Isefra n si Muḥend u Muḥend
BISMILLEH
1
Bismilleh ar nebdu asefru
ar Lleh ad ilhu
ar d-inadi deg lweḍyat
Wi s-islan ar d-at-yaru
ur as-iberru
wi illan d lfahem yeẓra-t
Anḥell Ṛebbi a tent-ihdu
ɣer-s a la ndeɛɛu
ad baɛdent adrim nekfa-t.
2
A kra ittɛassan lefjer
s tẓallit d ddkeṛ
aɛyent-i abrid a nteṛṛeɣ
Afwad-iw ittuɛammeṛ
s cceṛb d lexmeṛ
ur ddireɣ ur mmuteɣ
Win qesdeɣ ad iyi-isseṛ
izga-d iwexxeṛ
tezwar si tagmaţ-nneɣ
Aṭas aya ay nesbeṛ
ṛebɛa snin akteṛ
ntebaɛ lɣerba tfels-aɣ
Amalah a kra nkerreṛ
iṛuḥ deg yeɣzer
ula d Lḥemdu iɛarq-aɣ.
3
Semman-i medden d lmetluf
nek heǧǧaɣ leḥṛuf
armi ɣriɣ settin ḥizeb
Ism-iw ɣer medden maɛṛuf
taẓallit d ṣṣfuf
deg zik bbʷḍeɣ d ṭṭaleb
Tura mi tebɛaɣ sut llḥuf
ikfa-yi umesṛuf
ɣliɣ di lkarṭa d cceṛb.
4
Af asmi lliɣ d acawrar
zzin-iw yufrar
ixeddem-d baba fell-i
Nekseb tiɣezza n Camlal
nerna idurar
ɛuddeɣ d ṣṣaba irkʷelli
Tura mi senndeɣ s uffal
zzehṛ-iw imal
yaḥeţṛah ɣef zikenni.
6
Lemmer am zik tella ttrika
nezga d nettwekka
kulḥa yeǧǧa-d limaṛa-s
Ɣef zzin nebbʷi ddeṛka
d lwiz ay nefka
naɛceq deg zzhu n tullas
Tura mi tbeddel ssekka
ur infaɛ lebka
ssbeṛ ittabaɛ-t layas.
7
Annaɣ a Ṛebbi amek akka
ḥeṣleɣ di ccebka
a Lleh anida tifrat
Zikenni mi nesɛa ttrika
neḍḥa d nettwekka
nennum zzhu d lxalat
Tura neɣli ger imerrka
tekfa din leḥya
ččan-iyi di lḥayat
8
Lḥeṛf-iw idda ɣef lxa
yura deg nnesxa
ziɣ ddunit am laɛzib
Asmi akken zehhuɣ s ṛṛxa
d lmesṛuf yeqwa
mekkul lǧiha sɛiɣ aḥbib
Tura mi d-zzi s leɣla
ɛammdeɣ lwesxa
yak ma ɣliɣ ulac lɛib.
12
Zikenni nek d ṭṭaleb
D settin ḥizeb
di tedwaţ izga ukeṛṛas
Di lemḥayen neţţɛaţţib
nudaɣ d akʷ leɣrib
kul lbilaj beddeɣ fell-as
Tura mi di ṛṛas yekteb
s lḥif umɛa cceṛb
win iwten Ṛebbi a-t-iqas.
13
Ata wul-iw isnehtit
iggul ur iḥnit
ur izdiɣ deg Ceṛɛiwen
Asmi yella zzman d lɛali-t
mkul azniq nuɣ-it
lehduṛ-iw ttɛaddayen
Tura teṭṭef-iyi ddunit
lemḥayen-iw ggʷtit
iɛarq-aɣ zzhu dayen
15
Recdeɣ-k a lfahem ţḥessis
naɛya neţḥewwiṣ
asmi llan leqlub ṣfan
Kul yiwen ittissin lḥeq-is
iteddu s lqis
Neţţemmiḥ i wi yerfan
Tura ul-iw la yettinsis
yak ɣban isem-is
Yaḥeţṛah ɛaddan wussan.
