Sebɛa n warrac_Sept fils
Macahu!
Ad yeg ṛebbi ad tt-yesselhu ad tt-yeg amzun d asaru!
Yella yiwen yesɛa sebɛa n warrac. Teddem tmeṭṭut-is tadist, yeḥdeṛ-d ad d-tarew. Heddṛen medden di tejmaɛt, nnan-as:
-leflani ad yernu ɣur-s weqcic, yerna atmaten-is di sebɛa usmen, ur t-bɣin ara.
Mi tesla sstut i medden heddṛen akka lehduṛ-agi, teddem tessaweḍ-iten-id i warraw n wergaz-nni. Msefhamen di sebɛa yid-sen, ggullen, nnan-as: «nɛuhed-ik a ṛebbi ar ma tesɛa-d yemma-tneɣ taqcict, ad neddem isuḍaf ad nɣenni, ma tesɛa-d aqcic, ad neddem isuḍaf ad nennejli. ». anamek-is, ma tesɛa-d yemma-tsen taqcict ad kkren s urar d ccnawi, ma tesɛa-d aqcic, ad refden ifassen-nsen d yiḍarren-nsen ad kken tawwurt, ad nnejlin. Tesla-yasen sstut mi ttgallan akka, tṛuḥ tqusem-asen tameddit n wass i deg d-turew yemma-tsen, teqqar-asen yiwen, yiwen:
– ay a leflani, yemma-k terna-d aqcic!
ihi, ur nudan ara ula d anadi ad ttḥeqqen ma d tidett, ddmen isuḍaf, nnejlan. Yemma-tsen d taqcict i d-tesɛa mačči d aqcic. Nitni nnejlan, ğğan imawlan-nsen. Tru yemma-tsen armi teɛya, tuɣal teṣber s tmara. Armi d asmi tewweḍ teqcict d tamazzalt.
Ass-n deg wussan n ṛebbi, tṛuḥ teqcict ɣer tala. Tqusem-as daɣen sstut, tawi yid-s tayeddiḍt n uɣerda, ternu taɣerbalt, tessendi-ten s amizab ad ččaṛen. Taqcict, tuṛğa, tuṛğa, tuṛğa armi twala tugi ad as-teg sstut nnuba ad teččaṛ, tuɣal tenna-yas:
-ttxil-m a yemma tamɣart, eğğ-iyi ad ččaṛeɣ.
Tenna-yas sstut s ttiha d ulaqeb :
-ṛuḥ a timnejlit n sebɛa watma-s!
Tuɣal-d teqcict sakin s axxam tettru. Tettḥellil-itt yemma-as ad as-d-tini d acu tt-yuɣen: ulac. Taqcict tegguma. Armi d yiwen webrid, tuɣal tenna-yas:
-a yemma, bɣiɣ askaf.
Tenna-yas yemma-s : -yirbeḥ!
Tɣil fell-as i tettru, tekker tmeṭṭut s askaf. Armi tebda amsal, tekkes-d snat ar tlata n tcufftin, teddem turez-as yelli-s afus-is ɣer daxel n teṛbut-nni. Tameṭṭut tettsuɣu, tettḥellil yelli-s ad tt-tessukes si teṛbut yerɣan. Taqcict-nni teqqar-as:
-alamma tɛuhdeḍ-iyi ar kra ad am-ssutreɣ ad iyi-t-txedmeḍ.
Tenna-yas yemma-s: -ssukkes-iyi-n kan seg wurɣu, ɛahdeɣ-kem, ɛahdeɣ ṛebbi ar d am-xedmeɣ kra n wayen tebɣiḍ.
Tebra-yas sakin i ufus-is, yeccelfex, yettnezluluf. Armi ččan imensi, tuɣal-d ɣur-s tenna-yas:
-mel-iyi tura acuɣer i yi-txedmeḍ akka?
Tenna-yas yelli-s: -ad iyi-taɣeḍ aɛeqqa yessawalen! Ad iyi-ternuḍ alɣem d taklitt!
Yemma-s tɛuhed ṛebbi, tedda-yas di lebɣi. Tuɣ-as aɛeqqa issawalen, terna-yas alɣem d taklitt. Taqcict teddem-iten, tuɣ abrid-is, tṛuḥ ad tnadi ɣef watmaten-is. Teggul, tenna-yas: «ɛahdeɣ-k, a ṛebbi, ur d-nṭiqeɣ alamma d asmi ara d-nnulfun watmaten-iw».
