iten-id, iṛuḥ.
Ar d-ileḥḥu, ar d-ileḥḥu, ar d-ileḥḥu, ar almi i d-yewweḍ ɣer tmeɣrusin-nni: yaf-itent-id s iferrawen, uɣent i snat. Yenna-yas: A lxiṛ-iw, a Ṛebbi, gma ur t-yuɣ wara!
Ungif, netta, ur d-yemmekti ara yakk, ar almi d azekka-nni ṣṣbeḥ, d lawan i f ara yṛuḥ ɣer lexla, yesweǧd-d, yessl icifaḍ, yeddem-d lqecc--is, ihegga aɛwin ɣer tḍellaɛt ad yefṭer di lexla. Yiwet n teswiɛt, i s iṛuḥ a d-yebru i lmal deg udaynin, yebra-d i yexf amezwaru, yeffeɣ-d, yenna-yasen:
- Ur kesseɣ ara! Nnan-as:
- Acimi ur tkesseḍ ara ass-a? Yenna-yas:
- La wen-qqareɣ nekk ad ṛuḥeɣ!
- A mmi, s ani ara tṛuḥeḍ? A k-yehdu Ṛebbi, acu-t n yizi-yagi i k-id yeqqsen a tṛuḥeḍ? Yenna-yas:
- Nekkini nniɣ-awen ad ṛuḥeɣ, ad ṛuḥeɣ: tiɣimit ur s ttɛawadeɣ ara.
- Acimi? Yenna-yas:
- Yella gma, isem-is Dadda Meḥduq, nga ttaɛud f ttnac, ad nemlil ɣer wemkan n lmuḍeɛ leflan: neẓẓa din-na snat n tmeɣrusin: ad ṛuḥeɣ ad ẓreɣ snat n tmeɣrusin-nni ma ur qqurent ara, ma ur teqqur ara tagi-ines: ma teqqur, ad d-uɣaleɣ; ma ur teqqur ara, ur d-ttuɣaleɣ ara.
Ḥellelen-t, ḥellelen-t, ḥellelen-t, ar almi yugi, yeddem lqecc-is, iṛuḥ-d. Yettazzal-d, yettazzal-d, yettazzal-d: lɛiwaḍ i f ara d-yaweḍ ɣef ttnac, yewwḍ-d ɣef jjuǧ.
Akken d-iwala mebɛid dadda-s Meḥduq, isawl-as-d:
- Aya lxiṛ-iw, a Ṛebbi! Yedder dadda Meḥduq!
Yawḍ-d, msalamen, mesteqsan. Meḥduq, akken kan t-iwala, yedhec, iṛuḥ uqerru-s, isewweq lɛemr-is: yenna-yas:
- ay Ungif, acu-t nnegr-agi i d-ɣeḍleḍ ɣef yiman-ik? Yenna-yas:
- Acimi ? Yenna-yas:
- Niɣ txedmeḍ ? Yenna-yas:
- xedmeɣ! Yenna-yas?
- Niɣ tettaɣḍ iṣurdiyen? Yenna-yas:
- ttaɣeɣ! Yenna-yas:
- Ihi acu-t lkeḥs-agi i d-serseḍ ɣef yiman-ik?
Ur telsiḍ, ur terbiḥeḍ, ur tcebbeḥḍ iman-ik; ur d-wwiḍ aṣurdi! Yenna-yas:
- Ah! d lirad n Ṛebbi! Acu sen-riɣ nekk i yṣurdiyen? Ur sɛiɣ axxam, ur sɛiɣ i wumi ara ten-fkeɣ!
Meqqar-ik ččiɣ-ten, Ṛebbi inub!
Winna, ar yekkat deg ifassen-is, yenna-yas:
- Nnaɣ, ay Ungif! Yenna-yas: Meɛna ẓriɣ akka ara yid-k teḍru: ur teḥṛiceḍ, ur teḍriceḍ, ur teẓriḍ anda ara d-griḍ! yya, imi k-yura Ṛebbi g uqerru-w, welleh, ma ǧǧiɣ-k!
Ṛuḥen, kemmeln abrid-nnsen.
Ar d-leḥḥun, ar d-leḥḥun, ar d-leḥḥun, ar almi d-wwḍen ɣer yiwet n tala. Ineṭq-d Meḥduq, yenna-yas:
-Qqim, ad nesteɛfu dagi, ad nečč cwiṭ n lqut, ad nesw aman a ten-i nufa; ssyen, Ṛebbi anda ɣ-yewwi a nṛuḥ.
