Lḥaǧ amcic

s ɣur Belɛid n At Ɛli

 

 

 

Tura, d lqern ṛbeɛṭac, yak? Ih! D tideţţ.

Daɣ neţţa, welleh ar aɣ-yesseḥḍer Ṛebbi i lecɣal ar dayen kan! Neḥḍer i mkul leɛǧeb lḥaṣun: d timacinin yeţţafgen deg igenni, d tid ikeččmen deg waman, d isendyaq yeţɣennin, d lexyuḍ yeţţawin lḥedṛa di tmurt ɣer tayeḍ.

Newweḍ, nniɣ-awen, newweḍ ɣer wayen ur ţţamnen ara lejdud-nneɣ lemmer d ara d-kkren ad walin.

Walakin, lemmer d ara d-yekker yiwen di lejdud-nni dɣa, - lameɛna n widak-nni n zik zik, n widak-nni iḥeḍren i wasmi ineṭṭeq lmal, (lehwayec yak heddṛent am kečč d nekk), yaf-d lmal s lekmal yeggugem neɣ yeskeɛwiw d asekkeɛwew: ar ţ-yefk d tarewla, ar t-yuɣal d aẓekka-s ar d yini i lǧiran-is: Ziɣ, ddunnit simmal teţţuɣal ɣer deffir! Neɣ, d tuzzya i ttezzi! Wissen?

D acu kan? Welleh, a wer nrennu ṛbeɛṭac leqrun-nniḍen! A wer neţţaweḍ ɣer wi-s meyya di leqrun! Ur ţ-nessin, ur ţ-nelḥiq, ur ţ-nwala, taswiɛt-nni i deg ara nsel, i sin yeɣyal ţţemyehdaṛen!

Akken s-qqaren iṛumyen: ur yelli wayen d-yennulfan s ddaw yiṭij!

Di lberr-agi-nneɣ, la k-qqaren, tella, di zzman n zik zik, yiwet n tmurt yeḥkem deg-s wemcic. La dɣa, ṣṣebḥan Lleh! Tamurt i deg ara yeḥkem wemcic, a ţ-tafeḍ teţwaɛmeṛ ala s iɣerdayen.

Lḥaṣun tamurt-agi i ɣef ara d-neḥku dɣa d akken: ṣṣelṭan d amcic, ma d lumma-s yak ala arraw n tɣerdayeţ.

Ass-n ihi, deg wussan n Ṛebbi, yekker wemcic iṛuḥ ad d-iḥuǧǧ. Iḍehr-ak lḥal, ayen yebɣa yak yewweḍ ɣer-s; di ssyen akin, xas yeẓra iman-is yeṣfa di mkull tamsalt, walakin yessen lfuruḍ; yeţɣimi-yas-d kan a d-yeslil iɣsan-is deg wexxam n Ṛebbi: d ṣṣwab!

Yezzi-d useggas: yak, imir-n ur yelli d lbabuṛ wala ṭṭumubil: ata yuɣal-d ṣṣelṭan amcic, ddac ddac, almi d-yekcem tamurt-is. Timeḥremt-nni tazegzawt n lḥeǧǧaǧ, yeqqen-iţ-id i wqerruy-is: dɣa, s tin, yetbet iḥuǧ-d s tideţţ; yessiweḍ-d ɣer lemḥekma-s.

Walakin, - wissen amek almi, - ṣṣelṭan iḍeɛf-d mačči d kra: wehmeɣ amek d-yessaweḍ s axxam-is: qqimen-d deg-s ala iɣsan. Yerna yeţwaɛqal d acu i d ssebba-s: mačči d lehlak, mačči d aḥebbeṛ, mačči d iṭij, mačči d win, mačči d wa: i t-id yenɣan, meskin, d laẓ. Ṣṣelṭan yemmut-d di laẓ! Wissen ma d at tmurt-nni i deg yella lḥiǧ i wumi tendeh... lmizireyya, ur as-fkin ara ad yečč; wissen imi di tmura-nniḍen ur yemlal ara d lmumnin am iɣerdayen ara s-yefken talqimt; d acu kan? Mi d-yewweḍ s axxam-is, iɛedda yeqqim, lmumen...ur iḥeddṛ ara!...