16
Lqern-agi d nnaqes
iǧǧa-y-aɣ neṛxes
kullas la z̧z̧adent fell-aɣ
Zik asmi lliɣ d lfares
s cci netwennes
aṭas di medden i sḥefḍeɣ
Tura mi t-tagʷniţ taɛkes
zzheṛ-iw yeṭṭes
lmeḥna iqder a ţ-kemmleɣ
Recdeɣ-k a lfahem ḥesses
di lhedṛa ekyes
lehlak-iw ḥed mi a s-t-mleɣ
Ddunit iṣɛab lameṛ-ines
w irebḥen yenḥes
xirella bbʷidak ssneɣ
Abɛaḍ teccečč-as times
deg lerbaḥ yuyes
sɣur Ṛebbi ay as-d-fṛeɣ.
18
Aql-iyi am gider ameṛṛẓu
ḥeṣleɣ deg-gʷagu
ɛabdeɣ imeṭṭi d laɛyaḍ
Asmi iferr-iw iţhuzzu
sewwqeɣ d amenzu
s waffug zegreɣ agʷemmaḍ
A kra itɛuzzun iddullu
ikkes-aneɣ zzhu
lbaz neɣben-t iyuzaḍ.
19
Aqlaɣ g lqern ṛbaɛṭac
ikfa wis-tleṭṭac
a lḥadeq fhem ţḥessis
Irbeḥ w illan d amɛac
la iheddeṛ sseṭṭac
d laṣel yeɣba yisem-is
Qqʷlen ɣer zzna bbʷarrac
ikfa ddin ulac
cban tidma s tteryis.
22
Ddenya f medden tfuṣel
di lefhem yetneṣṣel
zzwamel beddlen tikli
Kra bbʷi illan d laṣel
di lɣaba yehmel
ɛaryan talaba ur telli
Lqern akka i t-id-yeṛṣel
deg-wnezgum neḥṣel
mi nger aqeddam neɣli.
26
Nɛaṛ fell-i a Bentumi
d lwaɛd yeṭṭf-iyi
ma ɣefleɣ keč d aɛssas
Yir ccɣʷel ula iwimi
yif-it iɣimi
akridi itebɛ-it leflas
Lqum-agi yeswehm-i
iz̧z̧uxxu s yimi
wi iɣlin a-ţţ-ddun fell-as.
33
Aṭas ay-guɣen lmitaq
ddnub iɛalleq
d ţţbiḥ izga ɣef iri-s
Ur-k-ineq ur-k-iɛatteq
d ssaɛd-is isaq
Ṛebbi yelha deg cceɣʷl-is
Ay aḥnin issedhaṛen lḥeq
fiḥel ma nenṭeq
amcum a t-id-yas wass-is.
37
La tamen ddenya la tdum
d mefṛuɣţ nnjum
ikerri tluqb-it taɣaṭ
D lbaz izeggʷiren i lqum
yeffeɣ d ameɣbun
hat tura seddu tesḍaṭ
Aklan issiriden aksum
s zzbel hacakum
ffɣen-d s llebsa n lqaṭ
DDunit-a d m lehmum
nettat ur teţdum
d ikerri tberrz-it taɣaṭ
Lbaz izeggʷiren i lqum
ahat deg-wnezgum
d aklan a-grefden tacḍaṭ
D ifassen igez̧z̧ren aksum
d lfert hacakum
qqʷlen ar llebsa n lqaṭ.
39
Lqern-agi yesseṛhab
deg rebḥen leklab
teṛṛẓem a Wlad-babelleh
S lmeḥna-nnsen ay ncab
d ṛṛay-iw iɣab
semman-i dderya m-Malah
Ǧǧiɣ cci neṭṭalab
mi d Wuday muhab
ccah a ṛṛay-iw ccah.
43
Ddenya m bu yedrimen
la t-ţţeyyiden
tiniḍ a medden yeɣra
D iḥcayciyen ay-gendellen
si tmurt-a ɣaben
wa d aɛsekṛiw wa ibuṣa
Tura ddenya bbuudayen
la ttemhawaden
ttaken-aɣ duṛu s xemsa.
55
A kra ifeṛzen iḍ ɣef-fas
kulci tezmerm-as
refdet a ssyadi lɣemma
D ddenya i-graben f llsas
lfahem yesla-y-as
adrar yeɣli d wa ɣef-fa
Wi innumen lɛaz iţwakkes-as
tbeddel fell-as
ţţif lmut tudert am ta.
56
Helkeɣ ur telli ssebba
nudaɣ lɛulama
ur ufiɣ ddwa ɣur-sen
Tekka fell-i leɣʷlaba
si tmurt m baba
rewlen lɛibad i-ɣ-issnen
Nfiɣ-d ɣer tmurt l-lɣerba
mi atrum a ṭṭelba,
lɛaqul isenteqqiden.