Wwḍen ɣer tala-nni, afen-d yiwet n teqcict, daxessaṛ... ar tettru. Yenṭeq ɣer-s Meḥduq, isellem fell-as. Tenna-yas:
- Lɛesslama! Yenna-yas:
- Llah isellem! Yuɣal yenna-yas daɣen: D acu ken-yuɣen armi la tettruḍ? Tenna-yas:
- Qqim Kan: ula i k-ḥkuɣ. Yenna-yas:
- Ala! Welleh ar d-iniḍ! Tenna-yas:
- Likan ur iyi-teggalleṭ ara s yism n Ṛebbi lɛalamin, tili d amessebrid kan, a tkemmelṭ abrid-ik, - a k-iɛin Ṛebbi! - Imi d-iyi-tesɛahdeḍ s Ṛebbi, ad ak-iniɣ. Atan wayen yellan.
Yeqqim wergaz ar yesmeḥsis. Tinna tenna-yas:
- Nesɛa tala-yagi-nneɣ, tella deg-s talafsa. ihi talafsa-nni tettqerriɛ i waman: alamma tečča taqcict deg useggas ara d-ḍleq i waman. Aseggas-a tṣaḥ-iyi-d d nnuba-w. Nekk d yelli-s n sselṭan.
Yenna-yas:
- Wexxṛ-d akka tura, ad waliɣ talafsa-yagi.
Twexxṛ-d teqcict, yeqqim netta deg wemkan-nni-ines. Yiwet n teswiɛt kan akka, ar almi yesla i zzhir ɣer lɛinṣer n waman, yesla ccɣel n ṛṛɛud i la d-leḥḥu tlafsa.
Yuɣal yemmeɣ ɣer lǧib-is, yeddm-d ajenwi. Talafsa tessufɣ-d aqerru-s amezwaru akken a ttečč taqcict.
Winna yeṭṭf ajenwi-nni-ines, yessenta-yas-t deg uqerru. Ladɣ-a tneṭq-d tlafsa, tenna-yas:
- Winna, mačči d aqerru-w! Yenna-yas:
- Ula d nekk, tin-na mačči d tiyita-w!
Daɣen terna-d aqerru wi-s sin: yewt-it daɣen s ujenwi. Tenna-yas:
- Mačči d aqerru-w! Yenna-yas:
- Ula d nekk, mačči d tiyita-w!
Akken-ni almi setta iqerra, wi-s sebɛa tessufɣ-it-id, yeɣleb yak wiyiḍ. Yewt-it, yenɣa-t, bessif. Tuɣal tneṭq-d, tenna-yas:
- A a a h... h! Win-na d aqerru-w! Yenna-yas:
- Ula d nekk, tin-na d tiyita-w!
Ladɣa tala, imir-n kan, bdan-d waman, yeɣleb asif, ttfeggiḍen mkul amkan, yernu xelṭen d idammen-nni n tlafsa. Tuɣal teqcict tefṛeḥ. Temmeɣ ɣer uṣebbaḍ n Meḥduq, tewwi-t-id d tarewla s axxam.
Tteddu-d abrid abrid, tesliliw-d, tekkat-d llir, tekkat-d ger ifassen-is. Win tt-id-yemlalen yin-as:
- Acimi akka d-rewleḍ? Acimi akka tura ad aɣ-teǧǧeḍ mebla aman, kemmini, d yelli-s n sselṭan, atan tuɣaleḍ-d s axxam? Nekkni nefka yakk yess-nneɣ!
Tenna-yas:
- Ṛuḥ-t, aweḍt ar tala, a twalim ma llan waman!
Lɣaci, yeffɣ-iten yakk leɛqel, d tazzla ɣer sselṭan, nnan-as:
- Anɛam, a sidi sselṭan, wagi mačči d lḥeqq fell-ak wala ɣef yelli-k! Asmi d yess-nneɣ, i meṛṛa ngǧa-tent tečča-tent tlafsa. Aseggas-a, imi d-ṣaḥ nnuba n yelli-k, a d tan trewl-d. Ihi, cfu-k-id nekkni ur k-nṭelliq ara, alamma tefkiḍ-aɣ-d aman!