Ulac uɣilif: awi-d imi d-yessaweḍ ala ṛṛuḥ! Tamurt yali tesla yess yusa-d: tamurt yak tefṛeḥ, xas...ur tefṛiḥ ara. Iɣerdayen s lekmal rran tiwwura n yexxamn-nnsen ɣef yiman-nnsen, beddlen imensawen. Dɣa, la k-qqaren, ass-n tiɣerdayin yak d dɛant-as s lxiṛ i ṣṣelṭan imi, meqqar, i wudem-is ččant cwiṭ umellal, di lɛuḍ uḥetḥut-nni-nnsent n kull-ass. Nniɣ-ak, a sidi, lḥaṣun, ula i yak-iniɣ ara...

Ma d amcic, - steɣfiṛ Lleh! - ma d ṣṣelṭan, akken d imi i t-id-yuɣal cwiṭ leɛqel, yeṭṭef inebbeh tuɣmas-is akken ilaq, yessiwel-d i ccambiṭ, yenna-yas:

— Ṛuḥ, berreḥ i tmurt akken ma tella: bɣiɣ leɛmala s lekmal, s umeẓyan s tmeẓyant, s wemɣaṛ s temɣart, ad d-awḍen tura ɣur-i ad iyi-srebḥen lḥiǧǧ-iw: in-asen aql-i cedhaɣ-ten aṭas aṭas: bɣiɣ a ten-ẓreɣ: in-asen lameɛna lukan a n-yeqqim yiwen ur d-iruḥ ara...

Lḥaṣun, ṛuḥ, ɣiwel!... La ţṛaǧuɣ!

Taswiɛt, almi ata ṭṭbel la yekkat, ccambiṭ la yeţberriḥ akken t-iweṣṣa ṣṣelṭan. S akin, ddunnit temherwal: win iteţţen yeǧǧa lmakla-s, win mecɣulen yeǧǧa cceɣl-is, win yellan di ṣṣyada yuzzl-d; lḥaṣun, s umecṭuḥ s umeqran, s umuḍin s uneɛɛaybu, akken ma yella... lewṭen, yegrarb-d neɣ yuli-d, yegguggi-d ɣur ṣṣelṭan...

— S leɛqalu! s leɛqalu! Yiwen yiwen! Ur ken iteffeɣ ara leɛqel! Ad tɛeddim irkel, ur ţţagadu!....

ṢṢelṭan yebded s dat n tewwurt: s akin, wa s deffir wa, aɣerda neɣ taɣerdayt d-yewwḍen ɣer-s, ad yessuden aqerruy-is, ad as-yesserbeḥ: Mebṛuk, a Ṣṣelṭan! D amerbuḥ lhiǧǧ-ik! Ṣṣelṭan, ad as-yerr:

— A k-yesserbeḥ Ṛebbi!

A t-yessekcem, ad yeddu yid-s ɣer daxel n wexxam, a d-yuɣal ɣer wayeḍ:

— D nnuba-k!

Walakin, ur ẓriɣ amek, kra n win ara yessekcem akken, yeǧǧaǧa-t-in din s daxel, yeţţuɣal-d kan weḥd-s.

Wissen ma yella kra n tewwurt ti-s snat i deg teffɣen si lǧiha-nniḍen, neɣ... Lḥaṣun, kra n win ikecmen ur d-yuɣal.

— Tagi, a Bu-tbururin, d lmuɣriba! Aql-i segmi bdan la keččmen watmaten-iw, ur walaɣ ara yiwen yuɣal-d! D acečči i la ten-yecceččay ṣṣelṭan daxel? Mačči d win ara ţ-ixedmen! La teffɣen si tewwurt n beṛṛa aɛeẓẓug? Ẓṛiɣ yiwet n tewwurt kan i yellan! Ihi?

Tagi, nniɣ-ak, a Bu-tbururin a xuya, tagi d lmuɣriba!

