Amddakel_L'ami
Yesɛa daɣen yiwen n mmi-s, d ilemẓi netta, aṭas n yemddukal i yewqem, yesɛa amidi
Yiwen n wass, yenna-yas i baba-s : a baba, kečč meqqreḍ, yemlul ucekkuɛ n ixef-ik, anagar yiwen n umddakel i tesɛiḍ acimi akka ? muql-d ɣur-i, nekk aql-iyi meẓẓiyeɣ, sɛiɣ amidi n yemddukal, aḥlil ɛad asmi ara ad imɣureɣ am kečč !
-Yenna-yas baba-s : a mmi! nekk, xas sɛiɣ yiwen n umddakel d acu d amddakel n wul ! zemreɣ ad ttekleɣ feIl-as, jeṛṛbeɣ-t yagi, ad yemmet, ad ineɣ fell-i; wanag imddukal-ik kečč, d imddukal n tkerkas, n ukellex ṛuḥen-d kan ɣur-k imi ufan acu ara ad ččen.
-Yerra-yas mmi-s: ah a baba, ur tessinḍ ara imddukal-iw ayen i yi-hwan a t-xedmen.
-Yekker yenna-yas baba-s: yya ihi, a ten njeṛṛeb, ama d imddukal-ik ama d wa-inu.
Ṛuḥen ssalin lfetk deg wexxan, zlan ikerri, ẓẓlen-t sdat n lfetk-nni, slesn-as abidi. Yuɣal Buɛemṛan yenna-yas i mmi-s: ddu tura ceyyeɛ s imddukal-ik, inn-asen: aqlaɣ nenɣa argaz deg wexxam-nneɣ, ad d-iban d acu ara ad d-inin.
Iceyyeɛ mmi-s n Buɛemṛan s imddukal-is ! ar ad d-ttṛuḥun yiwen yiwen, mi d-wwḍen s axxam, ad asen-inin: acimi akka i ttceyyɛem ɣur-neɣ ?
Dɣa, a ten-awin ɣer lfetk-nni d wergaz-nni yeẓẓlen di lqaɛa; imir-n, ad asen-inin: aqlaɣ nenɣa argaz!
widak, imir-n, kksen tacacit-nnsen, ad asen-inin: ad awen-yesuref bab igenwan, yesurf-aɣ : ula awen-d-nexdem!.
Dɣa ad uɣalen s ixxamen-nsen, armi fukken imddukal-nni, yenna-yas Buɛemṛan i mmi-s: i tura, fukken yemddukal-ik neɣ ur ɛad?
Yenna-yas mmi-s: fukken tura, a baba!
Yuɣal yenna-yas baba-s: twalaḍ a mmi! amek i llan yemddukal-ik !? qqim tura a ttwaliḍ asmun-inu mi ara ad d-yaweḍ.
Iceyyeɛ ɣer-s Buɛemṛan, iṛuḥ-d winn-a. Akken i d-yewweḍ s axxam, yesteqsi-ten acu yeḍran !? mlan-as tadyant yeḍran yid-sen: deg yiḍ fetken yemkerḍen ɣur-neɣ, ikecm-d yiwen, nenɣa-t, a ta-n ɣer-k wanda yeẓẓel.
Imir-n kan, yesnesr-d wemddukal-nni tamegḥelt yellan ɣef tayet-is, yewwet imkerḍ-nni s sin lewjuh, yenna-yasen: kenwi tenɣam, nekk ad ɛellqeɣ!
Imir-n, yenna-yas Buɛemṛan i mmi-s: twalaḍ tura, akka ay d imddukal mačči am yemddukal-ik i d-yewwi kan uɛebbuḍ !
Tura, s ya d asawen ur ttewqim ara asmun alamma t-urmeḍ di tizi n ddiq!
Uɣalen kkesn-as abidi i ikerri-nni, yenna-yas Buɛemṛan i wesmun-is: muqel tura, mačči d argaz ay nenɣa, d ikerri i nezla, riɣ kan ad yissin mmi amek ara ad yewqem amddakel, ur yesḍuqqut ara daɣen aṭas n yemddukal ur nemɛin ara.
Tura, welleh, ma tuɣaleḍ s axxam-ik alamma nfukk s wučči ikerri-a!.