Sselṭan, meskin, yuɣal di sselbiba amek ara yexdem i yelli-s. Yuɣal isawl-as-d, yenna-yas :
- A yelli, b-ɛad-kem, acimi i d-rewleḍ?
Tenna-yas:
- A baba, yella waya, yella waya, yella waya...
Teḥka-yas-d i meṛṛa amek teḍra tedyant n tlafsa yakk d Meḥduq, tenna-yas:
- Ata wwiɣ-d aṣebbaḍ n win tt-yenɣan.
Yuɣal ineṭq-d ɣer lɛamma-s, yenna-yas:
- Ihi, a taddart, a lɛamma-w, a lɣaci-w, a win mi d-yezga uṣebbaḍ-agi, a win yesɛan gma-s, ɛaḥdeɣ-t s Ṛebbi, ad as-efkeɣ yelli-yagi, walukan d aqjun, u yerna ad as-efkeɣ nnefṣ di ttrika-w.
Yeddm-d wergaz, - meḥsub d sselṭan, - aṣebbaḍ ar t-iɛeṛṛeḍ i meṛṛa i lɣaci, s wergaz, s teqcict, s weqcic, s tmeṭṭut: yiwen mačči yezga-yas-d, yiwen mačči yufa nnwel am winna. Yuɣal yuɣal-d s axxam, yenna-yas i yelli-s:
- A yelli, ur ufiɣ ara! Yernu ceggɛeɣ yakk ɣer lɛamma-w: ur tesɛiḍ i wumi d-yezga wala wi sɛan gma-s.
Tenna-yas:
- A baba, tsekdeḍ yakk? Yenna-yas:
- Ssekdeɣ yakk! Tenna-yas:
- Tsekdeḍ yakk tiɣemmar n lǧameɛ neɣ n tejmaɛt, ɛla-xaṭeṛ winna tt-yenɣan, cukkeɣ-t d amessebrid.
Yenna-yas:
- Ssekdeɣ! Tenna-yas:
- Ṛuḥ, ɛiwed ssked!
Iṛuḥ ɣer tejmaɛt, iqelleb yakk tiɣemmaṛ, iqelleb yakk leǧwahi. Ar lǧiḥa-nni i deg qqimen, yufa-tt d taneggarut. Yuɣal imekken-asen taftilt, iwala-ten. Isellem fell-asen, yenna-yasen:
- D acu la txeddmem da? Nnan-as:
- Anɛam, a sidi, d imessebriden: iḥebs-aɣ-d yiḍ:
aql-aɣ ad nesɛeddi iḍ dagi. Yenna-yas:
- Yella wi sɛan deg-wen akkagi taṣebbaṭ am ta?
Nnan-as:
- Uh buh, a sselṭan! Nekkni d ifellaḥen ɣef yiman-nneɣ, nesɛa ṣṣebbaḍ? Ḥafi i nleḥḥu. Yenna-yas:
- Ala! zzikent-d iḍarren-nnwen!
Yuɣal yezzaken-d aḍar-is wungif: ur s-d-yezgi ara. Yuɣal d Meḥduq. Akken d-yezzaken aḍar-is, yusa-yas-d uṣebbaḍ swa-swa. Yenna-yas:
- Ṣṣebbaḍ-agi inek ? Yenna-yas:
- Inu! ih! A tan ɣer-k gma-s.
Ladɣa, akken d as-d-yezzaken gma-s, sselṭan yefṛeḥ, yenna-yas:
- Eyya! -kada wakada, kada wakada...- Nekk ɛahdeɣ s Ṛebbi a win yesɛan gma-s n uṣebbaḍ-a, ar d-yaɣ d yelli, ar d as-fkeɣ nnefṣ di cci-w.
Yuɣal yewwi-ten-id s axxam, yessels-as aṣebbaḍ.
Qqimen kra n wussan, mjawaǧen netta d yelli-s.
Yefka-yasen lḥaṛa, llan bxiṛ, sɛan cci. Netta d lewzir-is, (Meḥduq d lewzir n sselṭan). Ungif iqeddc-as, ixeddm-as yakk leḥwayej timejṭuḥin, iqeṭṭu-yas-d, lḥasun-ik uqmen ddunnit; uqmen tameɣra sebɛ yyam u sebɛa llyali.
Tamacahutt-iw lwad lwad...