Bu-tbururin-agi, i la yheddṛen i yiman-is weḥd-s weḥd-s, d yiwen n uɣerda, diɣen, kra n wemɣaṛ akken d aciban, caben ula d iɣallen-is: yeqqim, - yeqqumbeɛ, - ɣef teẓruţ, dihin dihin, mbɛid, agemmaḍ i wexxam n ṣṣelṭan: la d-yesskad kan, yeţfeṛṛiǧ.

Neţţa, ladɣa, segmi yesla i wberreḥ n ccambiṭ i t-yuɣ lḥal yeɛna amkan-nni, la d-yeţwali deg watmaten-is la d-ţţazzalen.

Mačči d lemqadra ur yeţqadar ara ṣṣelṭan: ma ur iḥar ara am wiyiḍ... ḥaca wayelleh!... Walakin, neţţa, am wakken “ileḥḥu i ddunnit-is s leɛqel”, a d yelfu yeţţekki deg widak-nni i s-yeqqaren: Leɛqel d aḥbib n Ṛebbi.

Deg uxemmem-nni-ines, yenna-yas: Lḥaṣun, lxiṛ ur yeţfat ara. Ihi, ma d nekk, aql-i di lehna: ma d ayen nniḍen, ayen yellan, a t-nẓer!

Yeqqim akken, la d-yeţfeṛṛiǧ...Almi... tfukk yak tmurt. Tamurt yak tɛedda ɣef ṣṣelṭan: tamurt yak tesrebḥ-as, tamurt s lekmal tekcem s axxam-is: yiwen ur d-yeqqim ara...

Ata yeffeɣ-d lḥaǧ amcic... Ṣṣebḥan Lleh! Nnaɣ, ɛni d allen-ik, a Bu-tbururin? Sgellin kan i yella ṣṣelṭan yeḍɛef, yeqqur yak, yemmut: tura, ad as-tiniḍ icuff uɛelliḍ-is! Nniɣ-ak a xuya, di lmuɣriba ɣer lmuɣriba!...

Taswiɛt, amcic la yesskad yak akka wakka ma yella win mazal, almi i s-yeḍher Bu-tbururin iqubel-it-id di hin ɣef teẓruţ. Yessiwel-as:

— Anwa wa wihin?

— Waaa! d nekkini, anɛam a ṣṣelṭan! Waaa, d nekk, d Bu-tbururin!...

— D kečč, a Bu-tbururin? A, ḥsiɣ ya! d armi daymen akkagi! D lebda d kečč i d aneggaru. I tura, d acu teţṛaǧuḍ?

— Anɛam, a ṣṣelṭan, ur tesɛiḍ i ţṛaǧuɣ: tura ad ṛuḥeɣ. Usiɣ-d kan ad ak iniɣ mebṛuk lḥiǧǧ-ik a sidi: ad ig Ṛebbi d amerbuḥ, d aseɛdi! Ad ig Ṛebbi...

— Ih! Ih! Ih!... saḥḥa, saḥḥa!... I tura, yak a d-ṛuḥeḍ ad tessudneḍ aqerruy-iw: ad tkecmeḍ s axxam...

— Anɛam, a ṣṣelṭan: ma d aqerruy-ik, ur uklaleɣ ara a t-ssudneɣ: lemmer a t-ssimseɣ! Tegra-d deg unekcum s axxam... Iketteṛ xiṛ-k a sidi ameɛzuz: ur zmireɣ ara ad kecmeɣ...

— Amek?... Ur tezmirḍ ara ad tkecmeḍ? Acuɣer?

— Acuɣer?... Anɛam a ṣṣelṭan sidi lḥaǧ amcic ucbiḥ: ad ak-iniɣ kan tideţţ, i Ṛebbi: mi ara sekdeɣ ɣer ccemla teqqneḍ i wqerruy-ik, d tideţţ, d lḥaǧ, swa-swa; mi ara sekdeɣ ɣer wallen-ik... mazal-itent kan d allen n wemcic! Daɣneţţa,... bqa ɛla xiṛ!...

 Yeṭṭef abrid-is, iṛuḥ.