Tṛuḥ, tiɣilt umi tfel ɣas ta, tiɣilt umi tfel ɣas ta. Armi qrib ad taweḍ, taf-n yiwet n tala n taklatin. Yuɣ lḥal, txutel-itt deg webrid taklit, tuker-as aɛeqqa-nni yessawalen. Mi tfaq teqcict-nni, yaf-d lḥal ur tezmir ara ad as-tsiwel imi tɛuhed ṛebbi ur d-tenṭiq alamma nnulfan-d watma-s. Mi wwḍent ɣer tala n taklatin, tenṭeq ɣur-s taklit tenna-yas: «sired tura dagi». Taklitt teẓra d acu i d lmeɛna-s. Teddem teqcict tessared di tala-nni, dɣa tuɣal d taklit taberkant ula d nettat. Ddant, ddant, ddant… armi wwḍent ɣer tala n tḥerṛiyin, teddem talkit-nni aɛeqqa-nni yessawalen, tessared yes-s din, dɣa tuɣal taklitt d tacebḥant. Mi d-kkrent ad kemmlent abrid, tettu-n aɛeqqa-nni yessawalen di tala.
Armi wwḍent ɣer watmaten-is, taklit-nni terra iman-is d nettat i d wletma-tsen. Feṛḥen yes-s, rran-tt d tamṛayt n wexxam. Ma d wletma-tsen rran-tt d taklitt, tkess-asen ileɣman. Ttaken-as taḥbult n uqecquc. Kul sṣbeḥ, ad teddem taḥbult-nni, ad tenheṛ tajlibt-nni n yileɣman ɣer teɣzut ad ksen. Mi tewweḍ ɣer din, ad tali sufella n yiwen weẓru, ad tcennu:
« ɛlay! ɛlay! ɛlay!ay aẓru!ay aẓru!ad waliɣ tamurt n baba d yemma!ad waliɣ baba d yemma!taklit rran-tt i wexxam!wletma-tsen rran-tt i yileɣman!rut ay yileɣman ma ad trum! »
Dɣa ileɣman-nni msakit ad ttrun, ala yiwen, d aɛeẓẓug. Akken, akken, akken armi d yiwen wass, yenna-yasen yiwen deg watmaten-is :
-ileɣman-inna-nneɣ simmal ḍeɛɛfen. D acu ten-yuɣen akka?
Wayeḍ, yenna-yasen:
-wissen acu i sen-tettak ɛni taklit-nni?
ihi, nnan-as ad tt-nɛass. Ṛğan-tt armi tṛuḥ, tebɛen-itt sdeffir, ffren-as. Tṛuḥ ɣer teɣzut anda tkess lmal, slan-as amek i la tcennu. Nnan-as:
-ndeɛɛa-kem s ṛebbi ar d aɣ-d-tiniḍ d acu-kem a lxelq-agi ?
Teḥka-yasen-d tamacahut si tazwara am wakka i tt-id-nessawel. Yiwen deg-sen ur tt-yumin ara, yenna:
-efk-aɣ-d ttbut belli d wletma-tneɣ ay telliḍ maci d taklit.
Tessawel i uɛeqqa yessawalen, yaweḍ-itt-id imir-n. Ddan yid-s sakin armi d tala-nni n tḥerṛiyin, tessared yes-s, tuɣal-ed am zik-is. ɛeqlen-tt akk watmaten-is deg wudem-is, tcuba yemma-tsen, dɣa umnen, feṛḥen yakk yes-s. Ddmen kkren-as s teɣrit i taklitt-nni armi tettfuḥu, uɣalen-d sakin d wletma-tsen s axxam. Mi d-wwḍen, imawlan-nsen, ula anda ad k-gen a lfeṛḥ, gan tameɣra n sebɛa wussan d sebɛa waḍan. Armi iɛedda lḥal, zzuɣren-d sstut-nni seg ucebbub-is, nnan-as i wletma-tsen:
-d acu ara m-yeqqden tasa?
Tenna-yasen: -sukket-tt-id i sebɛa tẓegwa n yiwaɣezniwen d sebɛa temqebrin ar temmet. Afus-is ad ttɛemmiṛeḍ yes-s iɣiɣden, aḍar-is ad t-geɣ d tamezzirt ad ssukkuyeɣ yes-s leɣbar si tzuliɣt, ma d aqerru-s ad t-geɣ d inyen.
Ddmen xedmen-as akken i sstut. Uɣalent akk sstutat ceɛfent. Ma d nitni yegra-yasen-d liser, ddren di lehna armi mmuten. Hatan wamek tella tmacahut n uɛeqqa yessawalen.
Tamacahut-iw lwad lwad! Sawleɣ-tt-id i warraw n leğwad! Uccanen ad ten-yeqqed ṛebbi! Ma d nekni ad aɣ-yeɛfu ṛebbi! Ad nečč irden n ukufi!ma d wid n teylut ur ten-nufi!